ကွတ်ခိုင်မြို့နယ် အတွင်း TNLA နှင့်အစိုးရတပ် တိုက်ပွဲ ဆက်တိုက်ဖြစ်

0

သျှမ်းပြည်မြောက်ပိုင်း ကွတ်ခိုင်မြို့နယ် အတွင်း ယခုရက်ပိုင်း တိုက်ပွဲများ ဆက်တိုက်ဖြစ်ပွားနေကြောင်း စုံစမ်းသိရသည်။

ယနေ့ ပစ်ခတ်မှုကြောင့် မီးလောင်သွားသည့် စစ်တပ်ကားပေါ် သိမ်းဆည်းရမိသည့် လက်နက်ခဲယမ်းများ (ဓာတ်ပုံ TNLA သတင်းပြန်ကြားရေး)

သျှမ်းပြည်မြောက်ပိုင်း ကွတ်ခိုင်မြို့နယ် နှင့် မူဆယ်မြို့နယ် အတွင်း မေ ၂၉ ရက်မှ စတင်ကာ ယနေ့ ဇွန် ၄ ရက်ထိ တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် အစိုးရ တပ်မတော်တို့ တိုက်ပွဲ ဆက်တိုက်ဖြစ်ပွားခဲ့ကြောင်း သိရသည်။

မေ ၂၉ ရက်က  သျှမ်းပြည် မြောက်ပိုင်း ကွတ်ခိုင်-နမ့်ဖတ်ကာကြား   TNLAနှင့် အစိုးရ တပ်မတော် တို့တိုက်ပွဲဖြစ်ပွားရာ အစိုးရ တပ်ဘက်မှ စစ်ကားတစီး လက်နက်ထိမှန်ခဲ့ပြီးနောက် တိုက်ပွဲများ ဆက်တိုက်ဖြစ်လာသည်။

ယနေ့ မနက် ၁၀ နာရီကျော်  ကွတ်ခိုင်မြို့နယ် ရွှေမှော်ကြီးကျေးရွာ အနီး တိုက်ပွဲ ဖြစ်ပွားခဲ့ပြီး၊ ယမန်နေ့ ဇွန် ၃ ရက်က ကွတ်ခိုင်မြို့နယ် ကောင်းနိမ့်ကျေးရွာ အနီး မနက် ၈နာရီခွဲ  ခန့်က  မိနစ် ၂၀ ခန့်အကြာ ထိတွေ့မှုဖြစ်ပွားခဲ့ကြောင်း TNLA ပြောရေးဆိုခွင့် ရှိသူ ဗိုလ်မှူး တာ့အိုက်ကျော် က သျှမ်းသံတော်ဆင့် ကို ပြောသည်။

“ ဒီနေ့ ကတော့ မနက် ၁၀ နာရီ ၁၅ ကနေ စဖြစ်တာ။ နေ့လည် ၁၁ နာရီထိတော့ နမ့်ဖတ်ကာ အခြေစိုက်တပ် ကနေ လက်နက်ကြီး တွေနဲ့ပစ်တယ်” ဟု တာ့အိုက်ကျော် က ဆိုသည်။

အစိုးရ တပ်မတော်သည် TNLA တပ်စခန်း ရှိသည့်နေရာသို့ စစ်အင်အား တိုးချဲ့လာခြင်း၊ ဖြည့်လာခြင်းတို့ကြောင့် ထိတွေ့မှု ဆက်တိုက်ဖြစ်ရကြောင်း တာ့အိုက်ကျော် က ပြောသည်။

“ နမ့်ဖတ်ကာ တပ်ကနေပြီးတော့ တိုက်ပွဲဖြစ်တဲ့နေရာကို လက်နက်ကြီး ၅လုံးပစ်တယ်။ ထိခိုက်မှု ရှိ၊ မရှိတော့ သေချာ မသိရသေးဘူး” ဟု တာ့အိုက်ကျော်က ပြောသည်။

TNLA နှင့် အစိုးရ တပ်မတော် တိုက်ပွဲ ဆက်တိုက်ဖြစ်ပွားနေသည့်အပေါ် အစိုးရတပ်မတော် သတင်းမှန် ပြန်ကြားရေး ကို သျှမ်းသံတော်ဆင့် က အကြိမ်ကြိမ်ဆက်သွယ်မေးမြန်းသော်လည်း အဆက်အသွယ် မရခဲ့ပေ။

ယမန်နေ့ကလည်း သျှမ်းပြည် အရှေ့ပိုင်း ပုံပါကျင် မြို့နယ် အတွင်း အစိုးရ တပ်မတော်နှင့် နယ်ခြားစောင့်တပ်တို့ပူးပေါင်းပြီး သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော်  RCSS/SSA ၏ တပ်စခန်းကို ပစ်ခတ်ခဲ့သည်။

Leave a Comments

SHARE