သျှမ်းပြည် မြောက်ပိုင်း ကျောက်မဲမြို့နယ် အထက်ရဲရွာရေအားလျှပ်စစ် စီမံကိန်းသွားရာလမ်းတွင် အမည်မသိ လက်နက်ကိုင်မှ သေနတ်ပစ်ခတ်မှုကြောင့် အမျိုးသားတဦး ထိမှန်ခဲ့ကြောင်း သတင်းရရှိသည်။

ယမန်နေ့ သြဂုတ် ၁၅ ရက် ည ၈နာရီက ကျောက်မဲမြို့နယ် ရေအားလျှပ်စစ် စီမံကိန်းဘက်အသွားလမ်း လွယ်စောင့်အုပ်စု ကုန်းညောင်ရွာ အနီးတွင် အမည်မသိ လက်နက်ကိုင် အဖွဲ့ ၅ ဦး က ဒေသခံ၃ ဦးစီးနင်းလာသော အဖြူရောင် Mark-2 ကားကိုတားဆီးရာ၊ ကားမရပ်ပေးသည့်အတွက် လက်နက်ငယ်ဖြင့် ၁၀ ချက်ပစ်ခတ်ခဲ့ကြောင်း သိရသည်။

ထို အဖြူရောင် Mark-2 ကားပေါ်တွင် အသက် (၃၀) အရွယ်ရှိ ယာဉ်မောင်း ဦးမျိုး၊ အသက် ၄၀အရွယ် ဦးအိုက်စော နှင့် အသက် ၂၃နှစ် အရွယ် စိုင်းနေဦးတို့စီးနင်း လိုက်ပါလာသည်ဟုသိရသည်။

“ ကားတားတာ မရပ်ပေးလို့ သေနတ်နဲ့၁၀ချက်ပစ်လိုက်တာ။ အဲ့ထဲက ဦးအိုက်စော ကိုပဲထိမှန်ခဲ့တာ။ ဂျိုင်း အောက်နားမှာ ဖောက်ဝင်ဒဏ်ရာက မစိုးရိမ်ရဘူး။ အခု ကျောက်မဲဆေးရုံမှာပါ” ဟု ကျောက်မဲမြို့ ဇီဝိတ လူမှုကူညီရေးအသင်း ဥက္ကဌ ဦးတင်မောင်သိန်းက ပြောသည်။

သေနတ်ပစ်ခံရသည့် ဦးအိုက်စော သည် ယာဖက်ဂျိုင်းအောက် ဖောက်ဝင်ဒဏ်ရာတချက်၊ ယာဖက် လက်မောင်းဖောက်ဝင် ဒဏ်ရာတချက် ရရှိထားပြီး၊ စိုးရိမ်ရသည့်အခြေအနေမဟုတ်ကြောင်း ဦးတင်မောင်သိန်းက ဆိုသည်။

သေနတ်ပစ်ခံရသူများသည် ယမန်နေ့ သြဂုတ် ၁၅ ရက်တွင် တောင်ခြေကျေးရွာ ဦးအိုက်စော၏ နေအိမ်တွင် ညအိပ်ပြီး၊ ယနေ့ သြဂုတ် ၁၆ ရက် မနက် ၁၀ နာရီခွဲ ဝန်းကျင်ကမှ ကျောက်မဲပြည်သူ့ဆေးရုံသို့ ရောက်ရှိလာ ကာ ဆေးကုသခံကြောင်းသိရသည်။

သျှမ်းပြည်မြောက်ပိုင်းကျောက်မဲခရိုင် အတွင်း တိုင်းရင်းသားလက်နက်ကိုင်များနှင့် အစိုးရ တပ်မတော် လှုပ်ရှားသည့် နယ်မြေ တခုဖြစ်ပြီး၊ ထိုဒေသတွင် အရပ်သားများ မကြာခဏ သေနတ်ပစ်ခံကြရသည်။ သို့သော် တရားခံ တကြိမ်တခါမျှ မမိခဲ့ ပေ။