စိုင်းဆိုင်လှိုင်း
မြန်မာ-ထိုင်း နယ်စပ် တာချီလိတ်မြို့တွင် အသက် ၁၉ နှစ် အရွယ် အမျိုးသားတဦး သေနတ်ပစ်ခံရပြီး သေဆုံးခဲ့ကြောင်း စုံစမ်းသိရှိရသည်။
ယမန်နေ့ သြဂုတ် ၃၁ ရက် ည ၇ နာရီ ကျော် တွင် တာချီလိတ်မြို့ ဆန်ဆိုင်း(က)ရပ်ကွက် ၊ ပုံလို့လမ်းတွင် နေထိုင်သည့် မောင်သုတမိုး ကို အမည်မသိ လူတစုက ပစ်ခတ်သွားခဲ့ခြင်းဖြစ်ကြောင်း တာချီလိတ်မြို့မ ရဲစခန်းက ပြောသည်။
“မနေ့ည (၇)နာရီ ကျော်လောက်မှာဖြစ်တာ။ လမ်းမပေါ်ကနေပြီးတော့ အိမ်ထဲကို သေနတ်ပစ်သတ်သွားတာပါ။ အခုက အမှုကိုစုံစမ်းစစ်ဆေးနေပါတယ်။ ဘယ်သူလာပစ်သွားလဲဆိုတာ စုံစမ်းနေဆဲပါ”ဟု တာချီလိတ် ရဲမှုးညီညီထွေးက ပြောသည်။
အဆိုပါသေနတ်ပစ်ခံရသည့် အမျိုးသားကို တာချီလိတ်နာရေးကူညီမှုအသင်းမှ သွားရောက်ခေါ်ဆောင်ခဲ့ရာ တာချီလိတ်ဆေးရုံအရောက် သေဆုံးသွားခဲ့ကြောင်းသိရသည်။။
“ ကျနော်တို့ ဒီကိစ္စ က ဘာမှသိပ်ပြောလို့မရသေးဘူး။ အမှုတွေစစ်ဆေးနေသေးတယ်” ဟု တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စော က သျှမ်းသံတော်ဆင့်ကို ပြောသည်။
သေနတ်ပစ်ခံရသည့် အသက် (၁၉ )နှစ် အရွယ် မောင်သုတမိုးသည် တာချီလိတ်မြို့ ရှိ ဟိုတယ်တစ်ခုတွင် လုံခြုံရေးအလုပ်လုပ်နေသူတစ်ဦးဖြစ်ကြောင်း ဦးချမ်းမြေ့စော က ပြောသည်။
တာချီလိတ်မြို့သည် ထိုင်းနယ်စပ် မြို့ တမြို့ ဖြစ်ပြီး၊ မကြာခဏ သေနတ်ပစ်ခတ်မှု ဖြစ်ပွားခဲ့သည့်နေရာတခုလည်းဖြစ်သည်။
Leave a Comments