ရခိုင်ပြည်အတွင်း ပဋိပက္ခနှင့် ပတ်သက်ပြီး သျှမ်းမြောက်တွင်ကန့်ကွက်သည့် လှုပ်ရှားမှု ပြုလုပ်

0

သျှမ်းပြည် မြောက်ပိုင်း လားရှိုးမြို့နှင့် သီပေါမြို့တွင် ယနေ့(စက်တင်ဘာ ၉ )ရက် မနက်ပိုင်း က ရခိုင်ပြည်အတွင်းဖြစ်ပွါးသော ပဋိပက္ခနှင့်ပတ်သက်ပြီး ကန့်ကွက်သည့် လှုပ်ရှားမှု ပြုလုပ်ကြကြောင်း စုံစမ်းသိရသည်။

လားရှိုး တက္ကသိုလ် မျက်နှာစာ နှင့် သီပေါမြို့ အဝင် ဆိုင်းဘုတ်တွင် ကန့်ကွက်သည့် လှုပ်ရှား မှု ပြုလုပ်ခဲ့ကြောင်း လှုပ်ရှားမှုတွင် ပါဝင်ခဲ့ကြသူများက ပြောဆို သည်။

အဓိက လက်ရှိ ရခိုင်ပြည် အတွင်းဖြစ်ပျက်နေသည့် ပဋိပက္ခ ၊ တိုက်ပွဲကြောင့် အရပ်သားပြည်သူများသေဆုံး မှု၊ ရခိုင်ပြည်တွင် 4G အင်တာနက် ချက်ချင်းဖွင့်ပေးရန် နှင့် ဖက်ဆစ်ဆန်သော သတ်ဖြတ်မှုဝါဒကို ဆန့်ကျင် ရှုံ့ချ ခြင်းဖြစ်ကြောင်း ပါဝင်လှုပ်ရှားသူတဦးကပြောသည်။

“ ရခိုင်မှာလည်း လူအများကြီးသေဆုံးပြီ ။ ရခိုင်ကျောင်းသားတွေ ကန့်ကွက် ဆန္ဒပြကြတယ်။ အဲတာကို ကျမတို့က သူတို့ဖက်ရပ်တည်တယ်ဆိုတဲ့ သဘောနဲ ပြုလုပ်တာပါ” ဟု သီပေါမြို့ လူငယ် တက်ကြွလှုပ်ရှားသူ နန်းပီး က သျှမ်းသံတော်ဆင့် သို့ ပြောသည်။

ရခိုင်ပြည်တွင် အင်တာနက်ဖွင့်လှစ်ပေးရန် အတွက် လူ့အခွင့်အရေး တက်ကြွလှုပ်ရှားသူ၊ ရခိုင်ပြည်သူများက တောင်းဆိုခဲ့သော်လည်း အစိုးရ အနေဖြင့် 2G အင်တာနက်သာဖွင့်လှစ်ပေးခဲ့ကာ ရခိုင်ပြည်သူလူထုအသုံးပြုရန် အင်တာနက်လိုင်းများ ယနေ့ချိန်ထိ အဆင်မပြေသေးဟု ဆိုပါသည်။

လက်ရှိ အရပ်သားများ အကြမ်းဖက်သတ်ဖြတ်ခံရမှုသည် ရခိုင်ပြည် တခုတည်း တွင်မဟုတ်ကြောင်း သျှမ်းပြည်မြောက်ပိုင်းတွင်လည်း ဖြစ်ပွားနေကြောင်း၊ တိုင်းရင်းသားများ အကြမ်းဖက်သတ်ဖြတ်မှုကို ရပ်တန့်ပေးစေချင်ကြောင်း နန်းပီး က တောင်းဆိုလိုက်သည်။

သျှမ်းပြည်မြောက်ပိုင်းတွင်လည်း မကြာခဏ အရပ်သားသတ်ဖြတ်ခံရမှုများရှိပြီး ယနေ့ အချိန်ထိ အမှုမှန်မပေါ်ပေါက်သေးပေ။

ရခိုင်ပြည်တွင် အင်တာနက်လိုင်းများပိတ်ဆိုင်းခြင်းသည် လူ့အခွင့်အရေး တရပ်ကို ချိုးဖောက်နေခြင်းဖြစ်ပြီး အရပ်သား ပြည်သူများကို ရာဇဝတ် ကျူးလွန်ရန် အတွက် ကူညီပေးထောက်ပံ့နေသည့် သဘောဖြစ်ကြောင်း ယနေ့ ကန့်ကွက်လှုပ်ရှားမှုကို ဦးဆောင်သည့် လားရှိုးတက္ကသိုလ် ကျောင်းသား ဂျိမ်း က သျှမ်းသံတော်ဆင့်ကို ပြောသည်။

“4G အင်တာနက်လိုင်းကို ပိတ်လိုက်တာက လူအခွင့်ရေးချိုးဖောက်မှုလိုဘဲ မြင်တယ်။ နှိပ်စက်မှု၊ အနိုင်ကျင့်မှု တစ်ခုလို့မြင်တယ်။ လူထုအုပ်စု၊ လူတန်စားတစ်ခု ပေါ်မှာ ရာဇဝတ်မှုတစ်ခုကို ကျူးလွန်ဖို့အတွက် ကူညီပေးနေတယ် အရာ အထောက်ပံ့ပေးနေတယ်အရာတစ်ခုလို့ဘဲ ကျတော်တော့မြင်ပါတယ်” ဟု ဂျိမ်း က ပြောသည်။

လက်ရှိရခိုင်ပြည်တွင် စစ်ရေးပဋိပက္ခများ နေ့စဉ်ဖြစ်ပွားပြီး လက်နက်ကြီးထိမှန်သေဆုံးသည့် အရပ်သားလည်း နေ့စဉ်ဆိုသလိုရှိနေပါသည်။ မြန်မာနိုင်ငံ တဝှမ်း ဖြစ်ပွားနေသည့် ကိုဗစ်-၁၉ ကူးစက်မှုနှုန်းသည်လည်း ရခိုင်တွင် တနေ့ထက် တနေ့ မြင့်တက်နေသည်။

ထို့ကြောင့် သတင်းအချက်အလက် စီးဆင်းမှုမြန်ဆန်စေရန် အတွက် 4G အင်တာနက်လိုင်း အမြန်ဆုံးဖွင့်လှစ်ပေးရန် သျှမ်းမြောက် တက္ကသိုလ် ကျောင်းသားများနှင့် တက်ကြွလှုပ်ရှားသူများက တောင်းဆိုလိုက်သည်။

သျှမ်းပြည်တွင်လည်း ၂၀၁၉ ဒီဇင်ဘာမှ သြဂုတ် ၂၀၂၀ အထိ သီပေါမြို့နယ်အတွင်း အကြမ်းဖက်သတ်ဖြတ်ခံရသူ စုစုပေါင်း ၁၆ ဦး ရှိသွားပြီးဖြစ်ကြောင်းသိရသည်။

(အလုပ်သင် သတင်းထောက် စိုင်းဆိုင်လှိုင်း ရေးသားသည်။)

Leave a Comments

SHARE