မြန်မာ-ထိုင်းနယ်စပ်တလျှောက် ထိုင်းစစ်တပ်နှင့် ‘ဝ’တပ်ဖွဲ့ UWSA အကြား အငြင်းပွားနေသည့် နယ်စပ်ပြဿနာကို နှစ်နိုင်ငံ နယ်ခြားကော်မတီမှတဆင့် ဆွေးနွေးသွားမည်ဖြစ်ကြောင်း စစ်ကောင်စီက ပြောဆိုလိုက်သည်။

ယမန်နေ့ (ဒီဇင်ဘာလ ၁၆ ရက်) တွင် စစ်ကောင်စီ ပြောရေးဆိုခွင့်ရှိသူ ဗိုလ်ချုပ် ဇော်မင်းထွန်းက ထိုင်းနိုင်ငံ၌ ကျင်းပမည့် မြန်မာ့အရေး အလွတ်သဘော တွေ့ဆုံဆွေးနွေးပွဲနှင့် ပတ်သက်ပြီး မီဒီယာများကို ဖြေကြားစဉ် ထိုင်းစစ်တပ်နှင့် ‘ဝ’တပ်ဖွဲ့ UWSA အကြား အငြင်းပွားနေသည့် နယ်စပ်ပြဿနာကို နှစ်နိုင်ငံ နယ်ခြားကော်မတီမှတဆင့် ဆွေးနွေးသွားမည်ဖြစ်ကြောင်း ထည့်သွင်းပြောဆိုခဲ့သည်။

“ဝ နဲ့ ဖြစ်နေတဲ့ကိစ္စ ဒီဟာက သီးခြားကိစ္စ ဖြစ်ပါတယ်။ ဒါနဲ့ပတ်သက်ပြီးတော့ မြန်မာနဲ့ ထိုင်းကြားမှာ နယ်ခြားကော်မတီ အဆင့်ဆင့် ဖွဲ့စည်းထားတာ ရှိပါတယ်။ TBC ၊ RBC အစရှိသဖြင့် လစဉ်လည်း ဆွေးနွေးဆောင်ရွက်လျက် ရှိပါတယ်။ ဒီကိစ္စတွေကတော့ နယ်ခြားဒေသ ကော်မတီတွေရဲ့ ပုံမှန် အစည်းအဝေးတွေကနေ တဆင့်ပဲ ဆောင်ရွက်သွားနိုင်မှာ ဖြစ်ပါတယ်”ဟု စစ်ကောင်စီ ပြောရေးဆိုခွင့်ရှိသူ ဗိုလ်ချုပ် ဇော်မင်းထွန်းက ပြောသည်။

ပြီးခဲ့သည့် ဒီဇင်ဘာလ (၁၀) ရက်တွင် မြန်မာ-ထိုင်းနယ်စပ် မိုင်းတုံမြို့နယ်အတွင်း ထိုင်းစစ်တပ်နှင့် UWSA တောင်ပိုင်း (၁၇၁) စစ်ဒေသ အကြား နယ်နိမိတ်အငြင်းပွားနေသည့် နယ်စပ်အနီး မုံးထမြို့နှင့် ပါချီးနယ်စပ်ဂိတ်ဘက်သို့ စစ်ကောင်စီ၏ တြိဂံတိုင်းစစ်ဌာနချုပ် တိုင်းမှူးကိုယ်တိုင် သွားရောက်စစ်ဆေးခဲ့ပြီးနောက် ယခုပြောကြားချက် ထွက်ပေါ်လာခြင်း ဖြစ်သည်။

မြန်မာ-ထိုင်းနယ်စပ်ရှိ နယ်နိမိတ်ပြဿနာများနှင့် ပတ်သက်ပြီး နိုင်ငံအချင်းချင်း ဆွေးနွေးရမည့် ကိစ္စဖြစ်ပြီး နိုင်ငံတော်ခေါင်းဆောင်များကို သတင်းပို့ထားကြောင်း ‘ဝ’ပြင်ပဆက်ဆံရေး တာဝန်ခံ ဦးညီရမ်းက ‘ဝ’လူငယ့်အသံကွန်ရက် မီဒီယာသို့ နိုဝင်ဘာလ (၂၅) ရက်တွင် ဖြေကြားထားသည်။

ထိုင်းစစ်တပ်နှင့် UWSA တောင်ပိုင်း (၁၇၁) စစ်ဒေသမှ ကိုယ်စားလှယ်များအကြား နိုဝင်ဘာလအတွင်း တွေ့ဆုံဆွေးနွေးခဲ့စဉ် ထိုင်းနိုင်ငံ မယ်ဟောင်ဆောင်ခရိုင်ဘက် ထိစပ်နေသည့် နယ်နိမိတ်မျဉ်းပေါ်ရှိ UWSA တပ်စခန်း (၉) နေရာကို ဒီဇင်ဘာလ (၁၈) ရက် နောက်ဆုံးထား တပ်ဆုတ်ခွာပေးရန် ထိုင်းစစ်တပ်ဘက်မှ တောင်းဆိုခဲ့ကြောင်း ထိုင်းနှင့် မြန်မာ မီဒီယာများတွင် ဖော်ပြခဲ့ကြသည်။

လာမည့် ဒီဇင်ဘာလ (၁၉၊ ၂၀) ရက်တို့တွင် ထိုင်းနိုင်ငံ ဘန်ကောက်မြို့၌ ကျင်းပမည့် မြန်မာ့အရေး အလွတ်သဘော ဆွေးနွေးပွဲများသို့ စစ်ကောင်စီ နိုင်ငံခြားရေးဝန်ကြီး ဦးသန်းဆွေ တက်ရောက်မည်ဖြစ်ပြီး နယ်စပ်ကိစ္စ၊ နယ်စပ်ဖြတ်ကျော် မှုခင်းကိစ္စများကို ဆွေးနွေးမည်ဟု စစ်ကောင်စီ ပြောရေးဆိုခွင့် ရှိသူက ပြောဆိုသည်။

ထိုင်းနိုင်ငံမှ ဦးဆောင်ကျင်းပမည့် မြန်မာ့အရေး အလွတ်သဘော ဆွေးနွေးပွဲကို မြန်မာနှင့် အိမ်နီးချင်းနိုင်ငံ (၆) နိုင်ငံတို့ ပါဝင်မည်ဖြစ်ကြောင်း ထိုင်းနိုင်ငံခြားရေးဝန်ကြီးဌာနက သတင်းထုတ်ပြန်ထားသည်။