သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)ထိန်းချုပ်သည့်နေယ်မြေ လွိုင်ကော်ဝမ်း အနီးတွင် အစိုးရတပ်မတော် စစ်အင်အား ၅၀၀ ကျော် ဖြည့်တင်းရောက်ရှိနေကြောင်း စုံစမ်းသိရသည်။

ဇွန်၂၀ရက်မှ စတင်ကာ ကျိုင်းတုံ အခြေစိုက် တပ်ရင်းဖြစ်သည့် ခြေမြန်တပ်ရင်း ခမရ ၂၂၄၊ ခမရ ၅၇၁ နှင့် ခြေလျင်တပ်ရင်း ၂၂၁ တို့ပူးပေါင်းပြီး စစ်အင်အား ၅၀၀ကျော် သည် မြန်မာ-ထိုင်း နယ်စပ် သျှမ်းစစ်ရှောင် ဒုက္ခသည်များ နေထိုင်သည့် RCSS/SSA ၏ ကျိုင်းတုံစစ်ဒေသအမှတ် ၁ လွိုင်ကော်ဝမ်းတပ်စခန်း ဘက်သို့ အင်အားတိုးဖြည့်နေရာယူထားကြောင်း စစ်ရှောင်များကို ကူညီမှုပေးနေသည့် ကော်မတီထံမှ သိရသည်။

အစိုးရတပ်မတော် စစ်အင်အား တိုးချဲ့လာသည့်အတွက် စစ်ရှောင်များတိုက်ပွဲဖြစ်ပွားမည်ကို စိုးရိမ်နေကြကြောင်း၊ တပ်အင်အားတိုးချဲ့သည့်နေရာများသည် စစ်ရှောင်များ ဟင်းရွက်ရှာစားသည့်နေရာဖြစ်ကြောင်းလည်း မြန်မာ-ထိုင်း နယ်စပ် စစ်ရှောင်စခန်း ကူညီပေးနေသည့် ကော်မတီ အဖွဲ့ဝင် နန်းငင်းဟွမ် က သျှမ်းသံတော်ဆင့် ကို ပြောသည်။

“ စစ်အင်အားတွေ အလုံးအရင်း ဝင်လာတော့ စစ်ရှောင်တွေက လန့်သွားတယ်။ တိုက်ပွဲဖြစ်မှာကြောက်ကြတယ်။ သူတို့တပ်စခန်းလာချတဲ့နေရာကလည်း စစ်ရှောင်တွေ ဟင်းရွက်တွေ ရှာစားတဲ့နေရာဖြစ်တယ်” ဟု နန်းငင်းဟွမ် က ဆိုသည်။

သို့သော် ယမန်နေ့ (ဇွန်၂၁)ရက် မနက်ပိုင်းတွင် အစိုးရတပ်မတော် စစ်အင်အား ဆုတ်ခွာခဲ့သော်လည်း စစ်ရှောင်များအနေဖြင့် အစာရှာရန် မသွားရဲသေးကြောင်း၊ တောင်ကြောတလျောက်တွင် စစ်အင်အားထပ်မံရှိမှာကို စိုးရိမ်နေကြဆဲ ဖြစ်ကြောင်း လွိုင်ကော်ဝမ်း စစ်ရှောင်စခန်းတွင်နေထိုင်သည့် လုံးဘ က သျှမ်းသံတော်ဆင့်ကို ပြောသည်။

“ တပ်အင်အားကတော့ ဆုတ်သွားတယ်။ ဒါပေမယ့် ကျနော်တို့ ဟင်းရွက်တွေ သွားမရှာရဲသေးဘူး။ ကြောက်တယ်။ စိတ်ပူနေတုန်းပဲ။ စစ်မချဘူး။တိုက်ပွဲဖြစ်မှာ ကြောက်နေကြတယ်” ဟု လုံးဘ က ဆိုသည်။

ထို အစိုးရ တပ်မတော် စစ်အင်အားတိုးချဲ့သည့်နေရာတွင် စစ်ရှောင် ဒုက္ခသည် ၂၅၀၀ ကျော်နေထိုင်သည့်နေရာဖြစ်ကြောင်းသိရသည်။

RCSS/SSA သည် တနိုင်ငံလုံ ပစ်ခတ်ရပ်စဲရေး သဘောတူညီ စာချုပ် (NCA)လက်မှတ်ရေးထိုးထားသည့် အဖွဲ့ဖြစ်ပြီး၊ NCAထိုးပြီးနောက်ပိုင်း အစိုးရတပ်မတော်သည် မြန်မာ-ထိုင်းနယ်စပ် RCSS/SSA တပ်စခန်း ရှိသည့် လွိုင်ကော်ဝမ်း အနီးသို့ စစ်အင်အားတိုးချဲ့မှုမျာ မကြာခဏ ပြုလုပ်လာသည်ဟုလည်း စစ်ရှောင် ပြည်သူများက ပြောသည်။

“ အစိုးရတပ်က တပ်သားတွေ ဒီဘက်ကို မကြာခဏလာတယ်။ ဟိုတလောက ၄ယောက် ခိုးလာပြီး သတင်းအချက်အလက်လာယူတယ်။ ဒီတခါကျတော့ စစ်အင်အား အလုံးအရင်လာတယ်။ ဘာသဘောလဲတော့မသိဘူး” ဟု စစ်ရှောင် ဒုက္ခသည် တဦးက သျှမ်းသံတော်ဆင့် ကို ပြောသည်။

အစိုးရ တပ်မတော် စစ်အင်အား ၅၀၀ ကျော် RCSS/SSA နယ်မြေ လွိုင်ကော်ဝမ်း ဒေသ သို့ဝင်လာသည့် ကိစ္စနှင့် ပတ်သက်ပြီး RCSS/SSA ပြောရေးဆိုခွင့်ရှိသူ ဗိုလ်မှူး စိုင်းခမ်းစံ က “ ကျနော် သတင်းတော့ ကြားရတယ်။ သတင်းအချက်အလက် အတိအကျတော့ မရသေးဘူး” ဟု သျှမ်းသံတော်ဆင့်ကို ပြောသည်။

NCA ထိုးပြီးနောက်ပိုင်း RCSS/SSA တပ်စခန်းများကို အစိုးရ တပ်မတော်က မကြာခဏ ဝင်ရောက် အင်အားဖြည့်တင်းမှုများ ပြုလုပ်လာပြီး၊ တိုက်ပွဲများလည်း မကြာခဏ ထိတွေ့မှု ဖြစ်လာပြီး၊ စစ်ရှောင်များအနေဖြင့် လွိုင်ကော်ဝမ်းဒေသ တိုက်ပွဲပြန်ဖြစ်မှာကို စိုးရိမ်ပူပန်နေရကြောင်း သိရသည်။

မြန်မာ-ထိုင်းနယ်စပ် တလျောက်တွင် သျှမ်းစစ်ရှောင် ပြည်သူ ၆ထောင်ကျော်ရှိပြီး၊ NCA လက်မှတ်ထိုးပြီးနောက်ပိုင်း ထို စစ်ရှောင်များ စားနိပ်ရိက္ခာ ပြတ်တောက်မှု ရင်ဆိုင်နေရကြောင်း သိရသည်။