ကိုဗစ် -၁၉ စတင်ဖြစ်ပွားရာ တရုတ်ပြည် ဝူဟန်မြို့တွင် အကျဉ်းကျသည့် မြန်မာနိုင်ငံသား ၂၆၀ ကျော် ယနေ့ မနက်ပိုင်းက သျှမ်းပြည်မြောက်ပိုင်း မူဆယ်မြို့သို့ပြန်လည်ဝင်ရောက်လာကြောင်း သိရသည်။

တရုတ်နိုင်ငံတွင် အကြောင်းအမျိုးမျိုးကြောင့် ဖမ်းဆီးထောင်ချခံရသည့် မြန်မာနိုင်ငံသား ၂၆၀ ကျော် အား မေလ ရ ရက် ယနေ့မနက်ပိုင်း က တရုတ်အာဏာပိုင်များက မြန်မာအာဏာပိုင်များထံ လွှဲအပ်ပေးရာ ထိုအထဲတွင် ကိုဗစ် စတင်ဖြစ်ပွါးရာ ဝူဟန်မြို့ ၌ အကျဉ်းကျသူ ၁၄၁ ဦး ပါဝင်ကြောင်း မူဆယ်မြို့ နယ် အုပ်ချုပ်ရေးမှူး ဦးသူရိန် ကသျှမ်းသံတော်ဆင့် သို့ ပြောသည်။

ထိုသူများကို ယနေ့ မနက်ပိုင်း တရုတ် အာဏာပိုင်များက သျှမ်းပြည် မြောက်ပိုင်း မူဆယ်မြို့နယ် လူဝင်မှု ကြီးကြပ်ရေးထံသို့ လွှဲပြောင်းပေးခဲ့သည်။

“ ဒီနေ့ တရုတ်ပြည် ဝူဟန်မြို့ က ၁၄၁ဦး၊ တခြားပြည်နယ်နဲ့ဆိုရင်တော့ ၂၆၀ကျော်ရှိတယ်။ မနေ့က လည်း တရုတ်ဘက်က ၅၈ ဦး လွှဲပြောင်းပေးတယ်” ဟု မူဆယ်မြို့နယ် အုပ်ချုပ်ရေးမှူး ဦးသူရိန် က သျှမ်းသံတော်ဆင့် သို့ ပြောသည်။

တရုတ်နိုင်ငံတွင် ပြဌာန်းထားသည့် သတ်မှတ်ချက် များနှင့် မကိုက်ညီသဖြင့် အကျဉ်းချခံနေရသူများဖြစ်ကြောင်း၊ အများစုသည် အလုပ်သမားများဖြစ်ကြောင်းလည်း ဦးသူရိန် က ပြောသည်။

“ မနက်ကတည်းကရောက်ပါတယ်။ ကျနော်တို့ကို လွှဲတဲ့အချိန်မှာ တရုတ်ပြည်ကလည်း ကျန်းမာရေးနဲ့ပတ်သက်တဲ့ စိစစ်ပြီးကြောင်းထောက်ခံချက်တွေ ပါပါတယ်။ ကျန်းမာကြောင်း ထောက်ခံချက်တွေပါတယ်။ သူတို့တွေကို Quarantine ထားပြီးသွားပြီလို့သိရတယ်” ဟု ဦးသူရိန် က ဆိုသည်။

တရုတ်ပြည် ထောင်အသီးသီးမှလွှဲပြောင်းလာခဲ့သူများအားလုံးကို လက်ရှိမှာ ကျန်းမာရေး စစ်ဆေးနေကြောင်း၊ ကျန်းမာရေး အတွက် ဖျားနာမှုရှိ၊ မရှိ စစ်ဆေးသည့် အပြင် ကျန်းမာရေး ဌာန မှ ညွှန်ကြားထားသည့် တဲ့ HIV/ AIDS ကိုလည်း ထည့်သွင်းစစ်ဆေးပေးကြောင်း သိရသည်။

လွှဲပြောင်းပေးသူများတွင် သျှမ်းပြည်သား ၁၂၀ ကျော်ပါရှိပြီး၊ ကျန်သူများမှာ ရန်ကုန်တိုင်း၊ မန္တလေးတိုင်း၊ ဧရာဝတီတိုင်း၊ စစ်ကိုင်းတိုင်း၊ ကချင်ပြည်နယ်၊ ချင်းပြည်နယ်၊ ရခိုင်ပြည်နယ်တို့တွင် နေထိုင်သူများဖြစ်ကြကြောင်းသိရသည်။

“ ကျနော်တို့ မြို့နယ်ထဲကလူတွေကိုဆက်လက်စောင့်ကြည့်ထိန်းသိမ်းထားမယ် ။ ကျန်တဲ့သူတွေကို သက်ဆိုင်ရာဒေသအသီးသီး ကို အဆင့်ဆင့် ချိတ်ဆက်ပြီးပို့မယ်” ဟု ဦးသူရိန် က ထပ်လောင်းပြောသည်။

ဝူဟန်မြို့အကျဉ်းထောင်မှ အကျဉ်းသားများပါလာသည့် အတွက် စိုးရိမ်မှု များစွာရှိကြောင်း၊ ထိုသူများကို ကျန်းမာရေး စစ်ဆေးမှု သေချာစွာ ပြုလုပ်ပေးသင့်ကြောင်း၊ ကိုဗစ် -၁၉ ရှိ၊မရှိ လည်း ဓာတ်ခွဲခန်း နမူနာ ပေးပို့ကာ စစ်ဆေးသင့်ကြောင်း မူဆယ် ဒေသခံများက ပြောသည်။

ဝူဟန်မြို့သည် လွန်ခဲ့သည် ၂၀၁၉ နှစ်ကုန် ပိုင်းတွင် ကိုဗစ်-၁၉ စတင်ဖြစ်ပွားခဲ့ရာ ယခုနောက်ပိုင်း မြန်မာပြည် အပါအဝင် တကမ္ဘာလုံး ထို ကပ်ဆိုးဖြင့် ရင်ဆိုင်းနေရကာ စီးပွားရေး၊ လူမှုရေး အားလုံးကျဆင်းကာ ခရီးသွားလာမှုများလည်း ရပ်ဆိုင်းထားရသည်။

ထိုသူများအတွက် နေရေးထိုင်ရေးကို မူဆယ်မြို့ သက်ဆိုင်ရာ ဌာန၊ မူဆယ်ဒေသခံများ နှင် ပရဟိတ အဖွဲ့တို့က ပူးပေါင်းကာ ဆောင်ရွက်ကြကြောင်း သိရသည်။

မြန်မာ-တရုတ်နယ်စပ် မူဆယ် မြို့ရှိ နယ်စပ်ဂိတ်များကို တရုတ်နိုင်ငံမှ ဧပြီ ၁ရက် မှစတင်ကာ ဝင်၊ထွက်ခွင့် ရက်အကန့် အသက်မရှိ ပိတ်လိုက်သည်။