သျှမ်းပြည်အရှေ့ပိုင်း ကျိုင်းတုံပြည်သူ့ဆေးရုံရှိ Covid-19 positive ပိုးတွေ့ လူနာ ၃ ဦးစလုံး ဆေးရုံမှ ဆင်းခွင့်မရသေးကြောင်းသိရသည်။
ကျိုင်းတုံပြည်သူ့ဆေးရုံရှိ ပိုးတွေ့ လူနာအမှတ် ၆၄ သည် ဧပြီလ ၁၁ ရက်တွင်လည်းကောင်း၊ ပိုးတွေ့လူနာ အမှတ် ၉၆ သည် ဧပြီလ ၁၈ ရက်ကလည်းကောင်း လူနာအမှတ် ၁၁၂ ကိုဧပြီလ ၂၀ ရက်နေ့ကလည်းကောင်း ပိုးတွေ့လူနာများအဖြစ် အစိုးရ၏ ကျန်းမာရေးဌာနက တရားဝင်ကြေငြာခဲ့သည်။
“လူနာ အမှတ် ၉၆ (ဆရာဝန်)က နှစ်ကြိမ် ဆက်တိုက် Negative ဖြစ်ပြီ။ အခု လူနာကို သီးသန့် အခန်းမှာ ၁၄ ရက် ထားထားတယ်။ ကြားထဲ ဘာမှ မဖြစ်ရင် ဆေးရုံက ဆင်းခွင့် ရတော့မယ်။ မေလ ၂၀ ရက်နေ့မှ ၁၄ ရက်ပြည့်မယ်။” ဟု ကျိုင်းတုံပြည်သူ့ဆေးရုံ ဒေါက်တာလှဌေးမင်း က သျှမ်းသံတော်ဆင့် ကိုပြောသည်။
လူနာ အမှတ် ၁၁၂ (သူနာပြု) နှင့် လူနာအမှတ် ၆၄ (မိုင်းဖြတ်မှလူငယ်) တို့ သည် ဓါတ်ခွဲနမူနာ စစ်သည့် အခါတွင် Negative တစ်ကြိမ်ဖြစ် Positive တစ်ကြိမ် ဖြစ် တစ်လှည့်စီ် ဖြစ်နေကြောင်း သိရသည်။
“သုံးယောက်စလုံးက ကျန်းမာရေးကောင်းမွန်နေကြတယ်။ လူနအမှတ် ၆၄ က ၅ ကြိမ်ရှိသွားပြီ စစ်တာ။ လူနာအမှတ် ၁၁၂ က တတိယအကြိမ် စစ်တော့ Negative ဖြစ်ပြီး စတုတ္တတအကြိမ်မှာ Positive ဖြစ်တယ်။လူနာအမှတ် ၆၄ ကလည်း တတိယအကြိမ်မှာ Negative ထွက်တယ်။ ၄ ကြိမ် နဲ့ ၅ ကြိမ်မှာ Positive ထွက်တယ်။” ဟု ကျိုင်းတုံပြည်သူ့ဆေးရုံ ဒေါက်တာလှဌေးမင်း က ပြောသည်။
ယနေ့တွင် မြန်မာနိုင်ငံတစ်ဝှမ်း Covid-19 ပိုးတွေ့ရှိသူ ၁၈၁ ဦး ရှိပြီး ပြန်လည် သက်သာလာသူ ၈၄ ဦး ၊ သေဆုံးသူ ၆ ဦး ရှိကြောင်း သိရသည်။
သျှမ်းပြည်နယ်တွင်မူ ပိုးတွေ့လူနာစုစုပေါင်း ၆ ဦးရှိပြီး ၂ ဦးမှာ သက်သာပျောက်ကင်း သွားပြီဖြစ်သဖြင့် ဆေးရုံမှ ဆင်းခွင့်သွားပြီဖြစ်ရာ လက်ရှိ ဆေးရုံတွင် ကိုဗစ် ၁၉ ကြောင့်ဆေးကုသ မှုခံယူနေသူလူနာ သျှမ်းပြည်အရှေ့ပိုင်း ကျိုင်းတုံပြည်သူ့ဆေးရုံတွင် ၃ ဦး နှင့် သျှမ်းပြည်တောင်ပိုင်း တောင်ကြီး စဝ်စံထွန်းဆေးရုံတွင် ၁ ဦး စုစုပေါင်း ၄ ဦး ကျန်ရှိနေပါသည်။
