သျှမ်းပြည် လားရှိုးမြို့တွင် စစ်ကောင်စီလက်အောက်ခံ ဌာနဆိုင်ရာ ရုံးများနှင့် ပြည်သူ့ဆေးရုံကြီးတို့ လုပ်ငန်းစတင်လည်ပတ်နေကြောင်း စုံစမ်းသိရသည်။

တရုတ်အကူအညီဖြင့် စစ်ကောင်စီ ပြန်လည်ထိန်းချုပ်ထားသည့် လားရှိုးမြို့ပေါ်တွင် ယမန်နေ့ (မေလ ၁ ရက်) မှ စတင်ပြီး စစ်ကောင်စီလက်အောက်ခံ စည်ပင်သာယာရေးဌာန၊ လူဝင်မှုကြီးကြပ်ရေး လဝက၊ မြို့နယ်ပညာရေးမှူးရုံးနှင့် ပြည့်သူ့ဆေးရုံကြီးတို့ စတင်ဖွင့်လှစ်ပြီး လုပ်ငန်းလည်ပတ်နေကြောင်း လားရှိုးဒေသခံများက ပြောသည်။

“ရုံးဝန်ထမ်းတွေ တော်တော်များများ မြို့ထဲပြန်ရောက်နေပြီ။ ဆေးရုံထဲမှာလည်း သန့်ရှင်းရေးလုပ်တဲ့လူတွေ အပြည့်ပဲ။ လမ်းမှာလည်း မော်တော်ပီကယ်တွေ ပြန်မြင်ရပြီ၊ ထောက်လှမ်းရေး SB တွေလည်း ပြန်ရောက်နေတယ်။ ဌာနပေါင်းစုံ ပြန်ရောက်ပြီလို့ ပြောလို့ရတယ်။ ဒါပေမယ့် အကုန်လုံးတော့ မဟုတ်သေးဘူး၊ ဖွဲ့စည်းပုံအတိုင်း အပြည့်တော့ မလည်ပတ်နိုင်သေးဘူး”ဟု လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

တောင်ကြီးမြို့ရောက် သျှမ်းပြည်မြောက်ပိုင်းမှ ဌာနဆိုင်ရာ ဝန်ထမ်းများနှင့် နေရပ်စွန့်ခွာခဲ့သည့် ဝန်ထမ်းများကို နယ်မြေအခြေအနေ ပြန်လည်အေးချမ်းလာခြင်းကြောင့် တာဝန်ပေးအပ်သည့် အချိန်တွင် မူလတာဝန်ကျရာ ဒေသများသို့ သွားရောက်နိုင်ရန်အတွက် စနစ်တကျ စုဖွဲ့ထားရန် စစ်ကောင်စီလက်အောက်ခံ သျှမ်းပြည်နယ်အစိုးရမှ ဧပြီလ (၁၉) ရက်စွဲဖြင့် ညွှန်ကြားချက် ထုတ်ပြန်ခဲ့သည်။

လက်ရှိတွင် ဧပြီလ (၂၂) ရက်က လားရှိုးမြို့ပေါ်သို့ ဝင်ရောက်လာခဲ့သည့် စစ်ကောင်စီလက်အောက်ခံ အရှေ့မြောက် တိုင်းစစ်ဌာနချုပ် (ရမခ) မှ စစ်ယာဉ်တန်း (၂၀၀) ကျော်လည်း လားရှိုးတက္ကသိုလ်၊ အမှတ် (၆၂၆) ထောက်ပို့တပ်၊ (၉၁၂) စစ်အင်ဂျင်နီယာတပ်ရင်းနှင့် ခလရ (၄၁) တပ်ရင်းတို့တွင် ပြန်လည်နေရာချထားကြောင်း ဒေသခံများထံမှ သိရသည်။

အလားတူ လားရှိုးမြို့ပေါ်သို့ စစ်ကောင်စီတပ် ပြန်လည်တပ်စွဲခဲ့သည့် ဧပြီလ ၂၂ ရက် နောက်ပိုင်းမှ စတင်ပြီး လားရှိုးမြို့ အဝင်အထွက် (၄) နေရာတွင် စစ်ဆေးရေးဂိတ်များ ဖွင့်လှစ်ကာ ဖြတ်သန်းသွားသည့် ခရီးသည်တင်ကားနှင့် ကုန်တင်ကားများကို ငွေတောင်းခံနေကြောင်း ဒေသခံများက ပြောသည်။

ကိုးကန့်တပ်ဖွဲ့ MNDAA မှ လားရှိုးမြို့ကို စစ်ကောင်စီထံ ပြန်လည်အပ်နှံပြီးနောက် မြို့ပေါ်တွင် MNDAA ဆက်ဆံရေးရုံး ဆက်လက်ထားရှိမည့်အပြင် တရုတ်နိုင်ငံမှ ကုန်သွယ်ရေးရုံး ဖွင့်လှစ်မည့် ကိစ္စများကို နှစ်ဘက်တပ်ဖွဲ့မှ တရားဝင် ထုတ်ပြန်ပြောဆိုခြင်း မရှိသေးပေ။

ထို့အပြင် စစ်ကောင်စီနှင့် MNDAA နှစ်ဘက်ပူးတွဲဖိတ်ခေါ်မှုကြောင့် လားရှိုးမြို့ လွှဲပြောင်းရေးအတွက် ဧပြီလ ၁၉ ရက်တွင် တရုတ်အစိုးရမှ စေလွှတ်ခဲ့သည့် ပစ်ခတ်ရပ်စဲမှု စောင့်ကြည့်ရေးအဖွဲ့လည်း ပြန်လည်ထွက်ခွာသွားခြင်း မရှိသေးကြောင်း ဒေသခံများက ပြောဆိုသည်။

လားရှိုးမြို့ပေါ် ရပ်ကွက် (၁၂) ခုတွင် စစ်ကောင်စီလက်အောက်ခံ ဌာနဆိုင်ရာ ရုံးများမှ စီမံအုပ်ချုပ်ပြီး ကိုးကန့်တပ်ဖွဲ့မှ ဘေးပတ်ဝန်းကျင်ရှိ ကျေးရွာများကို ဆက်လက်ထိန်းချုပ်ထားသည်။

ပုံစာ – လားရှိုးဆေးရုံကြီးတွင် စစ်ကောင်စီဝန်ထမ်းများ သန့်ရှင်းရေးပြုလုပ်နေစဉ်