သျှမ်းပြည်မြောက်ပိုင်း သီပေါမြို့နယ်အတွင်းရှိ ရှမ်းတိုင်းရင်းသားများ ဒီမိုကရက်တစ်ပါတီ (SNDP) ကျားဖြူပါတီ ဆိုင်းဘုတ် ဖျက်ဆီးခံရကြောင်း စုံစမ်းသိရှိရသည်။

အဆိုပါ SNDP ဆိုင်းဘုတ် ဖျက်ဆီးခံရခြင်းနှင့် ပတ်သက်ပြီး အသေးစိတ် အချက်အလက်ကို သေချာမသိရှိသေးကြောင်း၊ လက်ရှိမှာ လူမှုကွန်ရက်စာမျက်နှာပေါ်တွင် သာတွေ့ရှိထားကြောင်း ရှမ်းတိုင်းရင်းသားများ ဒီမိုကရက်တစ်ပါတီ (SNDP) ပါတီ၏ အထွေထွေအတွင်းရေးမှူး စိုင်းဘိုးအောင် က သျှမ်းသံတော်ဆင့် ကိုပြောသည်။

“ဒီ ကိစ္စနဲ့ ပတ်သက်ပြီး ကျနော်တို့လူ အကြောင်းကြားလာခြင်းမရှိသေးဘူး။ ဘယ်လို အရေးယူသွားမယ်ဆိုတာ ကျနော်တို့ မဆုံးဖြတ်ရသေးဘူး။ အွန်လိုင်းမှာပဲ မြင်သေးတော့ ဘာမှတော့ ပြောလို့မရသေးဘူး” ဟု စိုင်းဘိုးအောင် က ပြောသည်။

ပါတီ ဆိုင်းဘုတ် ဖျက်ဆီးခံရသည့်အပေါ် စိစစ်သွားပြီး အရေးယူမည့် ကိစ္စ ဆုံးဖြတ်သွားမည် ဟုလည်း စိုင်းဘိုးအောင် က ပြောသည်။

သျှမ်းပြည်တွင်း တိုင်းရင်းသား စည်းလုံးညီညွှတ်မှု မရှိကြောင်း ပြသသည့် ပြယုဒ် ဖြစ်သည့်အတွက်ကြောင့် သျှမ်းပြည်တွက် ဆုံးရှုံးမှုဖြစ်စေကြောင်း ကျားဖြူပါတီ၏ အထွေထွေ အတွင်းရေးမှူး ဦးဘိုးအောင် ကပြောသည်။

“သျှမ်းအချင်းချင်း ခြေထိုးနေခြင်း၊ သျှမ်းပြည်သားအချင်းချင်း ဖျက်ဆီးခြင်းဟာ သျှမ်းပြည်အတွက် ဆုံးရှုံးမှုပဲဖြစ်ပါတယ်” ဟု ဦးဘိုးအောင် ကပြောသည်။

ယခုရက်တပတ်အတွင်း သျှမ်းပြည်မြောက်ပိုင်း သီပေါမြို့တွင် စက်တင်ဘာ ၁၈ရက် ညတွင်လည်း အမျိုးသား ဒီမိုကရေစီ အဖွဲ့ချုပ်(NLD) ဆိုင်းဘုတ် ဖျက်ဆီးခံခဲ့ရပြီး၊ သျှမ်းပြည် တောင်ပိုင်း မိုင်းကိုင်တွင်လည်း တအာင်း အမျိုးသားပါတီ (TNP) ဆိုင်းဘုတ် ၃နေရာ ဖျက်ဆီးခံရကြောင်း သိရသည်။

ထို့ကြောင့် ကျားဖြူ ပါတီ ဆိုင်းဘုတ်ဖျက်ဆီးခံသည့် ကိစ္စနှင့် ပတ်သက်ပြီး ထိရောက်စွာ အရေးယူပေးရန် အတွက် မြို့နယ် ရဲတပ်ဖွဲ့ကို အကြောင်း ကြားထားကြောင်း သီပေါလွှတ်တော်အမတ် နန်းစမ်းစမ်းအေး က သူမ၏ လူမှုကွန်ရက် စာမျက်နှာပေါ်မှာ ရေးသားထားသည်။

“ ထိရောက်စွာ အရေးယူပေးဖို့ မြို့နယ် ရဲတပ်ဖွဲ့ကို လက်ရှိ လွှတ်တော်ကိုယ်စားလှယ်လောင်းတစ်ဦး အနေနဲ့ အကြောင်းကြားထားပါတယ်။ မည်သူမဆို ( ချွင်းချက်မရှိ) အမှုမှန် ပေါ်ပေါက်အောင် စစ်ဆေးအရေးယူသွားဖို့ ရှိပါတယ်။ ဒါမျိုး လုပ်ရပ်ကို မိမိတိုပ လုံးဝလက်မခံပါ။ SNLD အနေနဲ့ လုံးဝ ( လုံးဝ) ကန့်ကွက်ပါတယ်။ မတူကွဲပြားမှုကို လက်ခံနိုင်ကြပါစေ” SNLD ပါတီ မှ ပြည်သူ့လွှတ်တော် အမတ်လောင်း အဖြစ် ဝင်ရောက် ယှဉ်ပြိုင်မည့် နန်းစမ်းစမ်းအေး ၏ လူမှုကွန်ရက်စာမျက်နှာတွင် ရေးသားသသည်။

သီပေါမြို့နယ် တွင် အမျိုးသားဒီမိုကရေစီ အဖွဲ့ချုပ် (NLD)၊ ရှမ်းတိုင်းရင်းသားများဒီမိုကရေစီ အဖွဲချုပ် (SNLD)၊ ကြံ့ခိုင်ရေး ပါတီ( USDP)၊ ရှမ်းတိုင်းရင်းသားများ ဒီမိုကရက်တစ် ပါတီ (SNDP)၊ တအာင်း အမျိုးသားပါတီ (TNP) ၊ ညီညွတ်သောဒီမိုကရက်တစ်ပါတီ (UDP)၊ အမျိုးသားဒီမိုကရေစီ အင်အားစု (NDF) နှင့် ပြည်ထောင်စု ကောင်းကျိုးဆောင်ပါတီ (UBP) တို့ဝင်ရောက်ယှဉ်ပြိုင်မည်ဟုသိရသည်။