RCSS/SSAအဖွဲ့ဝင် ၄ဦး၊ မြန်မာ့တပ်မတော်က ဖမ်းဆီးခေါ်ဆောင်သွား

သျှမ်းပြည်အရှေ့ပိုင်း ကျိုင်းတုံမြို့နယ် အတွင်း RCSS တပ်ဖွဲ့ဝင် ၄ ဦးကို ဆက်ကြေးကောက် သံသယရှိသည်ဟု စွပ်စွဲကာ အစိုးရ တပ်မတော်က ဖမ်းဆီးခေါ်ဆောင်သွားသည်ဟု စုံစမ်းသိရှိရသည်။

Photo by Tai Freedom/ facebook

အဆိုပါ ဖမ်းဆီးခေါ်ဆောင်သွားသည့် တပ်ဖွဲ့မှာ ကျိုင်းတုံအခြေစိုက် ရွှေတြိဂံတိုင်း စစ်ဌာနချုပ် တပ်ရင်း ၂၄၅ နှင့် စစ်ဘက်ရေးရာ လုံခြုံရေး တပ်ဖွဲ့ တို့ဖြစ်ကြောင်း ကျိုင်းတုံမြို့ရှိ RCSS/SSA ၏ ဆက်ဆံရေးရုံးတာဝန်ခံ ဒုတိယဗိုလ်မှူးကြီး စိုင်းစောမိဏ်း က ပြောသည်။

“သူတို့ စွပ်စွဲတာပါ။ ကျနော်တို့ တပ်ဖွဲ့ဝင်တွေဟာ RCSS ရဲ့ မူဘောင်အရ အကူညီတောင်းတယ်ဆိုတာ တစ်မျိုးလေ အတင်းအဓမ္မ မဟုတ်ပါဘူး။ ပြည်သူလူထုကို ဝန်ထုပ်ဝန်ပိုးမဖြစ်စေရန် ဆိုတာ ကျနော်တို့လည်း နားလည်သဘောပေါက်ပါတယ်” ဟု ဒုတိယဗိုလ်မှူးကြီး စိုင်းစောမိဏ်း က သျှမ်းသံတော်ဆင့် ကိုပြောသည်။

မေလ ၁၈ ရက်က ဖမ်းဆီးခေါ်ဆောင်သွားသည့် RCSS တပ်ဖွဲ့ဝင် ၃ ဦးနှင့် အမျိုးသမီး တစ်ဦး တို့ကို ကျိုင်းတုံမြို့မ ရဲစခန်းတွင် ပုဒ်မ ၃၆၈/၁၁၄ ဖြင့် အမှုဖြင့် အရေးယူထားကြောင်း သိရသည်။

“ လက်ရှိမှာသူတို့ ၄ဦးကို ဆက်ကြေး ကောက်တယ်ဆိုတဲ့ ကိစ္စနဲ့ အမှုဖွင့်ထားတာ ဟုတ်ပါတယ်။ ဒါပေမယ့် စိစစ်ဖို့ ရှိသေးတယ်။ ကျနော်တို့ သွားတွေ့ဖို့ အစီအစဉ်ရှိပါတယ်” ဟု ဒုဗိုလ်မှူးကြီး စိုင်းစောမိဏ်း ကဆိုသည်။

RCSS/SSA တပ်ဖွဲ့ဝင် ၄ဦးကို လာရောက် ဖမ်းဆီးသည့် အချိန်တွင် စရဖ အရာရှိ ၈ဦး နှင့် ရွှေတြိဂံတိုင်း စစ်ဌာနချုပ် တပ်ရင်း ၂၄၅ မှ တပ်သား ၁၁ ဦး တို့လာရောက်ဖမ်းဆီးကြောင်း၊ ယခုကဲ့သို့ဖမ်းဆီးမှုပုံစံလည်း မှားယွင်းနေကြောင်း ဒုဗိုလ်မှူးကြီး စိုင်းစောမိဏ်း က ထပ်လောင်း ပြောသည်။

RCSS/SSA သည် တနိုင်ငံလုံး အပစ်ခတ်ရပ်စဲရေး သဘောတူညီစာချုပ် (NCA )လက်မှတ်ရေးထိုးထားသည့် အဖွဲ့တစ်ဖွဲ့ဖြစ်ပြီး ဆက်ကြေးကောက်ခြင်း နှင့် အကူအညီ သွားရောက်တောင်းခံခြင်း သည် မတူညီကြောင်း RCSS ဘက်မှ ပြောကြားသည်။

“အကူညီတောင်းတယ်ဆိုတာ ကျနော်တို့ အဖွဲ့က ရှိတော့ရှိတယ်။ ဆက်ကြေးကောက်တယ်ဆိုတာက သူတို့ အမြင်သဘောဖြစ်သွားပြီ။ သူတို့ အမြင် နဲ့ ကျနော်တို့ အမြင် မတူဘူးလေ။ ဆက်ကြေးဆိုတာက အတင်းအဓမ္မသွားကောက်တာတွေ သွားတောင်း တာနဲ့ သွားကောက်တာ မတူဘူးလေ အမြင်ကွဲသွားတာပေါ့နော်”ဟု ဒုတိယ ဗိုလ်မှူးကြီး စိုင်းစောမိဏ်း ကပြောသည်။

RCSS/SSA တပ်ဖွဲ့ဝင် ၄ဦးကို ဖမ်းဆီးပြီး ကျိုင်းတုံရဲစခန်းတွင် ထားရှိထားသည် ဟု သိရှိရသည့်အတွက် သျှမ်းသံတော်ဆင့် မှ ကျိုင်းတုံ ရဲစခန်းကို အကြိမ်ကြိမ်ဆက်သွယ်မေးမြန်သော်လည်း ဆက်သွယ်မရရှိခဲ့ပေ။

ထို့အပြင် တပ်ပိုင်းဆိုင်ရာ ကိစ္စဖြစ်သည့် အတွက် မြန်မာ့တပ်မတော် သတင်းမှန်ပြန်ကြားရေးကို လည်း သျှမ်းသံတေ်ဆင့် က ဆက်သွယ်ခဲ့သော်လည်း ဖုန်းကိုင် ဖြေကြားခြင်း မရှိပေ။

ထိုအမှု နှင့် ပတ်သက်ပြီး RCSS/SSA ဘက်မှ ရင်ဆိုင်ဖြေရှင်းသွားမည် ဟု လည်း သိရသည်။


eastern_breeze
SHARE