သျှမ်းပြည်တောင်ပိုင်း ညောင်ရွှေမြို့နယ်ရှိ အင်းလေးကန်ကြီး ရေခမ်းခြောက်မှု နှင့် ပတ်သက်ပြီး ဒေသခံများ လယ်ယာစိုက်ပျိုးမှုခက်ခဲ နေကြောင်း ဒေသခံများက ပြောဆိုကြသည်။
အင်လေးဒေသခံများသည် လယ်ယာစိုက်ပျိုးရေး နှင့် ခရီးသွားလုပ်ငန်းကို အဓိက အသက်မွေးဝမ်းကြောင်း ပြုလုပ်ခဲ့သည်။
“အင်းလယ်တွေ ရေခမ်းနေတဲ့အချိန်မှာ စိုက်ပျိုးရေး နဲ့ပတ်သက်ပြီး လယ်သမားတွေက တော်တော်လေးကို ဒုက္ခရောက်ပြီး စက်လှေတွေနဲ့ ခုတ်ပြီးမှ ရေတင်နေရတာ အဲ့ဒီလို အခြေအနေ ဖြစ်နေတယ်။ ရေက တအားကို ခမ်းနေတာ အဘ တို့ဒီမှာ အရမ်းခက်ခဲပါတယ်။ သွားရတဲ့ လမ်းကြောင်းကလည်း ခက်ခဲတယ်။” ဟု အင်းလေးဒေသခံ စိုက်ပျိုးရေးတောင်သူ ဦးဖိုးလေး ကပြောသည်။
တပေါင်း တန်ခူးလအတွင်း မိုးမရွာခဲ့ပါက အင်းလယ်ရေထည့်ချိန်တွင် အခက်အခဲဖြစ်ရပြီး လယ်ရေသွင်းရာတွင်လည်း ၃ ရက် တစ်ခါ ရေပြန်ခုတ်တင် နေရကြောင်း ဒေသခံများက ပြောဆိုကြသည်။
“လယ်ထဲမှာ ရေက ကြာကြာမနေဘူး ၃ ရက်လောက်ပဲနေတယ်။ ရေက ပြန်ခမ်းရင် ပြန်ခုတ် ဝင့် ( မလိုအပ်သည့်မြက်ပင်) နုတ်တဲ့ချိန်မှာလဲ လယ်ထဲကို ရေပြန်ထည့်ရတယ်” ဟုအင်းလေး ဒေသခံ တောင်သူ တဦးက ပြောသည်။
အင်းလေး ရေခမ်းခြောက်မှုသည် နှစ်စဉ် နွေရာသီရောက်တိုင်း ကြုံတွေ့ရသော်လည်း ယခုနှစ်သည် ပိုပြီး ခမ်းခြောက်ကာ လယ်ယာအတွက် အခက်အခဲကြုံဒုက္ခရောက်ကြောင်းလည်း အဆိုပါ တောင်သူက ဆိုသည်။
“ ရေ ကို အရမ်းလိုအပ်တယ်။ ရေခမ်း ခြောက် တော့ လယ် လုပ်ရတာ တော်တော် ဒုက္ခရောက်တယ်။ ဒီချိန် တော်တော် ဒုက္ခရောက်တဲ့ချိန်တယ်” ဟု အင်းလေး တောင်သူ ကထပ်လောင်းပြောသည်။
အင်းလေး ကန် ရေခမ်းခြောက်မှုသည် ၂၀၁၀ ခုနှစ်မှ စတင်ကာ ဖြစ်လာခဲ့ပြီး ယခုနောက်ပိုင်း ပိုပြီးခမ်းခြောက်ကာ ဒေသခံများအတွက် သောက်သုံးရေ လည်း ခက်ခဲလာကြောင်း အင်းလေးကန် ဒေသခံ များက ပြောသည်။
ယခုနှစ် COVID-19 ကူးစက်မြန်ရောဂါကို ကမ္ဘာတဝှမ်း ရင်ဆိုင်ကြုံရသဖြင့် အင်းလေးကန်ကို လာရောက်လည်ပတ်သည့် ခရီးသွားဧည့်သည်များပါးကာ ဒေသခံများတွက်လည်း ဝင်ငွေမရတော့ကြောင်း သိရသည်။
“ အင်းလေးကန်ကလည်း ရေခမ်း၊ လယ်ယာ စိုက်ပျိုးရေးကလည်း မလုပ်နိုင်၊ နောက် ကိုဗစ်ကြောင့် ဧည့်သည်ကမရှိ။ ဝင်ငွေမရှိဘူး။ ဒီနှစ် တော့ ဝင်ငွေတွေ မရှိဘူး။ အရမ်းခက်ခဲတယ်” ဟု အင်းလေးကန်ကို မှီတင်းလုပ်ကိုင်နေသည့် မသန္တာ က ပြောသည်။
အင်းလေး ဒေသခံ ပြည်သူများသည် ခရီးသွားလုပ်ငန်းနှင့် တောင်ယာ အလုပ်အကိုင် ကို အဓိက လုပ်ကိုင်သည့် သူများဖြစ်သည်။
