ကိုဗစ်-၁၉ ကာလအတွင်း ထိန်းချုပ်ရေး ၊ကုသရေး နှင့် ပတ်သတ်ပြီး အစိုးရ အဖွဲ့ မှ သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်ကို ထပ်မံ ကူညီထောက်ပံ့သွားမည် ဟုစုံစမ်းသိရသည်။

ဇွန် လ ၁၆ ရက် နေ့လည် ပိုင်းက RCSS/SSA ကိုယ်စားလှယ်နှင့် အစိုးရ ကိုယ်စားလှယ်တို့ ကိုဗစ်-၁၉ အရေး နှင့်ပတ်သက်ပြီး Vedio Conferencing အစည်းအဝေး ပြုလုပ်ခဲ့ကြောင်း သိရသည်။

“ မနေ့က အွန်လိုင်း ကနေ အစည်းအဝေးလုပ်ပါတယ်။ အဓိကတော့ကိုဗစ်-၁၉ကာကွယ်ထိန်းချုပ်တဲ့ကိစ္စပါ။ နောက် အစိုးရ ဘက်က RCSS/SSA ကို ဒုတိယ အကြိမ် ထပ်ပြီးအကူအညီပေးဖို့ရှိတယ်လို့ပြောလာပါတယ်” ဟု RCSS/SSA ၏ ပြောရေးဆိုခွင့်ရှိသူ ဒုတိယဗိုလ်မှူးကြီး စဝ်အုမ်ခေး က သျှမ်းသံတော်ဆင့် ကို ပြောသည်။

လွန်ခဲ့သည့် မေ ၂၆ရက်တွင် အစိုးရ မှ RCSS/SSA ကို ပထမအကြိမ် ကိုဗစ် -၁၉ တားဆီး ကာကွယ် ထိန်းချုပ် သည့် ပစ္စည်းများ ထောက်ပံ့ကူညီခဲ့ပြီး၊ ဒုတိယ အကြိမ်အဖြစ် ထပ်မံပေးသွားမည်ဟု ယမန်နေ့ က ပြောဆိုခဲ့ကြောင်း ဒုဗိုလ်မှူးကြီး စဝ်အုမ်ခေး က ပြန်လည် ပြောပြသည်။

“ ဒုတိယ အကြိမ် ထောက်ပံ့ပစ္စည်းကိုဘယ်တော့ ပေးမယ်ဆိုတာ မသိရသေးဘူး။ နောက်ထပ် ကူညီမယ်လို့ပဲပြောလာတာပါ” ဟု ဒုဗိုလ်မှူးကြီး စဝ်အုမ်ခေး က ဆိုသည်။

ယမန်နေ့ အွန်လိုင်း ဆွေးနွေးမှုတွင်အဓိက အားဖြင့် ကိုဗစ်-၁၉ ထိန်းချုပ်ရေး၊ ကုသရေး၊ နိုင်ငံခြား မှပြန်ဝင်လာသူများကိစ္စ၊ ရွှေ့ပြောင်းလုပ်သားအရေး၊ နိုင်ငံတကာအကူအညီ၊ ထိတွေ့လူနာ ရှာဖွေရေး ကိစ္စ နှင့် ငြိမ်းချမ်းရေး ကိစ္စတို့ကို ဆွေးနွေးခဲ့ကြကြောင်းသိရသည်။

ဆွေးနွေးပွဲတွင် RCSS/SSA ဘက်မှ ဗိုလ်ချုပ်ဘောင်ခေး၊ ဗိုလ်မှူးကြီး စိုင်းငင်း၊ ဒုဗိုလ်မှူးကြီး စိုင်းဟန်၊ ဗိုလ်မှူး စိဏ်းသျဲန်မိုင်၊ စိုင်းလျဲန်း နှင့် စိုင်းစိုင်းငင်းတို့တက်ရောက်ခဲ့ပြီး၊ အစိုးရဘက်က ဒေါက်တာ တင်မျိုးဝင်း၊ ဦးသိန်းဇော်။ ဒုဗိုလ်မှူးကြီး ခင်ဇော်ဦး(ငြိမ်း)၊ ဒုဝန်ကြီး ဦးလှမော်ဦးတို့တက်ရောက်ခဲ့ကြောင်းသိရသည်။

RCSS/SSAသည် အစိုးရဌာနထံမှ ကိုဗစ်-၁၉ ထောက်ပံ့ပစ္စည်းကို လွန်ခဲ့သည့် မေ ၂၆ရက်က တကြိမ်၊ အရှေ့ပိုင်းတိုင်း စစ်ဌာနချုပ်ထံမှ ဇွန် ၄ရက်ကတကြိမ် နှင့် သျှမ်းပြည်နယ် ပြည်သူလူထု စားနပ်ရိက္ခာ ထောက်ပံ့ရေး ကော်မတီ ထံမှ ဇွန် ၈ရက်နေ့က တကြိမ် လက်ခံရရှိခဲ့ပြီးဖြစ်သည်။

လက်ရှိ ကိုဗစ်-၁၉ ကာလ အတွင်း RCSS/SSA၏ ဆေးတပ်များသည် သျှမ်းပြည်သူလူထု ၆၄၀၀၀ ကျော်ကို ကိုဗစ်-၁၉ ပညာပေးမှု၊ ကျန်းမာရေး စစ်ဆေးပေးမှုများ ပြုလုပ်ပေးခဲ့ကြောင်း သိရသည်။