သျှမ်းပြည်မြောက်ပိုင်း ကျောက်မဲမြို့နယ်တွင် တရားမျှတမှိုရရှိရေး ငြိမ်းချမ်းစွာ စီတန်းလှည့်လည်ခဲ့ကြသူများ၏ ဦးဆောင်သူ ၃ ဦး ကို ရဲစခန်း မှ အမှုဖွင့်ထားသော်လည်း ယနေ့ချိန်ထိ အမှုရင်မဆိုင်ရသေးကြောင်း စုံစမ်းသိရသည်။

ငြိမ်းချမ်းစွာ စီတန်းလှည့်လည်ရာတွင် ဦးဆောင်သူ ၃ ဦး ကို ဇူလိုင် ၁၀ ရက်နေ့မှစပြီး ကျောက်မဲ ရဲစခန်းမှ အမှုဖွင့်ထားသော်လည်း ယနေ့ချိန်ထိ အမှုရင်မဆိုင် ရသေးကြောင်း ကျောက်မဲ မဲဆန္ဒနယ် အမှတ်(၁) လွှတ်တော်အမတ် စိုင်းထွန်းဝင်း ကပြောသည်။

“ဆန္ဒပြတဲ့နေ့ကတည်းက ၁၅ ရက်အတွင်း လာရောက်ပြီးတော့ ဒီအမှုနဲ့ ရင်ဆိုင်ရမှာ။ အခုတော့ တရားစွဲခံရတဲ့သူတွေက အမှုတွေ မရင်ဆိုင်ရသေးဘူး” ဟု စိုင်းထွန်းဝင်း ကပြောသည်။

သတ်မှတ်ထားသည့် ၁၅ ရက်အတွင်း အမှုရင်မဆိုင် ရပါက လုပ်ထုံးလုပ်နည်းအတိုင်း ရဲစခန်းမှ ဖမ်းဝရမ်းထုတ်ရမည်ဖြစ်ကြောင်း စိုင်းထွန်းဝင်း ကပြောသည်။

“ဇူလိုင် ၁၀ ရက်နေ့ကနေ စတယ် အခုက ၂၃ ရက်နေ့ဆိုတော့ သူက ၁၃ ရက်ရှိသွားပြီ။ ၁၅ ရက်ပြည့်ပြီး အမှု မလာယှဉ်ပြိုင်ဘူးဆိုရင် ရဲစခန်းကနေ ဝရမ်းပြေး ထုတ်မယ်။ ဒါပေမယ့် မနက်ဖြန် ၁ ရက် စောင့်ကြည့်ဉီးမယ်။” ဟု စိုင်းထွန်းဝင်း ကပြောသည်။

ကျောက်မဲမြို့နယ် ပန်လော့ကျေးရွာအုပ်စုဝင် ပန်ကျင်ရွာသား အား ဇွန်လ ၂၉ ရက်နေ့က တပ်မတော် စစ်ကြောင်း ပစ်ခတ်မှုကြောင့် ရွာသား တစ်ဦး သေဆုံးခဲ့ရပြီး နှစ်ဦး ဒဏ်ရာရရှိမှုအပေါ် တရားမျှတမှု ရှိစေရန် ဇူလိုင်လ ၁၀ ရက်နေ့က ကျောက်မဲဒေသခံ သျှမ်းလူထု တသောင်းကျော် ငြိမ်းချမ်းစွာ စီတန်းလှည့်လည် ဆန္ဒထုတ်ဖော်ခဲ့သည်။

ထိုဆန္ဒထုတ်ဖော်ရာတွင် ဦးဆောင်သူ ၃ဦး ကို ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခွင့်ဆိုင်ရာ ဥပဒေ ပုဒ်မ ၁၉ နှင့် ကူးစက်ရောဂါ ကာကွယ်နှိမ်နင်းရေး ဥပဒေ ပုဒ်မ ၁၈ တို့ဖြင့် သက်ဆိုင်ရာ ဌာနများမှ အမှုဖွင့် အရေးယူဆောင်ရွက်သွားမည် ဟု တပ်မတော် သတင်းမှန် ပြန်ကြားရေးမှ ဇူလိုင် ၁၀ ရက်ညနေပိုင်းတွင် ထုတ်ပြန်ထားခဲ့သည်။

ထို ကျေးရွာသားတဦး သေနတ်ပစ်ခတ်ခံရမှု နှင့် နှစ်ဦး ဒဏ်ရာရရှိမှုတို့ အပေါ် တရားမျှတမှု ရရှိစေရန် သျှမ်းလူထုများ ဆန္ဒထုတ်ဖော်ပြီးသည့်နောက် နေပြည်တော် မှ ညွှန်ကြားချက်အရ ဇူလိုင် ၁၅ ရက်က ကျောက်မဲမြို့နယ်အတွင်း ဟိုင်းကွီကျေးရွာအုပ်စု ပန်ကျန်ရွာတွင် အရှေ့မြောက်ပိုင်းတိုင်း စစ်ဌာနချုပ် လက်အောက်ခံ တပ်မှူး အဆင့်ရှိ အရာရှိများ နှင့် မြို့နယ် အုပ်ချုပ်ရေးမှူး တို့ စုံစမ်းစစ်ဆေးရေးအဖွဲ့များ နှင့် အတူ ရွာအတွင်း ဝင်ရောက်ပြီး ဖြစ်စဉ်များ သွားရောက် စုံစမ်းကြောင်း သိရသည်။

အဆိုပါ ကိစ္စနှင့် ပတ်သက်ပြီး လွှတ်တော်ကိုယ်စားလှယ် စိုင်းထွန်းဝင်း က “သူတို့ ရွာတွေကို သွားတဲ့ချိန်မှာ သူတို့ အားနည်းချက်တွေ အများကြီးရှိတယ်။ စစ်ကြောင်းတွေက လုံခြုံရေး ယူတဲ့ချိန်မှာ သေနတ်ပေါက်သွားတဲ့ ကိစ္စတို့ ရှိတဲ့အတွက်ကြောင့်မလို့ ပြည်သူတွေကလည်း ကြောက်လန့်ပြီး တိမ်းရှောင်နေတာတွေရှိတယ်။ သူတို့ရဲ့ အောက်ခြေ စုံစမ်းစစ်ဆေးရေး ဖြစ်စဉ်တွေက အဆင်မပြေမှုတွေ ရှိခဲ့တယ်” ဟု ကျောက်မဲ လွှတ်တော်အမတ် စိုင်းထွန်းဝင်း ကပြောသည်။

ထိုစုံစမ်းစစ်ဆေးမှုသည် တပ်ဘက်မှ ပွင့်လင်းမြင်သာမှု ရှိရန်လိုအပ်ကြောင်း လက်နက်ကိုင်ပြီး ကျေးရွာအတွင်းဝင်ပါက ဒေသခံများ ထိတ်လန့်မှု ဖြစ်နိုင်ပြီး၊ တောထဲတွင် လှုပ်ရှားနေသည့် တိုင်းရင်းသား လက်နက်ကိုင်များနှင့်လည်း ထိတွေ့မှုဖြစ်နိုင်သည့် ဒေသခံများက ပြောဆိုကြသည်။