ပြည်ထောင်စု ငြိမ်းချမ်းရေး ညီလာခံ (၂၁) ရာစု ပင်လုံ စတုတ္ထအကြိမ် အစည်းအဝေးကို ပြည်ထောင်စု နိုင်ငံရေး ဆွေးနွေးရေး ကော်မတီ (FPNCC ) အဖွဲ့ဝင်များ မတက်ရောက်နိုင်ကြောင်း ယနေ့ သြဂုတ် ၁၃ ရက်စွဲဖြင့်ကြေညာချက်ထုတ်လိုက်သည်။
FPNCC အဖွဲ့ဝင်များသည် တနိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်မထိုးထားသေးသည့် “ ဝ” ပြည်သွေးစည်းညီညွတ်ရေးပါတီ (UWSP)၊ ကချင်လွတ်မြောက်ရေးတပ်မတော်(KIA)၊ သျှမ်းပြည် တိုးတက်ရေးပါတီ (SSPP/SSA)၊ မိုင်းလားအဖွဲ့(NDAA)၊ ကိုးကန့်အဖွဲ့ (MNDAA)၊ တအာင်း(ပလောင်) တပ်ဖွဲ့ (TNLA) နှင့် ရခိုင်တပ်မတော် (AA) တို့ ဖြစ်ကြသည်။
ယနေ့ “ ဝ” အထူးဒေသ (၂) ပန်ခမ်းမြို့တွင် FPNCC အစည်းအဝေးပြုလုပ်ရာ၌ ထိုသို့ဆုံးဖြတ်ခဲ့ကြခြင်းဖြစ်သည်။
၂၁ ရာစု ပင်လုံညီလာခံသည် ကိုဗစ်-၁၉ ကပ်ရောဂါပြန့်ပွားနေသည့် အချိန်ကာလတွင် ကျင်းပသည့်အတွက်ကြောင့် တောင်ပေါ်နယ်စပ် ဒေသများတွင် ဆေးဝါးကုသရေး ပညာအားနည်းခြင်း၊ ဆေးဝါး ကုသမှု စက်ကိရိယာများ မပြည့်စုံ ခြင်း၊ ကိုဗစ် -၁၉ ရောဂါ ကာကွယ်ထိန်းချုပ်ရေး ကာလတွင် အသွား အလာခရီးစဉ် များ ခက်ခဲသဖြင့် ညီလာခံကို မတက်ရောက်နိုင်ခြင်းဖြစ်ကြောင်း ထုတ်ပြန်ချက်တွင်ရေးသားထားသည်။
စတုတ္ထအကြိမ် ညီလာခံ တွင် ပြည်ထောင်စု အစိုးရ မှ ရက္ခိုင့် တပ်မတော် (AA) ကိုဖိတ်ကြားခြင်း မရှိသည့်အတွက် လည်း FPNCC အနေဖြင့်များစွားစိတ်မကောင်းဖြစ်မိကြောင်း ထုတ်ပြန်ချက်တွင် ဖော်ပြထားသည်။
၂၁ ရာစု ပင်လုံ ညီလာခံကို သြဂုတ် ၁၉ ရက်တွင်စတင်ကျင်းပမည် ဟု သိရသည်။
၂၁ ရာစု ပင်လုံ တွင် အပစ်မရပ်သေးသည့် တိုင်းရင်းသားလက်နက်ကိုင် ၇ ဖွဲ့ကို ဖိတ်ကြားသွား မည်ဖြစ်သော်လည်း AA ကို ဖိတ်ကြားမည် မဟုတ်ကြောင်း သြဂုတ် (၅) ရက် နေပြည်တော် တွင် ပြုလုပ်သည့် သတင်းစာရှင်းလင်းပွဲ၌ နိုင်ငံတော် အတိုင်ပင်ခံရုံး ညွှန်ကြားရေးမှူး ဦးဇော်ဌေး ကပြောဆိုခဲ့သည်။
ထိုညီလာခံ တက်ခြင်း၊ မတက်ခြင်းသည် အပစ်မရပ်သေးတဲ့ တပ်ဖွဲ့များအတွက် ထူးခြားလာမည်မဟုတ်ကြောင်းလလည်း TNLA က သျှမ်းသံတော်ဆင့်ကို ပြောဆိုခဲ့သည်။