သျှမ်းပြည်တောင်ပိုင်း ပအိုဝ်းကိုယ်ပိုင် အုပ်ချုပ်ခွင့်ရ ဒေသ ဆီဆိုင်မြို့နယ်တွင် ပြောင်းစိုက်ခင်းများ ၂ည ဆက်တိုက် ဖျက်ဆီးခံရကြောင်း စုံစမ်း သိရှိရသည်။

တောင်သူများစိုက်ပျိုးထားသည့် ပြောင်းခင်းများသည် ဇူလိုင် ၃ရက်နှင့် ဇူလိုင် ၄ရက် ၂ည ဆက်တိုက် ဖျက်ဆီးခံရပြီး၊ဖျက်ဆီးခံရသည့် ပြောင်းစိုက်ခင်း ဧက ( ၃၄.၈) ဧကရှိပြီး၊ တောင်သူ ၁၀ ဦးကျော် စိုက်ထားသည့် ပြောင်းပင်များ ဖြစ်ပြီးကြောင်း တောင်သူများ ပြောပြချက် အရသိရသည်။။

“ကျနော် စိုက်ထားတဲ့ ၁၂ ဧက အားလုံးဖျက်ဆီး ခံလိုက်ရတယ်။ ဆုံးရှုံးသွားတဲ့ အရင်းနှီးလည်း မနည်းဘူး။ သိန်း ၂၀ ကျော် လောက် ယူထားတဲ့ အတိုးနှုန်းတွေ ဘယ်လို ဖြေရှင်းရမလဲ မသိတော့ဘူး” ဟု ပြောင်းစိုက်တောင်သူ ခွန်မောင်ကြီးက သျှမ်းသံတော်ဆင့် ကို ပြောသည်။

လက်ရှိ ဖျက်ဆီးခံရသည့် ပြောင်းစိုက်ခင်းနေရာသည် ဆီဆိုင်မြို့နယ် မှ တောင်သူများပိုင်ဆိုင်သည့်မြေယာမြေဖြစ်ပြီး၊ လွန်ခဲ့သည့် ၁၉၉၆ ခုနစ် တွင် တပ်မှ (၁၉၀၀) ဧက ကျော် ကို အတင်းအဓမ္မသိမ်းဆည်းခဲ့သည်။

တပ်မှ ထိုမြေများကို သိမ်းဆည်းသည်ဟု တရားဝင်လာရောက် အကြောင်းကြားမသိပေးခြင်းမရှိသကဲ့သို့ ထိုမြေပေါ်တွင် လုပ်ကိုင်စားသောက်သည့်တောင်သူများ နစ်နာကြေး လျော်ကြေးငွေ တစုံတရာ မရရှိခဲ့ကြကြောင်း တောင်သူများက ပြောသည်။

ထိုမြေယာပေါ်တွင် တပ်နှင့် တောင်သူများအငြင်းပွားမှု ဖြစ်ပွားနေသည့် မြေသော်လည်း ထိုမြေသည် တောင်သူများ၏ စားဝတ်နေရေး ဖြေရှင်းနေရသည့် မြေဖြစ်သည်။

“စိုက်ထားတဲ့ပြောင်းပင်တွေက တပ်သိမ်းမြေပါ။ ဧက ၁၉ ၀၀ ကျော်ရှိတယ်။ အဲ့ဒီထဲမှာ တောင်သူတွေက ကိုယ့်ခြံထဲမှာပဲ စိုက်ကြတာပါ။ စိုက်တဲ့ခါကျတော့ နေ့ခင်းပိုင်းမှာဆိုလို့ရှိရင် တပ်တွေက အစောင့်တွေနဲ့ သေနတ်တွေနဲ့ စောင့်နေကြတယ်။ အခု ဖျက်သွားတာက ည ပါ” ဆီဆိုင်မြို့ အောင်ချမ်းသာရပ်ကွက် အုပ်ချုပ်ရေးမှူး ဦးစံဝင်းမောင် က သျှမ်းသံတော်ဆင့် ကိုပြောသည်။

ဖျက်ဆီးခံရသည့် ပြောင်းစိုက်ခင်းသည် ဆီဆိုင်မြို့ အခြေစိုက် ခြေမြန်တပ်ရင်း (၄၂၃) တပ်နှင့် (၄၂၄)တပ်တို့ ၏ အနောက်တည့်တည့် တွင် စိုက်ပျိုးထားသည့် ပြောင်းပင်များဖြစ်ကြောင်း ဦးစံဝင်းမောင် က ပြောပြသည်။

“ပြောင်းပင်တွေကို အုပ်စုလိုက် ဖျက်ဆီးသွားတယ်။ ဘယ်သူ ဘယ်ဝါ ဆိုတာတော့ တောင်သူ တွေ အနေနဲ့ လက်ပူးလက်ကြပ် မသိရဘူး။ တောင်သူ အချင်းချင်း ပြန်ဖျက်ဆီးတာမဖြစ်နိုင်ဘူး” ဟု ဦးစံဝင်းမောင် က ဆိုသည်။

ဆီဆိုင်မြို့နယ် အတွင်းရှိ တောင်သူများ ဓလေ့သဘာဝ အရ စိုက်ပျိုးရာသီ ရောက်ပါက အချင်းချင်း အလေ့ကျ ကူညီ စိုက်ပျိုးကြသဖြင့် တောင်သူအချင်းချင်း ဖျက်ဆီးခြင်းမဖြစ်နိုင်ကြောင်း၊ မည်သည့် အုပ်စုလာရောက်ဖျက်ဆီးသည်ကို စုံစမ်းနေဆဲ ဟု လည်း တောင်သူများက ပြောဆိုလိုက်သည်။

ဖျက်ဆီးခံရသည့် ပြောင်းပင်တချို့ သည် အမြင့်ပေ ၃ပေ အထက်ရှိပြီး၊ တချို့ပင်များသည် ပြောင်းအနံ့ စတင်ထွက်နေပြီ ဖြစ်ကြောင်း သိရသည်။

“ ပြောင်းပင်က အမြင့် ၃ ပေလောက်ရှိတယ်။ တစ်ချို့ပြောင်းပင်တွေက အနံ့ ထွက်နေပြီ။ စိုက်တာ တစ်ယောက် နဲ့ တစ်ယောက် မတူတော့ အမြင့်တွေ မတူကြဘူး” ဟု ခွန်မောင်ကြီး က ဆိုသည်။

၂ည ဆက်တိုက် ဖျက်ဆီးခံရသည့် ပြောင်းစိုက်ခင်း ဧက (၃၂.၈)ဧက အတွက် တောင်သူများက ဥပဒေ ကြောင်းအရ အရေးယူဆောင်ရွက်သွားမည်ဖြစ်ကြောင်း သိရသည်။

ထို ပြောင်းစိုက်ခင်း ဖျက်ဆီးခံရသည့် နောက်ဆက်တွဲ အနေဖြင့် စားဝတ်နေရေး၊ ကလေးပညာ အတွက် အခက်အခဲ ဖြစ်လာနိုင်ကြောင်း၊ သက်ဆိုင်ရာမှလည်း လာရောက်ကူညီကြည့်ပေးစေလိုကြောင်းလည်း တောင်သူများက ပြောဆိုလိုက်သည်။

ဆီဆိုင်မြို့နယ် အတွင်း ကျေးရွာ ၅ရွာ ပိုင်ဆိုင်သည့် မြေယာ ကိစ္စနှင့် ပတ်သက်ပြီး တောင်သူနှင့်တပ်သည် မေလနှောင်းပိုင်းမှစတင်ကာ မြေယာအငြင်းပွားမှုဖြစ်ပွားခဲ့ကာ တောင်သူ ၇၀ ကျော်ကို တပ်မှ တရားစွဲဆိုထားခဲ့ကြောင်းသိရသည်။