စစ်ကော်မရှင် ကျင်းပခဲ့သည့် ရွေးကောက်ပွဲတွင် အနိုင်ရရှိခဲ့သော ကိုယ်စားလှယ်များသည် လွှတ်တော်အစည်းအဝေး မစတင်မီ “မြန်မာ့မျက်နှာစာသစ်” ဖိုရမ်ကို တက်ရောက်ရမည်ဖြစ်ကြောင်း စုံစမ်းသိရသည်။

လာမည့် မတ်လ ၁၃ ရက်နှင့် ၁၄ ရက်တွင် နေပြည်တော်ရှိ MICC-1 ၌ စစ်ကော်မရှင် ဦးဆောင်ကျင်းပမည့် “မြန်မာ့မျက်နှာစာသစ်ဖိုရမ်”ကို ရွေးကောက်ပွဲမှတဆင့် တက်လာမည့် အစိုးရသစ်အတွက် ယုံကြည်မှု၊ တည်ငြိမ်မှုနှင့် ဖွံ့ဖြိုးတိုးတက်မှု အကြောင်းများ ဆွေးနွေးရန် တတ်သိပညာရှင်များ၊ အနိုင်ရ လွှတ်တော်ကိုယ်စားလှယ်များကို ဖိတ်ကြားထားကြောင်း သိရသည်။

“ဖိုရမ်ကို လွှတ်တော်ကိုယ်စားလှယ်အားလုံး တက်ရောက်ဖို့ ဖိတ်ထားတယ်။ နှစ်ရက်လုပ်မှာ၊ ခေါင်းစဉ် အသေးစိတ်တော့ မသိသေးဘူး။ မနက်ဖြန်ကျရင် လွှတ်တော်ထဲဝင်ဖို့၊ လွှတ်တော်ထဲက စက်ခလုတ်တွေ အသုံးပြုဖို့ သင်တန်းပေးမှာ ရှိတယ်” ဟု လင်းခေးမြို့နယ်ကိုယ်စားပြု ပြည်သူ့လွှတ်တော်ကိုယ်စားလှယ် စိုင်းဆေဟန် မှ သျှမ်းသံတော်ဆင့်ကို ပြောသည်။

လက်ရှိတွင် လွှတ်တော်အစည်းအဝေးများ တက်ရောက်ရန် ၂၀၂၅-၂၀၂၆ စစ်တပ်ရွေးကောက်ပွဲ အနိုင်ရ လွှတ်တော်ကိုယ်စားလှယ်များ နေပြည်တော်၌ စုဝေးရောက်ရှိနေကြပြီး ယနေ့ (မတ်လ ၁၁ ရက်) နောက်ဆုံးထား သတင်းပို့ရမည်ဖြစ်ကြောင်း သိရသည်။

လွှတ်တော်အစည်းအဝေးများကို မတ်လ ၁၆ ရက်တွင် ပြည်သူ့လွှတ်တော်၊ မတ်လ ၁၈ ရက်တွင် အမျိုးသားလွှတ်တော်၊ မတ်လ ၂၀ ရက်တွင် ပြည်နယ်/တိုင်းလွှတ်တော် အသီးသီးတို့၌ ခေါ်ယူကျင်းပမည်ဖြစ်ပြီး စစ်ကော်မရှင် ရွေးကောက်ပွဲတွင် အနိုင်ရရှိခဲ့သည့် လွှတ်တော်ကိုယ်စားလှယ်များ တက်ရောက်ကြရန် ကြေညာထားသည်။

“ဒီနေ့ကတော့ ကိုယ်စားလှယ်တွေ ရောက်ရှိကြောင်း သတင်းပို့တာ နောက်ဆုံးရက်ပါ။ နေထိုင်ရေးအတွက် လွှတ်တော်ဘက်က တာဝန်ယူပေးထားတော့ အားလုံး အဆင်ပြေပါတယ်။ ကျားဖြူပါတီက အနိုင်ရ လွှတ်တော်ကိုယ်စားလှယ်တွေလည်း နေပြည်တော်ကို အားလုံး ရောက်နေကြပြီ။ လွှတ်တော်စရင် အရင်ဆုံးတော့ လွှတ်တော်ဥက္ကဋ္ဌနဲ့ ဒုဥက္ကဋ္ဌတွေ ရွေးရမှာပေါ့” ဟု စိုင်းဆေဟန် မှ သျှမ်းသံတော်ဆင့်ကို ဆက်ပြောသည်။

စစ်ကော်မရှင် ရွေးကောက်ပွဲတွင် ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) မှ သီပေါ၊ မိုးနဲ၊ လဲချား၊ ကျေးသီး၊ မိုင်းကိုင်၊ ကွန်ဟိန်း၊ လင်းခေးမြို့နယ်များအတွက် ပြည်သူ့လွှတ်တော်ကိုယ်စားလှယ် (၇) ဦးနှင့် အမျိုးသားလွှတ်တော်အတွက် ကိုယ်စားလှယ်တစ်ဦး အနိုင်ရရှိခဲ့သည်။

အလားတူ ပအိုဝ်းအမျိုးသားများအဖွဲ့ချုပ်ပါတီ PNO မှ ပြည်သူ့လွှတ်တော်ကိုယ်စားလှယ် (၅) ဦးနှင့် အမျိုးသားလွှတ်တော် ကိုယ်စားလှယ် (၂)ဦး၊ ဓနုတိုင်းရင်းသားလူမျိုးများ ဒီမိုကရေစီပါတီ DNDP မှ ပြည်သူ့လွှတ်တော်နှင့် အမျိုးသားလွှတ်တော်အတွက် တစ်ဦးစီ၊ အင်းအမျိုးသားအဖွဲ့ချုပ်ပါတီ INLP မှ ပြည်သူ့လွှတ်တော်ကိုယ်စားလှယ်တစ်ဦး၊ ‘ဝ’အမျိုးသားပါတီ WNP မှ အမျိုးသားလွှတ်တော် ကိုယ်စားလှယ်တစ်ဦး အနိုင်ရရှိထားသည်။

သျှမ်းပြည်အတွင်း ရွေးကောက်ပွဲကျင်းပခဲ့သည့် (၃၈) မြို့နယ်တွင် တပ်တွင်းကြိုတင်မဲများဖြင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP မှ ပြည်သူ့လွှတ်တော်အတွက် (၂၄) နေရာနှင့် အမျိုးသားလွှတ်တော်အတွက် (၅) နေရာ အသီးသီး အနိုင်ရရှိခဲ့သည်။