တာချီလိတ်မြို့ရှိ မြန်မာ- ထိုင်း ချစ်ကြည်ရေး အမှတ် (၁ )တံတား ဖွင့်ရန် အစီစဉ် မရှိသေးကြောင်း တာချီလိတ် မြို့နယ် အုပ်ချုပ်ရေးမှူး ထံမှ စုံစမ်း သိရှိရသည်။
ဇွန် (၂၃) ရက်နေ့က နေ့လည်ပိုင်းတွင် တာချီလိတ် နှင့် မယ်ဆိုင် နှစ်နိုင်ငံ တာဝန်ရှိသူများက တာချီလိတ်မြို့၌ အပြန်အလှန် ဆွေးနွေးခဲ့ကြောင်း စုံစမ်း သိရှိရသည်။
“လောလောဆယ်တော့ နှစ်ဖက်စလုံး မဖွင့်နိုင်သေးပါဘူး။ အခုအနေအထားတော့ ကျန်းမာရေး အခြေနေ လာပြီး မေးတဲ့ သဘောပါပဲ။ ဟိုဘက်မေး ဒီဘက်မေး အဲ့အဆင့်ပဲ ရှိပါသေးတယ်။ တံတားဖွင့်ဖို့ အဆင့်ထိတော့ မရောက်သေးပါဘူး” ဟု တာချီလိတ် မြို့နယ် အုပ်ချုပ်ရေးမှူး ဦးချမ်းမြေ့စော က သျှမ်းသံတော်ဆင့် ကိုပြောသည်။
တာချီလိတ်မြို့ရှိ ချစ်ကြည်ရေး တံတားအမှတ် (၁) သည် မတ်(၂၃) ရက်နေ့ ကစတင် ပိတ်ထားပြီး (၃) လ ကြာ ပိတ်ထားပြီ ဖြစ်ကြောင်း သိရသည်။
“အခု ဖွင့်ဖို့ အစီစဉ်လဲ မရှိသေးပါဘူးဗျ။ ရောဂါတွေ ပြီးမှပဲ ဖွင့်ပါမယ်။ ရောဂါ က ဘယ်တော့ ပြီးမယ်မှန်းမသိဘူး” ဟု ဦးချမ်းမြေ့စော က သျှမ်းသံတော်ဆင့် ကိုပြောသည်။
မြန်မာ-ထိုင်း နယ်စပ် အမှတ်(၁) တံတား သည် ၃လကြာပိတ်ထားနောက် နယ်စပ် တွင် တပိုင်တနိုင် ကုန်ကူးသန်းရောင်းဝယ်နေသည့်သူများအတွက် စားဝတ်နေရေး ခက်ခဲလာကြောင်းလည်း တာချီလိတ်ဒေသခံများပြောပြချက် အရသိရသည်။
“ တာချီလိတ်က ထိုင်းပစ္စည်းကို အဓိက အားထားရ၊ ကုန်ကူးနေရတဲ့အတွက် ကုန်စုံရောင်းတဲ့သူအတွက်တော့ အခက်အခဲတော့ရှိပါတယ်။ ကျန်းမာရေး အရ ပိတ်ထားတော့လည်း မသက်နိုင်ဘူးလေ” ဟု တာချီလိတ် ဆန်ဆိုင်း ရပ်ကွက်တွင်နေထိုင်သည့် အမျိုးသမီးတဦးက သျှမ်းသံတော်ဆင့်ကိုပြောသည်။
နယ်စပ် တံတားဖွင့်ရန်အတွက် ၂ နိုင်ငံကြားဆွေးနွေး သဘောတူရုံမျှ မရဘဲ အာဆီယံ နိုင်ငံများနှင့်လည်း ပတ်သက်ဆက်နွယ်နေပြီး အားလုံး သဘောထားပါဝင်မှ ဆုံးဖြတ်ဆောင်ရွက်နိုင်မည်ဖြစ်ကြောင်း သိရသည်။
Leave a Comments