သျှမ်းပြည်တောင်ပိုင်း တောင်ကြီးမြို့ရှိ စဝ်စံထွန်း ဆေးရုံတွင် ကိုဗစ်- ၁၉ အတည်ပြု လူနာ တစ်ဦး ဆေးရုံမှ ဆင်းခွင့်ရကြောင်း သိရသည်။

အဆိုပါ လူနာ အမှတ် ၂၃၀ သည် ဇွန်  ၂၄  ရက် က ဆေးရုံမှ ဆင်းခွင့်ရပြီး ရွာငံမြို့နယ်ရှိ Community base facility quarantine တွင် ထားရှိသွားမည်ဖြစ်ကြောင်း သိရသည်။

“ရွာငံမှာရှိတဲ့ Facility Quarantine မှာ ၇ ရက် ထားပြီးတော့ အိမ်မှာ Quarantine ၇ ရက် ဆက်ထားမယ်။ စုစုပေါင်း ၁၄ ရက် ထားပြီးမှ ပုံမှန်လူအတိုင်း နေထိုင်လို့ရပါပြီ ”ဟု ပြည်နယ် အထူးရောဂါ နိမ်နင်းရေး လက်ထောက်ညွှန်ကြားရေးမှူး ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။

လူနာ အမှတ် ၂၃၀  သည် သျှမ်းပြည်တောင်ပိုင်း ရွာငံမြို့ နယ်မှ အသက် ၃၁ နှစ်အရွယ် အမျိုးသားဖြစ်ပြီး ဇွန်  ၂  ရက်နေ့က ပိုးတွေ့အတည်ပြု လူနာ အဖြစ် ကျန်းမာရေး ဝန်ကြီး ဌာန ကထုတ်ပြန်ခဲ့သည်။

“သူ့ကို ၃ ကြိမ်မြောက် ဓါတ်ခွဲနမူနာ စစ်ဆေးရာမှာ ၂ ခါ ဆက်တိုက် ပိုးမတွေ့လို့ ဆေးရုံက ဆင်းခွင့်ရတယ်။” ဟု ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။

သျှမ်းပြည်နယ်တွင် အတည်ပြု လူနာ ၁၀ ဦး ရှိသည့် အနက်  ၈  ဦး ဆေးရုံမှ ဆင်းခွင့်ရပြီး ကျန်သည့် ၂ ဦးသည် သျှမ်းပြည်တောင်ပိုင်း တောင်ကြီး စဝ်စံထွန်း ဆေးရုံ အတည်ပြု လူနာ တစ်ဦး နှင့် သျှမ်းပြည်မြောက်ပိုင်း မူဆယ်ပြည်သူ့ဆေးရုံမှာ တစ်ဦး စုစုပေါင်း ၂ ဦး ရှိသည်။

မြန်မာနိုင်ငံတစ်ဝှမ်းလုံးတွင် ကိုဗစ် – ၁၉ အတည်ပြု လူနာ ၂၉ ၃ ၊ ပြန်လည် သက်သာလာသူ ၂၀၈ ဦး နှင့် သေဆုံးသူ ၆ ဦး ရှိကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။