သျှမ်းပြည်မြောက်ပိုင်း လားရှိုး ပြည်သူ့ဆေးရုံ တွင် ဆေးကုသမှု ခံယူနေသည့် ကိုဗစ်-၁၉ အမှတ် (၁၄) သည် ယနေ့ ဆေးရုံမှ ဆင်းခွင့်ရကြောင်း လားရှိုးပြည်သူ့ဆေးရုံ မှ စုံစမ်းသိရှိရသည်။
ယနေ့ မေလ ၂ ရက် လူနာ အမှတ် (၁၄) လားရှိုးပြည်သူ့ဆေးရုံမှ ဆင်းခွင့်ရပြီး ကျောက်မဲဆေးရုံတွင် ၁ ပတ်စောင့်ကြည့်သွားမည်ဖြစ် ဖြစ်ကြောင်း သိရသည်။
“ပြောရရင်တော့ ကျောက်မဲ လူနာ အမှတ် ၁၄ က လားရှိုး ဆေးရုံကို စရောက် ကတည်းက ၁ ရက် ၂ ရက်လောက်က သူ လုံးဝ နေကောင်းသွားတာပါ။ နမူနာယူပြီး ပြန်စစ်တဲ့ချိန်မှာ ပိုးက မကုန်လို့ ဆေးရုံမှာ ဆက်ထားပြီး ကုနေရတာ။ နောက်ဆုံး ၂ ကြိမ် စစ်တဲ့ခါမှာတော့ ပိုးမတွေ့တဲ့အတွက် ဒီနေ့ပဲ ဆေးရုံက ဆင်းခွင့်ပေးလိုက်တာ ဖြစ်ပါတယ်”ဟု လားရှိုးပြည်သူ့ဆေးရုံ မှဒေါက်တာဉာဏ်မြင့် ကသျှမ်းသံတော်ဆင့် ကိုပြောသည်။
သို့သော် လားရှိုးပြည်သူ့ဆေးရုံ မှ ဆင်းခွင့်ပေး သော်လည်း ကျာက်မဲဆေးရုံတွင် ၁ ပတ်စောင့်ကြည့်ထားပြီး၊ လူနာကျန်းမာရေးကောင်းပါက ကျောက်မဲဆေးရုံ မှ ဆင်းခွင့်ထပ်ပေးကာ လူနာ အိမ်တွင် ၂ ပတ် ဆက်နေထိုင်ပြီး မည်သူနှင့်မျှ ထိတွေ့ခွင့် ပေးမည်မဟုတ်ဘဲ ဆက် စောင့်ကြည့် သွားမည်ဖြစ်ကြောင်း သိရသည်။
“နောက် ၂ ပတ်နေပြီးရင် ပြန်လည် စစ်ဆေးသွားမယ်။ လားရှိုးဆေးရုံမှာ ပိုးတွေ့လူနာ က တစ်ယောက်ပဲ ရှိပါတယ်” ဟု ဒေါက်တာဉာဏ်မြင့် ကပြောသည်။
ပိုးတွေ့ လူနာ အမှတ် ၁၄ သည် လားရှိုးဆေးရုံသို့ မတ်လ ၃၁ ရက်နေ့ မှ မေလ ၂ ရက်နေ့ထိ ဆေးကုသမှု ခံယူခဲ့ကြောင်း သိရသည်။
အဆိုပါ ပိုးတွေ့လူနာ ၁၄ သည် ကျောက်မဲမြို့ တွင်နေထိုင်သူ ဖြစ်ပြီး အသက် ၂၄ နှစ်အရွယ် အမျိုးသားဖြစ်သည်။
ထိုင်းနိုင်ငံ ဘန်ကောက်မြို့မှ မြန်မာနိုင်ငံ တာချီလိတ်မြို့ သို့ မတ် ၂၅ရက် တွင် ရောက်ရှိလာခဲ့ကာ တာချီလိတ်မြို့တွင် ၂ ည တည်းခိုခဲ့ပြီး မတ်လ ၂၈ ရက်နေ့မှာ မန္တလေးမြို့သို့ လေယာဉ်ဖြင့် လာကြောင်း ထိုမှ တဆင့် သျှမ်းပြည်မြောက်ပိုင်း ကျောက်မဲမြို့ သို့ ကိုယ်ပိုင် ကားဖြင့် ပြန်ခဲ့ကြောင်းသိရသည်။
သျှမ်းပြည်နယ်တွင် Covid-19 ပိုး ရှိသူ ၇ ဦး အနက် ၂ ဦးသည် ပိုးကင်းစင် သူ ရှိလာပြီ ဖြစ်ကြောင်း သိရသည်။
Leave a Comments