သျှမ်းပြည် တောင်ပိုင်း မိုင်းရှူးမြို့ တွင် အသက် ၆နှစ်အရွယ်ရှိ ကလေးငယ် တဦး သက်ငယ်မုဒိမ်းပြုကျင့်ခံရကြောင်း စုံစမ်းသိရသည်။
ဇူလိုင် ၁ရက် နေ့လည်ပိုင်းတွင် လူလတ်ပိုင်းအရွယ် တဦးသည် အသက် ၆နှစ် အရွယ် ကလေးငယ်ကို သက်ငယ်မုဒိမ်းပြုကျင့်ခဲ့ကြောင်း၊ ထို ပြုကျင့်သည့် တရားခံကို ရဲစခန်းမှ ဖမ်းဆီးထားကြောင်း မိုင်းရှူးမြို့ တွင်နေထိုင်သည့် နန်းဆိုင် ကပြောသည်။
“ ပြုကျင့်တဲ့ တရားခံက ကလေးငယ်ရဲ့အိမ်နီးချင်းပါပဲ။ ကလေး အမေက တခြားအိမ်ကို အလည် သွားနေတုန်း ပြုကျင့်ခံရတာပါ။ ကလေးက အမှန်အတိုင်းပြောပြလို့ပေါ့။ တရားခံကိုတော့ ဖမ်းမိထားပါတယ်” ဟု နန်းဆိုင်က ပြောပြသည်။
သက်ငယ်မုဒိမ်း ပြုကျင့်ခံရသည့် ကလေးငယ်၏ ကိုယ်အင်္ဂ ါသည် ပျက်စီးသွားသဖြင့် ဆေးကုသခံယူနေကြောင်းလည်း သိရသည်။
“ ကလေးက ဆေးရုံတက်နေရတယ်။ သူ့ ၄ချက် ချုပ်ရတယ်။ နောက် သူ့အမေက အဲ့အကြောင်းပြောနေရင် ငိုတယ်။ စိတ်ဒဏ်ရာတော့ ရှိနေတယ်” ဟု နန်းဆိုင် က ဆိုသည်။
ထိုသက်ငယ်မုဒိမ်း ကျူးလွန်သည့် အမျိုးသားကို မိုင်းရှူးမြို့ မရဲစခန်းတွင် ဖမ်းဆီးချုပ်နှောင်းထားပြီး၊ ကလေး၏ မိခင်မှာ အမှုဖွင့်ထားကြောင်း လည်း သိရသည်။
“ ကျမ သိရသလောက်တော့ ကလေးဆေးရုံတက်နေရတယ်။ နောက် မုဒိမ်းကျင့်တဲ့ကောင်ကလည်း အဝေးကမဟုတ်တော့ ဖမ်းထားတယ်” ဟု မိုင်းရှူးမြို့ နယ် ပြည်နယ် လွှတ်တော်ကိုယ်စားလှယ် နန်းကောင်ခမ်း က ပြောသည်။
လက်ရှိမှာ သက်ငယ်မုဒိမ်း ကျူးလွန်သည့်သူကို မိသားစုဝင်များက ရဲစခန်းတွင် အမှုဖွင့်ဆိုထားသော်လည်း မည်သည့် ပုဒ်မ ဖြင့် ဖွင့်ဆိုသည်ကို မသိရှိကြပေ။
“ ကျမ သူ့မိသာစုတွေကို မေးတယ် ဘာပုဒ်မနဲ့ ဖွင့်တယ်ဆိုတာ မသိကြဘူး။ ရပ်ကွက် အုပ်ချုပ်မှူးကလည်းမသိဘူးဖြစ်နေတယ်” ဟု နန်းဆိုင်က ထပ်လောင်းပြောသည်။
ထိုသက်ငယ်မုဒိမ်းမှု ကျူးလွန်သည့် သူကိုဖမ်းဆီးရမိထားသော်လည်း သက်ဆိုင်ရာမှ ပြန်လွှတ်ပေးမည်ကို စိုးရိမ်ကြကြောင်း မိုင်းရှူး ဒေသခံများက ပြောသည်။
လွန်ခဲ့သည် ဇန်နဝါရီ လတွင်လည်း မိုင်းရှူးမြို့နယ် အတွင်း အသက် ၁၆နှစ် အရွယ် မိန်းကလေး တဦး မုဒိမ်းကျင့်ခံရကြောင်း သိရသည်။
