သျှမ်းပြည်တောင်ပိုင်း စောင့်ကြည့်လူနာ ၂၀၀ ကျော် တွင် ကိုဗစ်-၁၉ ပိုးရှိ၊ မရှိ ရန်ကုန်အမျိုးသားကျန်းမာရေး ဓါတ်ခွဲဌာန သို့ ထပ်မံ ပို့ဆောင်စစ်ဆေးထားကြောင်း စုံစမ်းသိရှိရသည်။
ယနေ့ ဇူလိုင် ၂၈ ရက်တွင် သျှမ်းပြည်တောင်ပိုင်းရှိ Quarantine Center မှ စောင့်ကြည့်လူနာ စုစုပေါင်း ၂၁၅ ဦး ရှိပြီး ဓါတ်ခွဲ နမူနာ ပို့ဆောင် စစ်ဆေးထားကြောင်း ပြည်နယ် အထူးရောဂါ နှိမ်နင်းရေး လက်ထောက်ညွှန်ကြားရေးမှူး ဒေါက်တာဇဝနကို ထံမှ သိရသည်။
“သျှမ်းတောင်မှာရှိတဲ့ မြို့နယ် ၁၂ ခုရဲ့ ဓါတ်ခွဲနမူနာ ၂၁၅ ဦး ကို ပို့ဆောင်စစ်ဆေးထားပါတယ်။” ဟု ဒေါက်တာဇဝနကို က ပြောသည်။
ထိုမြို့နယ် ၁၂ ခုမှာ ကျေးသီး ၈ ဦး၊ ညောင်ရွှေ ၃၀ ၊ တောင်ကြီး ၉၈ ၊ မောက်မယ် ၃ ဦး၊ ကွန်ဟိန်း ၇ ဦး၊ နမ့်စန် ၈ ဦး၊ ဖယ်ခုံ ၁ ဦး ၊ မိုးနဲ ၅ ဦး၊ မိုင်းပန် ၅ ဦး၊ ရပ်စောက် ၃၅ ဦး၊ လင်းခေး ၁၃ ဦး၊ လွိုင်လင် ၂ ဦး စသည်တို့ ဖြစ်သည်။
ကရင်ပြည်နယ် မြဝတီမှတစ်ဆင့် သျှမ်းပြည်အတွင်းသို့ မေ ၂၇ ရက်မှ ဇူလိုင် ၂၇ အထိ ထိုင်းနိုင်ငံမှ ပြန်၀င်လာသူ ရွှေ့ပြောင်းအလုပ်သမား ၂၅၈၃ ဦး ရှိကြောင်း သျှမ်းပြည်နယ် အစိုးရ အဖွဲ့မှ လူမှုရေး ဝန်ကြီး ဒေါက်တာမျိုးထွန်း ထံ သိရသည်။
အဆိုပါပြန်၀င်လာသူများအား ဓါတ်ခွဲနမူနာ စစ်ဆေးပေးရာတွင် လက်ရှိ ဓါတ်ခွဲနမူနာယူရန် ၅၂၂ ဦး ကျန်ရှိနေသေးကြောင်း ဒေါက်တာမျိုးထွန်း ထံ သိရသည်။
သျှမ်းပြည်နယ်တွင် ကိုဗစ်-၁၉ အတည်ပြု လူနာ စုစုပေါင်း (၁၀) ဦးရှိပြီး လူနာ (၁၀) ဦး စလုံး ဆေးရုံမှ ဆင်းခွင့်ရခဲ့ကြောင်း သျှမ်းပြည်နယ် အစိုးရထံ မှ စုံစမ်းသိရှိရသည်။
မြန်မာနိုင်ငံတွင် ကိုဗစ် – ၁၉ အတည်ပြု လူနာ (၃၅၀) ဦး၊ ပြန်လည် သက်သာလာသူ( ၂၉၂)ဦး ၊ သေဆုံးသူ (၆) ဦး နှင့် ယခု လက်ရှိလူနာ (၅၂ ) ဦး ကျန်ရှိကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။
