ကိုဗစ်-၁၉ ကာလ ကာကွယ် ထိန်းချုပ် ကုသ နိုင်ရန်အတွက် သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) ရရှိသည့် ပစ္စည်းများကို ခက်ခဲသည့်နေရာသို့ပြန်လည်ခွဲပေးမည် ဟု စုံစမ်းသိရသည်။

RCSS/SSA သည် ယခု ကိုဗစ်-၁၉ ကာလအတွင်း ထောက်ပံ့ ပစ္စည်း ၃ ကြိမ် လက်ခံ ရရှိခဲ့သည်။

ကိုဗစ်-၁၉ ကာကွယ် ထိန်းချုပ် ကုသနိုင်ရန် အတွက် RCSS/SSA ကို မေ ၂၆ ရက်တွင် သက်ဆိုင်ရာ အစိုးရ ဌာန က တကြိမ်၊ ဇွန် ၄ ရက်တွင် အရှေ့ပိုင်းတိုင်း စစ်ဌာနချုပ် မှ တကြိမ် နှင့် ဇွန် ၈ ရက်တွင် သျှမ်းပြည်နယ် ပြည်သူလူထု စားနပ်ရိက္ခာထောက်ပံ့ရေး ကော်မတီ မှ တစ်ကြိမ် ပေးခဲ့ကြောင်း RCSS/SSA ၏ ပြောရေးဆိုခွင့်ရှိသူ ဒုတိယ ဗိုလ်မှူးကြီး စဝ်အုမ်ခေး က သျှမ်းသံတော်ဆင့် ကို ပြောသည်။

“ ကျနော်တို့ ကိုဗစ်-၁၉ ကာကွယ်ထိန်းချုပ်ဖို့ အတွက် ထောက်ပံ့မှု ရတာ ၃ကြိမ်ပါ။ ရလာတဲ့ပစ္စည်းတွေကို လိုအပ်တဲ့ စားနပ်ရိက္ခာကို အခက်ခဲ ကြုံနေတဲ့ နေရာမှာ ပြန်ပြီး ခွဲဝေ ပေးမယ်” ဟု ဒုတိယ ဗိုလ်မှူးကြီး စဝ်အုမ်ခေး က ဆိုသည်။

ထောက်ပံ့ရေး ပစ္စည်းများကို RCSS/SSA မှ သက်ဆိုင်ရာ ကျေးရွာ မြို့နယ်တိုင်းတွင် ဖွဲ့ထားသည့် ကိုဗစ်-၁၉ ကာကွယ်ရေး ကော်မတီ လက်ထဲ အရောက်ပို့ပေးသွားမည် ဟု လည်း ဒုဗိုလ်မှူးကြီးစဝ်အုမ်ခေး က ပြောသည်။

“အစိုးရ ဌာန နဲ့ စစ်တပ် နှစ်ဖွဲ့ပေါင်းရင် ထောက်ပံ့ပစ္စည်း ၁၀ မျိုးကျော်တယ်။ တစ်နေရာကို four wheels ကား ၂ စီး လောက်ရှိတယ်။ စားနပ်ရိက္ခာ ဘက်ကတော့ ဆန် ၂၄ ပြည်အိတ် က အိတ်ပေါင်း ၃၀၀ နဲ့ ဆီ ၁၀ ပိဿာပုံးက ပုံး ၃၀ လက်ခံရရှိခဲ့တယ်”  ဟု RCSS/SSA ပြောရေးဆိုခွင့် ရှိသူ ဒုဗိုလ်မှူးကြီး စဝ်အုမ်ခေး ကပြောသည်။

အစိုးရ ဌာန နှင့် စစ်တပ်ဘက်က ကိုဗစ် -၁၉ ကာကွယ် ထိန်းချုပ်သည့် ပစ္စည်းများဖြစ်သည့် နှာခေါင်းစည်းများ၊ လက်ဆေးရည်များ၊ ပိုးသတ်ဆေးများ၊ PPE ဝတ်စုံများ စသည့် ထောက်ပံ့ပစ္စည်း ၁၀ မျိုးကျော်ရှိကြောင်း သိရသည်။

ဆက်လက်ပြီး ကိုဗစ်-၁၉ အတွက် ထောက်ပံ့ရေး ပစ္စည်းပေးသည့် ကိစ္စနှင့် ပတ်သက်ပြီး စဝ်အုမ်ခေးက “ ဒါက တစ်တိုင်းပြည်လုံး တစ်ကမ္ဘာလုံး နဲ့ သက်ဆိုင်နေတဲ့ ကျန်းမာရေး အန္တရာယ်ဆိုတော့ ဒါကတော့ ကောင်းမွန်တဲ့ လုပ်ဆောင်ချက်ပဲလို့မြင်ပါတယ်” ဟု ထပ်လောင်းပြောသည်။

တဖက်တွင်လည်း အစိုးရ တပ်မတော် နှင့် နယ်ခြားစောင့်တပ်တို့ ပူးပေါင်းပြီး ဇွန်၃ရက်နေ့က သျှမ်းပြည်အရှေ့ပိုင်း ပုံပါကျင်မြို့နယ် အတွင်းရှိ RCSS/SSA တပ်စခန်းကို ပစ်ခတ်ခဲ့သေးကြောင်း သိရသည်။

“ နယ်မြေဒေသရဲ့ နားလည်မှု လွဲနေတာကြောင့် ထိတွေ့မှုတွေ နည်းနည်းပါးပါးဖြစ်နေတယ်လို့ မြင်ပါတယ်။ အကြီးအကျယ်တော့ မဟုတ်ဘူး” ဟု RCSS/SSA ၏ ပြောခွင့်ရှိသူ ဒုဗိုလ်မှူးကြီး စဝ်အုမ်ခေးက ပြောသည်။

သျှမ်းပြည်နယ် ပြည်သူလူထု စားနပ်ရိက္ခာထောက်ပံ့ရေး ကော်မတီ သည် PNO နှင့် PNLO တို့ထံလည်း ဆန်အိတ် ၃၀၀ စီနှင့်ဆီ ၃၀ ပုံးစီ လည်းပေးအပ်သေးကြောင်းသိရသည်။

အဆိုပါ ပစ္စည်းများကို သျှမ်းပြည်နယ်အစိုးရ၏ ဗမာတိုင်းရင်းသားရေးရာဝန်ကြီး ဒေါက်တာအောင်သန်းမောင်က ပေးအပ်ခဲ့ခြင်းဖြစ်ပြီး RCSS/SSA မှ ဒုဗိုလ်မှူးကြီး စဝ်အုမ်ခေး နှင့် တောင်ကြီးမြို့ဆက်ဆံရေးရုံးတာဝန်ခံ နန်းစံဖောင်းတို့က လက်ခံပြီး PNO က တွဲဖက်ကွပ်ကဲရေးမှူး ခွန်သန်းအောင် နှင့် PNLO ဒု ဥက္ကဌ ခွန်မြင့်ထွန်းတို့က အသီးသီး လက်ခံကြကြောင်းလည်း သိရပါသည်။