သျှမ်းပြည်မြောက်ပိုင်း ကျောက်မဲမြို့နယ်တွင်း ရွာသားသေဆုံးမှု ၊ ထိခိုက်ဒဏ်ရာရမှု နှင့် ပတ်သက်ပြီး အစိုးရတပ်မတော်ဘက်မှ သွားရောက် စုံစမ်း စစ်ဆေးခဲ့ကြောင်း သိရသည်။

ဇူလိုင် ၁၅ ရက် ယနေ့မနက်ပိုင်းက ကျောက်မဲမြို့နယ်အတွင်း ဟိုင်းကွီကျေးရွာအုပ်စု ပန်ကျန်ရွာမှာ အရှေ့မြောက်ပိုင်းတိုင်း စစ်ဌာနချုပ် လက်အောက်ခံ တပ်မမှူး အဆင့်ရှိ အရာရှိများနှင့် မြို့နယ်အုပ်ချုပ်ရေးမှူး တို့ စုံစမ်းစစ်ဆေးရေးအဖွဲ့များ နှင့် အတူ ရွာအတွင်ဝင်လာပြီး ဖြစ်စဉ်များ လာရောက် စုံစမ်းကြောင်း သိရသည်။

“မနေ့က စစ်ကြောင်း ဝင်သွားရတဲ့ အကြောင်းရင်းက သူတို့ လူကြီးကွင်းဆင်းပြီး ဖြစ်စဉ်တွေကို သွားစစ်ဆေးမလို့ အဲ့ကြောင့်မလို့ လုံခြုံရေး ယူရခြင်းဖြစ်တယ်လို့ သူတို့က အဲ့လိုပြောတယ်” ဟု မျက်မြင်တွေ့ခဲ့သည့် ကျောက်မဲမြို့နယ် ဟိုင်းကွီ ကျေးရွာအုပ်စု မှ အမျိုးသား တစ်ဦး ကပြောသည်။

ထို စုံစမ်းစစ်ဆေးရေးအဖွဲ့ သွားရောက်စစ်ဆေးရာမှာ လွှတ်တော်အမတ် မလိုက်ခဲ့ကြောင်း သိရသည်။

“သူတို့ ခေါ်တယ်။ ဒါပေမယ့် မနေ့က သူတို့ကို တောင်းဆိုတာ တစ်ခုရှိတယ်။ မီဒီယာပါ ခေါ်မယ်ပေ့ါနော်။ ကျနော် တို့လည်း လိုက်ထိုင် နားထောင်မယ် ခင်ဗျား တို့ ပြောတဲ့ဟာကို ဆိုတော့ သူတို့က အဲ့လိုတော့ မရဘူးလို့ ပြောတယ်” ဟု ကျောက်မဲ မြို့နယ် မဲဆန္ဒနယ် အမှတ်(၁) စိုင်းထွန်းဝင်း က သျှမ်းသံတော်ဆင့် ကိုပြောသည်။

တပ်မမှူး အဆင့်ရှိ အရာရှိများက တပ်လုံခြုံရေးနှင့်အတူ ရွာထဲ ကွင်းဆင်း စစ်ဆေးရာ ၊ လက်နက် များပါသဖြင့် မလိုက်သွားကြောင်း စိုင်းထွန်းဝင်း ကပြောသည်။

“လုံခြုံရေး ထားချင်ရင်လည်း သေနတ်မပါနဲ့ပေါ့။ သေနတ်တွေ ကိုင်ပြီး ဝင်သွားတာ။ အဲ့လိုဆိုရင်တော့ မလိုက်ဝင်ချင်ဘူး။ သူတို့ သွားမယ့် လမ်းကြောကို လမ်းရှင်းပြီးတော့ ဝင်သွားတာပေါ့။ အဲ့ဒါကတော့ သူတို့ လုံခြုံရေး တပ်တွေပေါ့နော်။” လွှတ်တော်အမတ် စိုင်းထွန်းဝင်း ကပြောသည်။

အစိုးရ တပ်မတော် မှ ကျောက်မဲမြို့နယ် အတွင်း အရပ်သားတဦးအား သေနတ်ပစ်ခတ်မှုနှင့် အရပ်သားတဦးအားရိုက်နှက်မှုတို့ကို သွားရောက် စစ်ဆေးရာတွင် လက်နက်များပါဝင်ခြင်း၊ လွှတ်တော်ကိုယ်စားလှယ်များ မလိုက်ပါခြင်းတို့ကြောင့် ပွင့်လင်းမြင်သာမှု မရှိနိုင်ကြောင်း ကျောက်မဲဒေသခံများက ပြောဆိုလိုက်သည်။

“ တပ်က ကွင်းဆင်းစစ်ဆေးတာ လက်နက်တွေပါတယ်။ နောက်လုံခြုံရေး အရဆိုပြီး တပ်တွေကို အင်အားဖြည့်တယ်။ လွှတ်တော်ကိုယ်စားလှယ်တွေ မပါသွားဘူး။မီဒီယာတွေ မပါဘူးဆိုရင်တော့ ပွင့်လင်းမြင်သာမှုမရှိဘူး” ဟု ကျောက်မဲတွင်နေထိုင်သည့် စိုင်းကျော် က ပြောသည်။

ထို စုံစမ်းစစ်ဆေးမှုသည် တပ်ဘက်မှ ပွင့်လင်းမြင်သာမှု ရှိရန်လိုအပ်ကြောင်း၊ လက်နက်ကိုင်ပြီး ကျေးရွာအတွင်းဝင်ပါက ဒေသခံများ ထိတ်လန့်မှု ဖြစ်နိုင်ပြီး၊ တောထဲတွင် လှုပ်ရှားနေသည့် တိုင်းရင်းသားလက်နက်ကိုင်များနှင့်လည်း ထိတွေ့မှု ဖြစ်နိုင်သည် ဟုလည်း စိုင်းကျော် က ဆိုသည်။

ဇူလိုင် (၁၄) ရက် မနက် ၁၀ နာရီခွဲခန့်က လွိုင်စောင့်ကျေးရွာအုပ်စု နမ့်မော်ဘီလူးကျေးရွာ နှင့် ကုန်းညောင်ရွာကြား ပစ်ခတ်သံများ ထွက်ပေါ်ရာ ရွာသား (၄၀) ကျော် ကုန်းညောင်ဘုန်းကြီးကျောင်းသို့ တိမ်းရှောင်နေရကြောင်း သိရသည်။

လက်ရှိမြန်မာနိုင်ငံတွင်း ကိုဗစ် ကူးစက်မှု နေ့စဉ်တိုးများလာနေသည်ဖြစ်ရာ စစ်ဘေးရှောင်ပြီး ဘုန်းကြီးကျောင်းတွင် စုဝေးနေထိုင်ရမည့် အပေါ် ဒေသခံများ စိုးရိမ်နေကြောင်း၊ တဖက်တွင်လည်း မိုးဦးရာသီ လယ်ယာဆင်းရမည့်အချိန်ဖြစ်သဖြင့် လက်နက်ကိုင်များ တိုက်ပွဲမဖြစ်ပွားအောင် ရှောင်ရှားပေးစေလိုကြောင်း ကျောက်မဲဒေသခံများက တောင်းဆိုလိုက်သည်။

ကျောက်မဲမြို့နယ်တွင် လွန်ခဲ့သည့် ဇွန် ၂၅ ရက်မှ ဇွန် ၂၉ ရက်ထိ အစိုးရ တပ်မတော် နှင့် RCSS/SSA တို့ တိုက်ပွဲပြင်းထန် ဖြစ်ပွားပြီး ဒေသခံများ တကြိမ်စစ်ဘေးရှောင်ခဲ့ရပြီးဖြစ်သည်။
ထိုစဉ်က အစိုးရစစ်တပ်က ရွာအတွင်းဝင်ရောက်ကာ ဒေသခံရွာသားအား ဖမ်းဆီးရိုက်နှက် ပစ်ခတ်သဖြင့်သေကြေဒဏ်ရာ ရမှုများရှိခဲ့သည်ဟုဆိုကာ တရားမျှတမှု ရရှိစေရေးအတွက် ဇူလိုင် ၁၀ ရက်နေ့က ဒေသခံ တသောင်းခန့်က ကျောက်မဲမြို့အတွင်း စီတန်းလှည့်လည် ဆန္ဒထုတ်ဖော်ခဲ့ကြသည်။