မူဆယ်တွင် အမျိုးသားတဦး သေနတ်ပစ်သတ်ခံရ

0

သျှမ်းပြည် မြောက်ပိုင်း မူဆယ်မြို့ ကောင်းမူးတုံရပ်ကွက် တွင် ယမန်နေ့ ညပိုင်း၌ အမျိုးသားတဦး သေနတ်ပစ်ခံရကြောင်းစုံစမ်းသိရသည်။

ယမန်နေ့ညတွင် သေနတ်ပစ်ခံရပြီး သေဆုံးသွားသည့် အမျိုးသားပုံ

ဖြစ်စဉ်မှာ ယမန်နေ့ (ဇူလိုင် ၂)ရက် ည ၉ နာရီ ဝန်းကျင်တွင် ကောင်းမူးတုံရပ်ကွက် ဟိုနားဘုန်းကြီးကျောင်း ဘေးလမ်းတွင် အသက် ၂၅နှစ် အရွယ် ရှိ အမျိုးသားတဦးမောင်းလာသည့် ဆိုင်ကယ်နောက်ကို အမည်မသိ သူ ၂ဦး က လိုက်လံ ပစ်ခတ်မှုကြောင့် သေဆုံးခဲ့ကြောင်း မူဆယ်ဒေသခံများပြောပြချက် အရသိရသည်။

“ အသက် ၂၅နှစ် ကောင်လေးမောင်းလာတဲ့ဆိုင်ကယ်နောက်ကို ဆိုင်ကယ်တစီး နဲ့ လူ ၂ယောက်က လိုက်ပြီး သေနတ်နဲ့ ပစ်ပြီး ထွက်ပြေးသွားတယ်။ ကောင်လေးကတော့ အဲ့မှာပဲ သေသွားတယ်” ဟု မျက်မြင်တွေ့ရှိသည့် ကိုလွင် ကသျှမ်းသံတော်ဆင့်ကို ပြောသည်။

သေနတ်ပစ်ခံရပြီး သေဆုံးသွားသည့် အမျိုးသားသည် ယာဘက် လည်ပင်း၊ ယာဘက် နံကြား နှင့် ယာဘက် ဆီးခုံ တို့တွင်ကျည် ၃ ချက် ဒဏ်ရာရရှိကြောင်း၊ သေဆုံးသူအနီးတွင်လည်း ၉မမ ကျည်ခွံ ၂ ခုတွေ့ရှိကြောင်း မူဆယ်မြို့ ရဲစခန်းမှ စုံစမ်းသိရသည်။

“ တရားခံကိုတော့ မနေ့ကတည်းက ကျနော်တို့ ရှာဖွေနေပါတယ်။ အခုထိ ကျနော်တို့ စုံစမ်းနေဆဲပါ” ဟု မူဆယ်မြို့မ ရဲစခန်းတွင် တာဝန်ကျ ရဲအရာရှိ တဦးက ပြောသည်။

သျှမ်းပြည်မြောက်ပိုင်း မူဆယ်မြို့သည် တရုတ်နယ်စပ် မြို့ဖြစ်ပြီး မကြာခဏ လုယက်မှု၊ သေနတ်ပစ်ခတ်မှု နှင့် ဗုံးပေါက်ကွဲမှုများဖြစ်ပွားသည့် နေရာဒေသတဦးဖြစ်သည်။

Leave a Comments

SHARE