သျှမ်းပြည် တောင်ကြီးခရိုင် ညောင်ရွှေမြို့နယ် အင်းလေးအနောက်ဘက်ခြမ်းတွင် စစ်ကောင်စီ နှင့် သျှမ်းတောင် PDF တို့ တိုက်ပွဲဖြစ်ပွားခဲ့ကြောင်း စုံစမ်းရရှိသည်။
ယမန်နေ့ (ဇန်နဝါရီ ၃) နေ့လည် ၁ နာရီဝန်းကျင်တွင် စစ်ကောင်စီ နှင့် သျှမ်းတောင် PDF တို့သည် အင်းလေးကန်အနောက်ဘက်ခြမ်း ဘုရားနီးကျေးရွာ နှင့် သန်းတောင်ကျေးရွာ ကြားတွင် တိုက်ပွဲဖြစ်ပွားခဲ့ကြောင်း ဒေသခံများထံ သိရှိရသည်။
“ တိုက်ပွဲဖြစ်တာတော့ သေချာတယ်။ မနေ့က နေ့လည် ၁ နာရီခွဲလောက်မှာဖြစ်တယ်လို့ ကြားတယ်။ သတင်းအပြင်မထွက်အောင်တော့ ယာယီထိန်းထားတယ်ထင်တယ်” ဟု PDF နှင့် ရင်းနှီးသူတစ်ဦးက ပြောသည်။
ထိုတိုက်ပွဲကြောင့် နှစ်ဦးနှစ်ဖက် ထိခိုက်ဒဏ်ရာရရှိမှုနှင့် သေဆုံးမှုများ ရှိကြောင်း ဒေသခံများ ပြောပြချက်အရ သိရသော်လည်း သျှမ်းသံတော်ဆင့်အနေဖြင့် အတည်ပြုချက်မရရှိသေးပေ။
“ သေဆုံးမှုတော့ရှိတယ်။ အခုလောလောဆယ် ညောင်ရွှေဆေးရုံမှာ သေဆုံးတဲ့ ရုပ်အလောင်းတွေ ရောက်ရှိနေတယ်လို့ကြားတယ်။ ဘယ်သူဘယ်ဝါလဲဆိုတာတော့ အသေချာမသိရသေးဘူး။ ဖမ်းဆီးခံရတာတွေ လည်းရှိတယ်တဲ့” ဟု အထက်ပါသူက ပြောသည်။
အလားတူ အင်းလေးဒေသခံတစ်ဦးကလည်း “ ကျနော်တို့လည်း အဲ့လိုကြားတယ်။ ဖမ်းခံရတာတွေ၊ သေဆုံးတာတွေရှိတယ်လို့ကြားတယ်။ ဘယ်သူဘယ်ဝါလည်းတော့ အသေချာမသိသေးဘူး” ဟု ၎င်းက ပြောသည်။
စစ်တပ်အာဏာသိမ်းပြီး ယခု ၂၀၂၃ ခုနှစ်ထဲတွင် သျှမ်းပြည် တောင်ကြီးခရိုင် အင်းလေးကန်ဒေသအတွင်း စစ်ကောင်စီနှင့် သျှမ်းတောင် PDF တို့ ပထမဆုံးဖြစ်သည့်တိုက်ပွဲဖြစ်သည်။
Leave a Comments