သျှမ်းပြည် တောင်ပိုင်း လင်းခေးခရိုင် မိုးနဲမြို့နယ် အတွင်း RCSS/SSA၏ ကိုဗစ်-၁၉ ကြိုတင်ကာကွယ်ရေး လုပ်ငန်းစဉ်ကို ကျေးရွာ အုပ်ချုပ်ရေးမှူး နှင့် ရဲတပ်ဖွဲ့ဝင်များက တားမြစ်ပိတ်ပင်ကြောင်းစုံစမ်းသိရသည်။
ယနေ့ဇွန် ၁၈ ရက် မနက် ၉ နာရီက သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA)၏ ကျန်းမာရေး ဝန်ထမ်းများက မိုးနဲ မြို့နယ်အတွင်းရှိ ဒေသခံပြည်သူများအား ကိုဗစ်-၁၉ ကြိုတင်ကာကွယ်ရေး လုပ်ငန်းစဉ် ဆောင်ရွက်နေစဉ် လွယ်ဝပ်ကျေးရွာ အုပ်ချုပ်ရေးမှူး နှင့် ရဲတပ်ဖွဲ့ဝင် ၂ ဦး တို့က လာရောက် တားမြစ်ခဲ့ကြောင်း RCSS/SSA ဘက်က ဆိုပါသည်။
“ ဒီနေ့မနက် ကျနော်တို့ ကိုဗစ်-၁၉ ကြိုတင်ကာကွယ်ရေးလုပ်ငန်းစဉ် အဖွဲ့ကို လာပြီးဟန့်တားတယ်ဆိုတာဟုတ်ပါတယ်။ ကျနော့အထင်တော့ ကျနော်တို့ RCSS/SSA ကို နာမည် မရစေချင်တဲ့သဘောလားမသိဘူး” ဟု RCSS/SSA ၏ ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေး က သျှမ်းသံတော်ဆင့် ကို ပြောသည်။
RCSS/SSA ဆေးဝန်ထမ်း အဖွဲ့သည် ကျိုင်းတောင်းမြို့အသွားလမ်း တနေရာတွင် ကိုဗစ်-၁၉ သံသယ လူနာ ရှိ၊ မရှိစစ်ဆေးခြင်းနှင့် ကြိုတင်ကာကွယ်နည်း အသိပညာ ဟောပြောပေးခြင်း ဆောင်ရွက်နေစဉ် လွယ်ဝပ်ကျေးရွာ အုပ်ချုပ်ရေးမှူး နှင့်ရဲတပ်ဖွဲ့ ၂ ဦး တို့က ကားဖြင့်လာပြီး၊ ခွင့်ပြုချက် မရရှိပါက ကိုဗစ်-၁၉ ကြိုတင်ကာကွယ်ရေးလုပ်ဆောင်ခြင်း မပြုရန် တားမြစ်ပိတ်ပင်ခဲ့ကြောင်း RCSS/SSA ၏သတင်းမီဒီယာ ဝက်ဆိုဒ်တွင် ရေးသားဖော်ပြထားသည်။
ထို့အပြင် အမိန့်မရပါက ထိုနေရာတွင် ကိုဗစ် -၁၉ ကြိုတင်ကာကွယ်ရေး လုပ်ငန်းစဉ်များ ဆောင်ရွက်ခြင်းမပြုရန် နှင့် ပြန်လည် ဆုတ်ခွာပေးရန် ပြောဆို ခြိမ်းခြောက်ခဲ့ရာ RCSS/SSA ၏ ကျန်းမာရေး ဝန်ထမ်းများသည် ထိုနေရာမှ ပြန်လည် ဆုတ်ခွာပေးခဲ့ရကြောင်းလည်း RCSS/SSA ၏ ဝက်ဆိုဒ်တွင် ဖော်ပြထားသည်။
ဇွန် ၁၆ ရက်နေ့တွင် ကိုဗစ်-၁၉ ကာလအတွင်း ထိန်းချုပ်ရေး ၊ကုသရေး နှင့် ပတ်သတ်ပြီး RCSS/SSA နှင့် အစိုးရ အဖွဲ့တို့သည် Vedio Conferencing အစည်းအဝေး ပြုလုပ်ခဲ့ကြောင်း သိရသည်။
ထို့ပြင် ကိုဗစ်-၁၉ ထိန်းချုပ် ကာကွယ်ကုသရေး ကာလအတွင်း အစိုးရ အဖွဲ့မှ လည်း RCSS/SSAကို ထပ်မံ ကူညီပေးမည်ဟု ပြောဆိုခဲ့သေးသည်။
လွန်ခဲ့သည့် ဧပြီလ ၇ ရက် တွင်လည်း သျှမ်းပြည်တောင်ပိုင်း မိုင်းပန်မြို့နယ် တွင် RCSS/SSA ၏ ဆေးဝန်ထမ်းများကို အစိုးရ တပ်မတော်က တားမြစ်ခဲ့ပြီး၊ RCSS/SSA ၏ ထောက်ပံ့မှုကို ယူပါက ဒေသခံပြည်သူများကို ဖမ်းဆီး အရေးယူမည်ဟုလည်း ခြိမ်းခြောက်ခဲ့ကြောင်းသိရသည်။
