သျှမ်းပြည်မြောက်ပိုင်း ကျောက်မဲမြို့နယ် တွင် RCSS/SSA နှင့် အစိုးရတပ်မတော် ကြား တစ်လအတွင်း တိုက်ပွဲ အကြိမ် (၂၀) ထက်မနည်း ဖြစ်ပွားခဲ့ကြောင်း စုံစမ်းသိရှိရသည်။
ဇွန်လ နောက်ဆုံးပတ်မှ စတင်ပြီး ဇူလိုင် လအထိ ၂ ဦး ၂ ဘက်ကြား တိုက်ပွဲအကြိမ် ၂၀ ထက်မနည်း ဖြစ်ပွားခဲ့ကြောင်း RCSS/SSA ၏ ပြောရေးဆိုခွင့် ရှိသူ ဒုဗိုလ်မှူးကြီး စဝ်အုမ်ခေး က ပြောသည်။
“အကြိမ် ၂၀ ထက်မနည်း အစိုးရတပ်မတော် နဲ့ ထိခိုက်မှု ဖြစ်ပွားခဲ့တယ်။ RCSS/SSA တပ်ဖွဲ့ ရှိတဲ့ နေရာတွေ အစိုးရတပ်မတော်ဘက်က လှုပ်ရှားလာရင်း ထိတွေ့မှု ဖြစ်ပွားခဲ့တာပါ။ NCA စာချုပ်ကို ချိုးဖောက်ရာ ရောက်တာပေါ့နော်။” ဟု ဒုဗိုလ်မှူးကြီး စဝ်အုမ်ခေး က သျှမ်းသံတော်ဆင့် ကိုပြောသည်။
ထိုတိုက်ပွဲဖြစ်ပွားရာ နေရာသည် ကုန်းညောင်ကျေးရွာ၊ နမ့်မော်ဘီလူးကျေးရွာ၊ နမ့်ဟန်ခိန်ရွာ၊ရေဆန် ကျေးရွာ၊ ဟိုဖိုင်၊ဟိုင်းကွီ၊ နမ့်ဝါ့ နှင့် ပန်ကျင် ကျေးရွာတို့ ရွာသားများ စစ်ဘေးရှောင် နေရကြောင်း သိရသည်။
“ကျနော်တို့ဘက် ထိခိုက် ဒဏ်ရာ ရတဲ့သူတော့ မရှိဘူး။ သူတို့ဘက်က သေသေချာချာ သိရတာတော့ ကျဆုံးတာ ၃ ယောက်လောက်ရှိတယ်လို့ သိရတယ်” ဟု ဒုဗိုလ်မှူးကြီး စဝ်အုမ်ခေး ကပြောသည်။
ဇွန် ၂၅ ရက်မှ စတင်ပြီး တိုက်ပွဲဖြစ်ပွားခဲ့ရာ ဇူလိုင် (၂၁) ရက် မှ တိုက်ပွဲ ငြိမ်သက်သွားကြောင်း ဒုဗိုလ်မှူးကြီး စဝ်အုမ်ခေး က ပြောသည်။
ကျောက်မဲအတွင်း ဖြစ်ပွားသည့်တိုက်ပွဲကြောင့် စစ်ဘေးရှောင်များ (၁၀၀၀) ထက်မနည်း ထွက်ပြေးတိမ်းရှောင်ခဲ့ရပြီး၊ လက်ရှိမှာ တိုက်ပွဲငြိမ်နေသဖြင့် နေရပ်သို့ပြန်လည်သွားပြီဖြစ်ကြောင်း ကျောက်မဲ မဲဆန္ဒနယ်အမှတ်(၁) စိုင်းထွန်းဝင်း ကပြောသည်။
“ကျောက်မဲ အခြေနေတော့ တည်ငြိမ်နေတယ်။ တစ်လ နီးပါး ဖြစ်တဲ့ တိုက်ပွဲက ၂ ကြိမ်လောက် ကြီးကြီးကျယ်ကျယ် ဖြစ်သွားတုန်းကတော့ စစ်ဘေးရှောင် တစ်ထောင်ကျော် လောက်တော့ ရှိသွားတယ်” ဟု စိုင်းထွန်းဝင်း က ပြောသည်။
တိုက်ပွဲဖြစ်ပွားသည့် ပြည်သူ မထိခိုက်ရန် အတွက် အတတ်နိုင်ဆုံးရှောင်ရှားပေးရန်၊ ကျေးရွာရှိ နေအိမ်များ၊ ပြည်သူများကို အန္တရာယ်မပေးရန် နှစ်ဖက် လက်နက်ကိုင်တပ်ဖွဲ့ ကို မေတ္တာရပ်ခံချင်ကြောင်း စိုင်းထွန်းဝင်း က ပြောဆိုလိုက်သည်။
“ တိုက်ပွဲဆိုတာ တစ်ဖက်တည်း တိုက်လို့မရဘူး။ နှစ်ဖက် ဖြစ်တယ်ဆိုတာက လက်နက်ရှိတဲ့သူ အချင်းချင်း တိုက်တာလေ။ လက်နက်ကိုင် ၂ ဖက်စလုံးကို မေတ္တာရပ်ခံချင်တာ ပြည်သူတွေ မထိခိုက်ဖို့ ၊ ကျေးရွာတွေ အိမ်ခြေတွေ ပြည်သူတွေ အတတ်နိုင်ဆုံး ရှောင်ရှားပြီးတော့ အန္တရာယ်မပေးဖို့ ပြောချင်ပါတယ်” ဟု စိုင်းထွန်းဝင်း ကတောင်းဆိုလိုက်သည်။
ဇွန် ၂၅ရက်မှ ဇူလိုင်လ ဆန်းပိုင်းထိ အစိုးရတပ်မတော်နှင့် RCSS/SSA တို့သည် တိုက်ပွဲ ပြင်းထန်ခဲ့ပြီး၊ အစိုးရစစ်တပ်မှ ရွာအတွင်းဝင်ရောက်ကာ ဒေသခံရွာသားကို သေနတ်ပစ်သတ်မှု ၊ ရိုက်နှက်မှုများပြုလုပ်ခဲ့ကြောင်းသိရသည်။
အစိုးရတပ်မတော်မှ ကျူးလွန်ခဲ့သည့် ကိစ္စများကို ကျောက်မဲမြို့နယ် သျှမ်းလူထုများက တရားမျှတမှု ရရှိရန်အတွက် ဇူလိုင် ၁၀ ရက်နေ့က ဒေသခံ တသောင်းကျော် စီတန်းလှည့်လည် ဆန္ဒထုတ်ဖော်ခဲ့သည်။
RCSS/SSA သည် NCA လက်မှတ်ရေးထိုးထားသော အပစ်ရပ်တိုင်းရင်းသားလက်နက်ကိုင်တပ်ဖွဲ့တဖွဲ့ဖြစ်ပြီး အစိုးရ ၊ စစ်တပ် တို့နှင့် ငြိမ်းချမ်းရေးဖော်ဆောင်ရေး ၊ ပြည်ထောင်စုတည်ဆောာက်ရေးတို့တွင် အစဉ်တစိုက်ပါဝင်လာခဲ့သည့်အဖွဲ့လည်းဖြစ်သည်။
အစိုးရတပ်မတော်သည် သြဂုတ်လကုန်အထိ တဖက်သတ်အပစ်ရပ်ထားကြောင်းလည်း တရားဝင်ထုတ်ပြန်ကြေငြာထားသည်။
Leave a Comments