အလုပ်အကိုင် အခွင့်အလမ်းနည်းသည့်အတွက် မူးယစ်ဆေးဝါး သုံးစွဲသူများ လာကြောင်း ပအိုဝ်းလူငယ် အစည်းအရုံးမှ သုတေသန စာတမ်း အရ သိရသည်။
အဆိုပါ သုတေသန စာတမ်းကို ဇူလိုင် (၂၇) ရက်က သျှမ်းပြည်တောင်ပိုင်း တောင်ကြီးမြို့ရှိ စိန့်ဂျိုးဇက် အောက်မေ့ဘွယ် ဓမ္မာရုံ တွင် “ အကူအညီလိုအပ်နေသူများ” ဆိုသည့် မူးယစ်ဆေးဝါး သုတေသန စာတမ်း နှင့် ပတ်သတ်ပြီး လူငယ်နှင့် စိတ်ကြွဆေးပြား (ATS)ဖိုရမ်ကိုလည်း ပြုလုပ်ခဲ့သည်။
“အဓိကကတော့ အလုပ်အကိုင်အခွင့်အလမ်း မရှိတာ ဖွံ့ဖြိုးရေးပိုင်းဆိုင်ရာတွေ မရှိတာရယ် အဲ့ကြောင့် သုံးစွဲတာဖြစ်သွားတယ်။ ၁ နှစ်ကျော် အချိန်ယူပြီး သုတေသန လုပ်ရတယ်” ဟု Program Manager နန်းခမ်းဗို က ပြောသည်။
“ အကူအညီ လိုအပ်နေသူများ” သုတေသန စာတမ်း အရ မူးယစ်ဆေးဝါး သုံးစွဲသူ အများစုသည် အသက် ၁၆ မှ ၅၀ ထိ ဖြစ်ပြီး အလုပ်အကိုင် အခွင့်အလမ်း နည်းပါးခြင်း ဖွံ့ဖြိုးမှု လိုအပ်နေသည့် ဒေသသများတွင် အများဆုံး ဖြစ်ကြောင်း သုတေသန စာတမ်းအရ သိရသည်။
ဆက်လက်ပြီး နန်းခမ်းဗို က “အပေါင်းအသင်းတွေ ပေါင်းမှားတာ။ အလုပ်အကိုင်အခွင့်အလှမ်းမရှိခြင်း ပညာပေး မရှိတာကြောင့် လမ်းမှားပြီး ရောက်သွားတာတွေ ရှိတယ်။ အဓိကကတော့ အလုပ်အကိုင်အခွင့်အလမ်း မရှိတာ ဖွံ့ဖြိုးရေးပိုင်းဆိုင်ရာတွေ မရှိတာရယ် အဲ့ကြောင့် သုံးစွဲတာဖြစ်သွားတယ်” ဟု ဆိုသည်။
အဆိုပါ သုနေတသန စာတမ်းကို ပအိုဝ်းကိုယ်ပိုင် အုပ်ချုပ်ခွင့်ရဒေသ ဟိုပုံး၊ ဆီဆိုင်၊ ပင်လောင်း နှင့် လွိုင်လင် ၊ တောင်ကြီး မြို့နယ်သို့ တနှစ်ကျော် ကွင်းဆင်းပြီး ပြုလုပ်ခဲ့ကြောင်းသိရသည်။
“ မူးယစ်ဆေးဝါးက နိုင်ငံအတွက်ရော ပအိုဝ်းဒေသအရေးအတွက်ရော အရမ်းအရေးကြီးနေတဲ့ချိန်ဖြစ်နေတယ်။” ဟု နန်းခမ်းဗို က ထပ်လောင်းပြောသည်။
ထို့ပြင် မူးယစ်ဆေးဝါးသုံးစွဲသည့် လူငယ်များကို အပြစ်ပေး အရေးယူသည်ထက် ကူညီရန်လိုအပ်ကြောင်း၊ ကြိုတင်ကာကွယ်သည့်အနေဖြင့် ပညာပေး ပြုလုပ်ရန်လိုအပ်ကြောင်း၊ ဒေသအလွှာအသီးသီး ပူးပေါင်းပါဝင်နိုင်မှသာလျှင် မူးယစ်ဆေးဝါး နွံတွင်း ရုန်းထွက်နိုင်မည် ဟုလည်း သုတေသန စာတမ်းတွင်းရေးသားဖော်ပြထားသည်။
ယခုနှစ်အတွင်း သျှမ်းပြည် မြောက်ပိုင်း ကွတ်ခိုင်မြို့နယ် အတွင်း ကျပ်သိန်း ဘီလီယံ ၄၁၄ ကျော်တန်ဖိုးရှိ မူးယစ်ဆေးဝါး နှင် မူးယစ်ဆေးဝါး ထုတ်လုပ်ရာတွင အသုံးပြုသည့် ပစ္စည်းများကို ပိုင်ရှင်မဲ့အဖြစ် သိမ်းဆည်းရမိခဲ့သည်။