သျှမ်းပြည်မြောက်ပိုင်း နမ့်ခမ်းမြို့နယ်အတွင်း RCSS/SSA နှင့် အစိုးရတပ်မတော်တို့ ယနေ့ ညနေပိုင်း တိုက်ပွဲဖြစ်ပွားကြောင်း မြေပြင်သတင်းအရ စုံစမ်းသိရသည်။
သြဂုတ် ၄ ရက် ယနေ့ ညနေ ၆ နာရီက နမ့်ခမ်းမြို့နယ် ဟတ်ဟင်ကျေးရွာ နှင့် ၄င်းနှင့်ထိကပ်လျက်ရှိသော မူစယ်မြို့နယ် မန့်ဟီးရိုး (မန့်ဟျိုး) မြို့နယ်ခွဲအတွင်းရှိ မန့်ဟောင်းတုံရွာတကြော အစိုးရ တပ်မတော် နှင့် သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည် တပ်မတော် RCSS/SSA တို့ ထိတွေ့မှု ဖြစ်ပွားခဲ့သည်ဟု တိုက်ပွဲဖြစ်ပွားသည့်နေရာအနီးရှိကျေးရွာတွင်နေထိုင်သည့် စိုင်းလျန်း ပြောသည်။
“ ညနေ ၆ နာရီ က ၂ ဖက် ပစ်ခတ်တယ်။ တိုက်ပွဲဖြစ်တယ်။ နေ့လည် က ဖြစ်တာကတော့ တပ်မတော် ဘက်က တဖက်သတ်ပစ်ခတ်နေတဲ့အသံပါ” ဟု စိုင်းလျန်း ဆိုသည်။
နမ့်ခမ်းမြို့နယ်နှင့် မန့်ဟီးရိုးမြို့နယ်ခွဲနယ်စပ် RCSS/SSA တပ်မဟာ (၇၀၁) အခြေစိုက်ရာ ဒေသဘက်သို့ အစိုးရတပ်မတော်သည် ဇူလိုင် ၃၀ ရက် က စတင်ကာ စစ်အင်အား ဖြည့်တင်းခဲ့သည်။
စစ်အင်အား ဖြည့်တင်းမှုကြောင့် ထိုဒေသတွင် နေထိုင်သည်ပြည်သူလူထုက တိုက်ပွဲဖြစ်ပွားလာမည်ကို စိုးရိမ်နေကြသည်။
ယနေ့ RCSS/SSA နှင့် အစိုးရတပ်မတော် တို့ တိုက်ပွဲနှင့် ပတ်သက်ပြီး “ ထိတွေ့မှု ကတော့ ခဏပါပဲ။ ဒါပေမယ့် အဲ့နေရာက ကျေးရွာနဲ့နီးတော့ ဒေသခံတွေက စိုးရိမ်ထိတ်လန့်ပြီး ထွက်ပြေးနေတယ်။ သတင်းက တော့ သေချာ မသိရသေးဘူး” ဟု စိုင်းလျန်းကဆိုသည်။
RCSS/SSA တပ်မဟာ (၇၀၁) အခြေစိုက်သည့် မန့်ဟီးရိုးမြို့နယ်ခွဲဘက်ကို အစိုးရတပ်မတော် တပ်သား ၄၀၀ ကျော် အင်အားဖြည့်လာကြောင်း RCSS/SSAမှ ပြောရေးဆိုခွင့်ရှိသူ ဒုဗိုလ်မှူးကြီး စဝ်အုမ်ခေး က သျှမ်းသံတော်ဆင့်ကို ပြောသည်။
“ နေ့လည်ကတိုက်ပွဲက တဖက်သတ်အသံပါပဲ။ ညနေကတော့အခြေအနေ မသိရသေးဘူး။ မြေပြင် သတင်းမတက်လာသေးဘူး။တပ်မတော် လှုပ်ရှားမှုက ထပ်တိုးလာတယ်။ စစ်အင်အားတွေလည်း ထပ်ဖြည့်နေတယ်” ဟု ဒုဗိုလ်မှူးကြီး စဝ်အုမ်ခေး က ဆိုသည်။
နမ့်ခမ်းမြို့နယ် ရွှေလီမြစ်မြောက်ဘက်ခြမ်း မန့်ဟီးရိုး မြို့နယ်ခွဲရှိ မန့်ဟောင်းတုံဘက်တွင် သျှမ်းပြည်တပ်မတော် RCSS/SSA နှင့် SSPP/SSA တို့ ၂ ဖွဲ့လုံး အခြေချလှုပ်ရှားနေကြောင်းလည်းသိရသည်။
ယခုလာမည့် သြဂုတ်လ အတွင်း စတုတ္ထ အကြိမ် ၂၁ ရာစု ပင်လုံညီလာခံ ကျင်းပမည်ဟု သြဂုတ် ၁ ရက်က နေပြည်တော်တွင် ကျင်းပသည့် အစိုးရ နှင့် တိုင်းရင်းသားလက်နက်ကိုင်အစည်းအဝေးအပြီး ကြေငြာခဲ့သည်။
သို့သော် လက်ရှိ သျှမ်းပြည်မြောက်ပိုင်း နမ့်ခမ်းမြို့နယ် အတွင်း အစိုးရတပ်မတော်မှ စစ်အင်အားအများအပြားဖြည့်တင်းကာ တနိုင်ငံလုံး အပစ်ခတ်ရပ်စဲ သဘောတူစာချုပ် (NCA) လက်မှတ်ရေးထိုးထားသည့် RCSS/SSA နှင့် တိုက်ပွဲဖြစ်ပွားနေပါသည်။
အဆိုပါ ကိစ္စနှင့် ပတ်သက်ပြီး RCSS/SSA မှ ပြောရေးဆိုခွင့်ရှိသူ ဒုဗိုလ်မှူးကြီး စဝ်အုမ်ခေး က “ သြဂုတ်လမှာ ၂၁ ပင်လုံ လုပ်မယ်လို့ကြားရပါတယ်။ အစိုးရ တပ်မတော်က စစ်အင်အားတိုးတဲ့ကိစ္စ က ရေရှည်ဆိုရင်တော့ မကောင်းဘူး။ စစ်ရေး ထိတွေ့မှုတော့မရှိပေမယ့် စစ်အင်အား ဖြည့်တဲ့အပေါ်တော့ စိုးရိမ်မှု ရှိပါတယ်” ဟု ဆိုသည်။
ယနေ့ ညနေပိုင်းဖြစ်ပွားသည့် တိုက်ပွဲနှင့် ပတ်သက်ပြီး အစိုးရတပ်မတော်နှင့် RCSS/SSA ကို သျှမ်းသံတော်ဆင့်က ကြိုးစားပြီး ထပ်မံမေးမြန်းခဲ့သော်လည်း မရရှိခဲ့ပေ။
ဇွန် ၂၅ ရက်ကစပြီး ဇူလိုင် လလယ်အထိ သျှမ်းပြည် မြောက်ပိုင်း ကျောက်မဲမြိုနယ် အတွင်း RCSS/SSA နှင့် အစိုးရ တပ်မတော်တို့တိုက်ပွဲအကြိမ် ၂၀ ကျော်ဖြစ်ပွားခဲ့ကြောင်း သိရသည်။
RCSS/SSA ၏ ရွှေလီမြစ်ဝှမ်းလွင်ပြင်အခြေစိုက် အမှတ် ၇၀၁ စစ်ဒေသအား လွန်ခဲ့သည့် ၂၀၁၃ ခုနှစ်က အစိုးရတပ်မတော်က အင်အားသုံး တိုက်ခိုက်ခဲ့သဖြင့် ဒေသခံအများအပြား စစ်ဘေးရှောင်ခဲ့ကြရသည်။
