ကိုဗစ်-၁၉ ကာလ မြန်မာ-ထိုင်း နယ်စပ် ဂိတ်များပိတ်ထားဆဲဖြစ်သော်လည်း တရားမဝင် ခိုးဝင်၊ ခိုးထွက်မှုများ တနေ့ ထက် တနေ့ များလာကြောင်း စုံစမ်းသိရသည်။

ကိုဗစ် -၁၉ ကူးစက်ရောဂါကြောင့် မတ် ၂၃ ရက် ကစပြီး ယနေ့အထိ မြန်မာ-ထိုင်း ချစ်ရေး တံတားအမှတ် ၁ နှင့် တခြား နယ်စပ်ဂိတ်များ ပိတ်ထားသည်မှာ ၄ လနီးပါး ကြာခဲ့ပြီဖြစ်သည်။

နယ်စပ်ဂိတ်များပိတ်ထားသဖြင့် အရေးပေါ် ၀င်ထွက်သွားလာလိုသည့် ရွှေ့ပြောင်းအလုပ်သမားများကို ပွဲစားများက အခကြေးငွေယူဆောင်ကာ မယ်ဆိုင်ချောင်းမှ တဆင့် ခိုးဝင် ခိုးထွက် ပြုခိုင်းကြောင်း တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စော က ပြေသည်။

“ပွဲစားတွေကတော့ ပိုက်ဆံ ရတော့ လိမ်ခေါ်သွားတာ ရှိတာပေါ့။ အဲ့ဒါတွေ မယုံပါနဲ့ မေးလိုက်ရင် ပွဲစားတွေ လိမ်ခေါ်သွားတာများတယ်။ ပြီးလို့ရှိရင် ချောင်းနားရောက်ရင် ထားခဲ့တာ။ ဟိုဘက်က တာဝန်ရှိသူတွေက ဖမ်းမိရော” ဟု ဦးချမ်းမြေ့စော က သျှမ်းသံတော်ဆင့် ကိုပြောသည်။

ထိုနည်းအတူ မယ်ဆိုင်ဘက်မှ တာချီလိတ်ဘက်သို့ တရားမဝင် ချောင်းကူးလာခြင်းကြောင့် တတိယအကြိမ်မြောက် အမျိုးသား တစ်ဦး ကို ဖမ်းဆီးရမိပြီး ဇူလိုင်လ ၂၀ ရက်နေ့က အမှုဖွင့်ထားကြောင်း သိရသည်။

“ကျန်းမာရေး ကူးစက် ဥပဒေ နဲ့ အမှုဖွင့်ထားတယ်။ လဝက နဲ့လည်း တရားစွဲထားတယ်။ အခု တော့ တာချီလိတ် ရဲစခန်းမှာပါ ” ဟု ဦးချမ်းမြေ့စော က ပြောသည်။

ထို့အတွက် တဖက်မှတဖက်သို့ ကူးနိုင်ရေးအတွက် ရွှေ့ပြောင်းအလုပ်သမားများ အနေဖြင့် အယုံမလွယ်ကြရန် ဉီးချမ်းမြေ့စောက သတိပေးပြောဆိုလိုက်သည်။

“ပွဲစားတွေ လာပြီး ဆက်သွယ်လာလို့ရှိရင် မယုံပါနဲ့လို့ ပွဲစားတွေ ဆက်သွယ်လာလို့ရှိရင် ကျနော်တို့ကို သတင်းပေးပါ” ဟု ၄င်းကဆိုပါသည်။

ကိုဗစ်-၁၉ ကာကွယ်ထိန်းချုပ်ကာလ ၄ လအတွင်း၀င်လာပြီဖြစ်သဖြင့် ရွှေ့ပြောင်းအလုပ်သမားများ အလုပ်လက်မဲ့ဖြစ်ကာ ၀မ်းရေးပြသနာ ဖြေရှင်းရန်အတွက် ထိုင်းနိုင်ငံ (သို့မဟုတ်) မြန်မာနိုင်ငံသို့ အလုပ်ပြန်လုပ်ရန် မယ်ဆိုင်ချောင်းမှ တဆင့် ခိုးဝင်၊ ခိုးထွက်မှုများလုပ်လာရသည့် သဘောဖြစ်ကြောင်း တာချီလိတ်ဒေသခံ စိုင်းတစ်က ပြောသည်။

“ လရှည်ကြာတော့ ဒီဘက်မှာနေတဲ့သူတွေကလည်း အလုပ်လက်မဲ့တွေ ဖြစ်၊ ဝင်ငွေမရှိတော့ တဖက်နိုင်ငံကို မရရတဲ့နည်းတဲ့ ခိုးသွားကြမှာပဲ။ ပွဲစားတွေကလည်း ညာခေါ်မှာပဲ။ ဒါကို မယုံကြည်စေချင်ဘူး” ဟု စိုင်းတစ်က ပြောသည်။

နှစ်နိုင်ငံ နယ်စပ်တလျှောက် တရားမဝင် ဖြတ်ကူးမှုများပြားလာသည့်အတွက် ထိုင်းနိုင်ငံ မယ်ဆိုင် ဘက်ခြမ်း မှ လုံခြုံရေးတာ၀န်ရှိသူများက နယ်စပ်တလျှောက် ကင်းလှည့်ခြင်း၊ သံဆူးကြိုး ဖြင့် ကာရံခြင်း၊ ဒရုန်းများဖြင့် ပျံသန်းကင်းလှည့်ခြင်းများ လုပ်ဆောင်လျှက်ရှိပြီး တာချီလိတ်ဘက်တွင်လည်း တရားမဝင် ဖြတ်သန်းလာသူများကို ၇ နေရာ စောင့်ကြပ်စစ်ဆေးခြင်းလုပ်ဆောင်နေကြောင်း သိရသည်။

တာချီလတ် နှင့် မယ်ဆိုင် နယ်စပ် တရားမဝင် ဖြတ်သန်းခိုး၀င်မှုများကြောင့် ဧပြီ ၁၈ မှ ဇူလိုင် လဆန်းပိုင်းအထိ မယ်ဆိုင်ဘက်တွင် မြန်မာ နိုင်ငံသား ၁၁၃ ဦးဖမ်းဆီး အရေးယူခံထားရပြီး တာချီလိတ်ဘက်တွင်လည်း ခိုး၀င်လာသူ မြန်မာနိုင်ငံသား ၃ ဦး ဖမ်းဆီးရမိထားကြောင်း သိရသည်။