သျှမ်းပြည်တိုးတက်ရေးပါတီ သျှမ်းပြည်တပ်မတော် (SSPP/SSA) ဌာနချုပ်ဖြစ်သည့် ၀မ့်ဟိုင်း တွင် လာမည့်ရွေးကောက်ပွဲ၌ လွတ်လပ်စွာမဲပုံးထောင်ခွင့်ပေးမည်ဖြစ်ကြောင်းသိရသည်။
SSPP/SSA ထိန်းချုပ်နယ်မြေဖြစ်သော သျှမ်းပြည် မြောက်ပိုင်းနှင့်တောင်ပိုင်းထိစပ်သည့် ကျေးသီး၊ မိုင်းရှူး၊ တန့်ယန်း၊ မိုင်းရယ်မြို့နယ်များအတွင်း မဲပေးပိုင်ခွင့်ရှိသူ လူဦးရေ ၂ သိန်းခန့်ရှိပြီး၊ ၀မ့်ဟိုင်း တွင် ၁ သောင်းခန့်ရှိသည်။
အဆိုပါမဲပေးခွင့်ရှိသူများအားလုံး လွတ်လပ်စွာမဲပေးခွင့်ရရှိစေရေးအတွက် မဲရုံ ၃-၄ နေရာအထိ မဲပုံးထောင်ခွင့်ပေးမည်ဖြစ်ကြောင်း SSPP/SSA ပြောခွင့်ရ ဒု ဗိုလ်မှူးကြီးစိုင်းဆု က သျှမ်းသံတော်ဆင့်အားပြောသည်။
“ကျနော်တို့ထိန်းချုပ်ဒေသမှာဆိုရင် ကျနော်တို့ကောက်ထားတဲ့သန်းခေါင်စာရင်းအရ လူဉီးရေ ၂ သိန်းလောက်ရှိတယ်။ အများစုက ရွာကလူတွေပါ။ အားလုံးလွတ်လပ်စွာ မဲပေးခွင့်ရှိပါတယ်” ဗိုလ်မှူးကြီး စိုင်းဆု က ပြောသည်။
ဇူလိုင် ၂၆ မှ သြဂုတ် ရ ရက်နေ့အထိ အစိုးရ၏ပြည်ထောင်စုရွေးကောက်ပွဲကော်မရှင် ထုတ်ပြန်ချက်အရ SSPP ဌာနချုပ်အခြေစိုက်ရာ ကျေးသီးမြို့နယ်ရှိအုပ်စုများဖြစ်သော မိန်းကောဝ် ၊ နောင်ဆွမ်း၊ မိန်းနန်း၊ ၀မ်ဝပ်၊ ဟာဝမ်၊ ခေါက်စန့်၊ ခုမ်ပန်၊ ကျိန်းလိန်၊ ဖတ်းနမ်၊ ၀မ့်ဖွီးနှင့် ပန်စေ့ အုပ်စုများတွင် မဲပေးပိုင်ခွင့်ရှိသူ၆ သောင်းကျော်ရှိကြောင်းသိရသည်။
ထိုသို့ မဲပေးပိုင်ခွင့်ရှိသူများပြားသော်လည်း တချို့တဝက်မှာ တရုတ်နှင့်ထိုင်းဘက်သို့အလုပ်သွားလုပ်ကြသူများဖြစ်ကြကြောင်းဒုဗိုလ်မှူးကြီးစိုင်းဆု က သျှမ်းသံတော်ဆင့်အားပြောသည်။
၂၀၁၅ အထွေထွေရွေးကောက်ပွဲက အဆိုပါဒေသတွင် အစိုးရတပ်မတော်က အင်အားသုံးကာ SSPP/SSA အားထိုးစစ်ဆင်တိုက်ခိုက်မှုကြောင့် ရွေးကောက်ပွဲကျင်းပခွင့်မပြုကြောင်း ပြည်ထောင်စုရွေးကာက်ပွဲကော်မရှင်က ထုတ်ပြန်ကြေညာခဲ့သည်။
ထို့ကြောင့် ၂၀၁၇ ကြားဖြတ်ရွေးကောက်ပွဲမှသာ မိုင်းရှူး၊ ကျေးသီးတွင်လွှတ်တော်အမတ်များကိုရွေးချယ်မဲပေးခွင့်ရခဲ့သည်။
SSPP ထိန်းချုပ်ဒေသအတွင်းပါရှိသော်လည်းတိုက်ပွဲမရှိသဖြင့် သီပေါမြို့တွင်မူ ထိုစဉ်က မဲပေးခွင့်ရှိခဲ့ပါသည်။
သီပေါမြို့နေ စိုင်းအိုက်ဦးက – “ကျနော်တို့က SSPP ထိန်းချုပ်ဒေသထဲမှာပါ ။ ၂၀၁၅ ရွေးကောက် ပွဲတုန်းက မဲပေးရပါတယ်။ဒီနှစ်လည်းအဲလိုဘဲထင်ပါတယ်”-ဟု သျှမ်းသံတော်ဆင့်အား ပြောသည်။
၂၀၁၇ ရွေးကောက်ပွဲတွင်မူဝမ့်ဟိုင်းဌာနချုပ်အတွင်း မဲပုံး ၂ နေရာနှင့် ၀မ့်ဟိုင်းအနီးရှိ ပါခီးတွင် တနေရာ ထောင်နိုင်ခဲ့ကြောင်း ကျေးသီးမြို့နယ် ပြည်နယ်လွှတ်တော်ကိုယ်စားလှယ်စိုင်းစံမိန်းက ပြောသည်။
လာမည့် နိုဝင်ဘာလ ၈ ရက်တွင် ကျင်းပမည့် ၂၀၂၀ အထွေထွေရွေးကောက်ပွဲတွင် သျှမ်းပြည်နယ်အတွင်း ၀င်ရောက်ယှဉ်ပြိုင်မည့် နိုင်ငံရေးပါတီ ၃၈ ခုရှိကြောင်းသိရသည်။ ထိုအနက် ငွေအင်အားနှင့်လူအင်အား အများဆုံးသုံးနိုင်သည်မှာ ပြည်ထောင်စုကြံ့ခိုင်ရေး ပါတီ နှင့် လက်ရှိအာဏာရထားသော အမျိုးသားဒီမိုကရေစီအဖွဲချုပ်တို့ဖြစ်ကြောင်း နိုင်ငံရေးပါတီများအသိုင်းအဝိုင်းထံမှ သိရသည်။