ထိုင်းနိုင်ငံ ချင်းမိုင်မြို့၊ ဟန်ဒုံး (Hang Dong) မြို့နယ်အတွင်း တရားမဝင် နိုင်ငံခြားသားအလုပ်သမား ၃ ဦးကို ဖမ်းဆီးရမိခဲ့ကြောင်း ချင်းမိုင်သတင်းတွင် ဖော်ပြသည်။

ယမန်နေ့ (ဇွန်လ ၁၆ ရက်) က ချင်းမိုင်လူဝင်မှုကြီးကြပ်ရေးဌာနနှင့် ပူးပေါင်းအဖွဲ့သည် ဟန်ဒုံးမြို့နယ်၊ နောင်ခွိုင်တိုက်နယ် (Nong Khwai) အတွင်းရှိ သတင်းရရှိသည့် နယ်မြေကို ဝင်ရောက်စစ်ဆေးခဲ့ရာ တရားမဝင် အလုပ်လုပ်ကိုင်နေသည့် တရုတ်နိုင်ငံသား ၁ ဦးနှင့် စည်းကမ်းဖောက်ဖျက်ထားသည့် မြန်မာနိုင်ငံသား ၁ ဦးတို့ကို ဖမ်းဆီးရမိခဲ့သည်။

စစ်ဆေးချက်အရ တရုတ်နိုင်ငံသားဖြစ်သူသည် ထိုင်းနိုင်ငံအတွင်းသို့ DTV (Destination Thailand Visa) အမျိုးအစား ဗီဇာဖြင့် ဝင်ရောက်လာသူ ဖြစ်သော်လည်း အလုပ်လုပ်ကိုင်ခွင့် (Work Permit) တစ်စုံတစ်ရာ လျှောက်ထားခြင်းမရှိဘဲ တရုတ်ပြည်တွင်းရှိ တရုတ်လူမျိုးများထံသို့ အွန်လိုင်းမှတစ်ဆင့် ထိုင်းရိုးရာ ဘုရားဆင်းတုတော်များနှင့် အဆောင်လက်ဖွဲ့များကို ရောင်းချနေစဉ် ဖမ်းဆီးခံခဲ့ရခြင်း ဖြစ်သည်။

ထိုဖမ်းဆီးမှုအတွင်း ၎င်းတရုတ်နိုင်ငံသား ငှားရမ်းထားသော နေအိမ်၌ အိမ်အကူအဖြစ် လုပ်ကိုင်နေသည့် မြန်မာနိုင်ငံသားတစ်ဦးကိုလည်း တွေ့ရှိခဲ့ရပြီး အဆိုပါအိမ်တွင် အလုပ်လုပ်ကိုင်နေသည်မှာ တစ်လခန့်ရှိပြီဖြစ်သော်လည်း အလုပ်ရှင်ပြောင်းလဲမှုအား သက်ဆိုင်ရာသို့ အကြောင်းကြားထားခြင်းမရှိသည့်အတွက် စည်းကမ်းဖောက်ဖျက်မှုဖြင့် ဖမ်းဆီးခံခဲ့ရသည်။

လက်ရှိတွင် ဖမ်းဆီးခံရသူ တရုတ်နိုင်ငံသားနှင့် မြန်မာနိုင်ငံသားတို့ကို သက်ဆိုင်ရာရဲစခန်းသို့ လွှဲပြောင်းကာ တရားဥပဒေအရ ဆက်လက်အရေးယူနိုင်ရန် လုပ်ဆောင်လျက်ရှိသည်။

အလားတူ တစ်ရက်တည်းတွင်ပင် (ဇွန်လ ၁၆ ရက်) ချင်းမိုင်လဝက ပူးပေါင်းအဖွဲ့သည် ဟန်ဒုံးမြို့နယ်၊ ဆော့မဲခါတိုက်နယ် (Sop Mae Kha) အတွင်းရှိ ပျံကျဈေးဆိုင်ခန်းများသို့ ကွင်းဆင်းစစ်ဆေးခဲ့သည်။

စစ်ဆေးမှုအတွင်း သစ်သီးဆိုင်ခန်းတစ်ခု၌ သစ်သီးများ ကိုယ်တိုင်ရောင်းချနေသည့် တရားဝင်နိုင်ငံသားမှတ်ပုံတင်ထားခြင်းမရှိသူ (နိုင်ငံမဲ့/စာရင်းမရှိ နေထိုင်သူ) ၁ ဦးကို တွေ့ရှိခဲ့ပြီး အလုပ်လုပ်ကိုင်ခွင့်တစ်စုံတစ်ရာမရှိဘဲ လုပ်ကိုင်နေသည်ကို စိစစ်တွေ့ရှိခဲ့သည်။

အဆိုပါ နိုင်ငံမဲ့အမျိုးသမီးသည် ၎င်းရောင်းချနေသည့် သစ်သီးဆိုင်ကို ဖွင့်လှစ်ရောင်းချလာခဲ့သည်မှာ ၂ နှစ်ခန့်ရှိပြီဖြစ်ကြောင်း ဝန်ခံထွက်ဆိုခဲ့သည်။

ထိုနောက် ချင်းမိုင်လူဝင်မှုကြီးကြပ်ရေးအဖွဲ့က လူဝင်မှုကြီးကြပ်ရေးအက်ဥပဒေအရ တရားဥပဒေကြောင်းအရ ဆက်လက်စစ်ဆေးအရေးယူနိုင်ရန်အတွက် ဟန်ဒေါင်းရဲစခန်းမှ စုံစမ်းစစ်ဆေးရေးအရာရှိများထံသို့ လွှဲပြောင်းပေးအပ်ကာ အမှုဖွင့်လှစ်ထားကြောင်း သတင်းရရှိသည်။

ကိုးကား – Chiang Mai News