သျှမ်းပြည်မြောက်ပိုင်း ကျောက်မဲမြို့နယ်အတွင်းရှိ သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA ၏ လွယ်ရင်တပ်စခန်းအား အစိုးရတပ်မတော်က ထိုးစစ်ဆင်တိုက်ခိုက်ရာ တိုက်ပွဲအပြင်းအထန်ဖြစ်ပွါးခဲ့သည်။

မေလ ၂ ရက်နေ့ မနက် ၁၁ နာရီအချိန်တွင် အစိုးရတပ်မတော်၏ တပ်မမ ၇၇ လက်အောက်ခံ အင်အား ၃၀၀ ခန့်က လွယ်ရင်တောင်ပေါ်ရှိ  SSPP/SSA ၏ယာယီတပ်စခန်းအား ၂ နာရီခန့်အကြာဝင်ရောက်တိုက်ခိုက်ခဲ့ခြင်းဖြစ် ကြောင်း သိရသည်။

SSPP/SSA ယာယီတပ်စခန်းအား အစိုးရတပ်မှ အင်အားသုံးတိုက်ခိုက်စဉ် မြန်မာ့ငြိမ်းချမ်းရေးကော်မရှင် မှ ဒုတိယ ဥက္ကဌ ဦးသိန်းဇော်ဦးဆောင်သည့်ကိုယ်စားလှယ်အဖွဲ့သည့် SSPP/SSA ဌာနချုပ် ဝမ့်ဟိုင်းသို့ ရောက်ရှိကာ ငြိမ်းချမ်း ရေးအတွက်ဆွေးနွေးနေချိန်ဖြစ်ကြောင်း SSPP/SSA ဘက်ကပြောသည်။

လွယ်ရင်တောင်သည် ကျောက်မဲမြို့နယ် တော့ဆန်အုပ်စုနှင့် ၃ မိုင်ခန့်အကွာတွင်တည်ရှိပါသည်။ အစိုးရတပ်မတော်မှ SSPP/SSA တပ်စခန်းအား ထိုးစစ်ဆင်တိုက်ခိုက်နေချိန် တပြိုင်တည်းမှာပင် လွယ်ရင်တောင်၏ မြောက်ဘက်အရပ်ရှိ တအာင်းတပ်စခန်းအားလည်း အစိုးရမှ တိုက်ခိုက်ခဲ့ကြောင်း ၊အစိုးရဘက်မှ 79mm – 60mm – 81 mm အမျိုးအစား လက်နက်ကြီးများပစ်ခတ်အသုံးပြုကြောင်း ကျောက်မဲမြို့နယ်အတွင်း တာဝန်ကျလှုပ်ရှားနေသည့် SSPP အရာရှိ တဦးကပြောသည်။

တော့ဆန်ရွာနားမှာ လာပြီးမြှုပ်နှံထားတဲ့ အလောင်း ၂ လောင်းတွေ့ရတယ်။ ထိခိုက်ဒဏ်ရာရတဲ့သူတွေလည်း သယ်သွားတာတွေ့ရတယ်။   – ဟု တော့ဆန်ရွာသားများကပြောသည်။

အဆိုပါတပ်ရင်းသည် စစ်ကြောင်း ၂ ကြောင်းခွဲကာ လွယ်ရင်တောင်တက်ကြောင်း၊ တကြောင်းမှာ လွယ်ရင်တောင်၏ မြောက်ဘက်ခြမ်းတွင်တက်သဖြင့်  မြောက်ဘက်ခြမ်းရှိ တအာင်းတပ်နှင့်တိုက်ပွဲဖြစ်ပွါးကြောင်း၊ ကျန်တကြောင်းမှာ လွယ်ရင်တောင်၏ တောင်ဘက်ခြမ်းမှတက်ကြောင်း   SSPP အရာရှိကပြောသည်။

သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA သည် ဦးသိန်းစိန် အစိုးရလက်ထက်က ပြည်နယ်အဆင့် ပြည်ထောင်စုအဆင့် အပစ်ရပ်စဲရေးလက်မှတ်ရေးထိုးထားသည့်အဖွဲ့ဖြစ်သည်။ မေလ ၁ ရက်နှင့် ၂ ရက်ကလည်း ငြိမ်းချမ်းရေးနှင့် ဒေသဖွံ့ဖြိုးရေးအတွက် ငြိမ်းချမ်းရေးကော်မရှင်နှင့် တွေ့ဆုံဆွေးနွေးခဲ့သည်။