စစ်ကိုင်းတိုင်းဒေသကြီး ချင်းတွင်းမြစ် အထက်ပိုင်း ဟုမ္မလင်းမြို့နယ် အတွင်း သျှမ်းနီ အမျိုးသား တပ်မတော် (SNA) နှင့် အစိုးရ တပ်မတော်တို့ စစ်ရေး တင်းမာမှု ကြား ရှိနေသေးသဖြင့် ဒေသခံများ စိုးရိမ်ထိတ်လန့်နေရကြောင်း သတင်းရရှိသည်။
လက်ရှိ အချိန်ကာလတွင် မြန်မာနိုင်ငံတွင် ကိုဗစ်-၁၉ လူနာ ဦးရေ မြင့်တက်လာပြီး အနယ်နယ် အရပ်ရပ်မှ ကိုဗစ်-၁၉ အတွက် စိုးရိမ်နေချိန် ဟုမ္မလင်းမြို့နယ် အတွင်း တိုက်ပွဲများဖြစ်ပွားများကို စိုးရိမ်နေရကြောင်း ဟုမ္မလင်းမြို့နယ် ချောင်းကြီး ဒေသခံ ဆေစိုင်းလင်း က သျှမ်းသံတော်ဆင့် သို့ပြောသည်။
“ အခုက ကိုဗစ်ကိုလည်း ကြောက်နေရ၊ တိုက်ပွဲဖြစ်မှာလည်း စိုးရိမ်နေရတယ်။ ကိုဗစ် ကာလမှာတော့ တိုက်ပွဲမဖြစ်စေချင်ဘူး” ဟု ဆေစိုင်းလင်း က ဆိုသည်။
စစ်ကိုင်းတိုင်းဒေသကြီး ချင်းတွင်း မြစ် အထက်ပိုင်း ဟုမ္မလင်းမြို့နယ် ချောင်းကြီး ဒေသတွင် တပ်မတော်နှင့် SNA တို့သည် ဧပြီ ၁၇ရက်မှ ဧပြီ ၁၈ ရက်ထိ တိုက်ပွဲပြင်းထန်းခဲ့ပြီး လက်ရှိမှာ စစ်ရေး တင်းမာနေကြောင်းလည်း SNA ပြောခွင့်ရ ဗိုလ်မှူးကြီး ဆေစိုင်းထွန်း က သျှမ်းသံတော်ဆင့် သို့ ပြောသည်။
“ တိုက်ပွဲ က နားတာ ၂ရက်တော့ရှိပြီ။ သူတို့ဘက်က စစ်အင်အားပြန်ဖြည့်ထားတယ်။ စစ်ရေး ကတော့ တင်းမာနေဆဲပါ” ဟု ဆေစိုင်းထွန်းက ဆိုသည်။
လက်ရှိ မြန်မာတဝှမ်းတွင် ကိုဗစ်-၁၉ ထိန်းချုပ်ကာကွယ်သည့် ကာလဖြစ်သည့်အတွက် တိုက်ပွဲများ မဖြစ်ရန်နှင့် တပ်မတော် အနေဖြင့် သက်နိုင်သမျှ တိုက်ပွဲကို ရှောင်ရှားစေချင်ကြောင်း လည်း ဆေစိုင်းထွန်းက ပြောသည်။
“ မြန်မာပြည်တဝှမ်း ကိုဗစ်-၁၉ ကာကွယ်နေချိန် တိုက်ပွဲမဖြစ်ချင်ဘူး” ဟု ဆေစိုင်းထွန်းက ဆိုသည်။
တပ်မတော်နှင့် SNA တိုက်ပွဲဖြစ်ပွားသည့်နေရာသည် အရပ်သားများနေထိုင်သည့်နေရာနှင့် နီးနေသဖြင့် သေနတ်သံများ၊ လက်နက်ကြီးသံများ ကြားရကြောင်း၊ ဒေသခံများလည်း တိုက်ပွဲ ထပ်မံဖြစ်ပွားမည်ကိုစိုးရိမ်စိတ်ဖြင့်နေထိုင်နေရကြောင်း ချောင်းကြီး ဒေသခံများက ပြောသည်။
ထို့ပြင် တပ်မတော်သည် SNA တပ်ဖွဲ့များကို စစ်သားစုဆောင်းရေး ဖမ်းဆီးခြင်း၊ ပေါ်တာဆွဲခြင်းများ၊ ပြည်သူများကို အကြောင်းမဲ့ အနိုင်ကျင့် နှိပ်စစ်သတ်ဖြတ်ခြင်း ပြုလုပ်နေသည့် မဟုတ်မမှတ် ဝါဒဖြန့်နေသည့် အပေါ် မပြုလုပ်ရန် လည်း SNA က ယနေ့ရက်စွဲဖြင့် ထုတ်ပြန်ချက် တွင် ဖော်ပြထားသည်။
“ တပ်မတော်အနေနဲ့ ဝါဒဖြန့်နေတာ ရပ်စေချင်တယ်။ အခု ဟုမ္မလင်းမြို့နယ်မှာ SNAရဲ့ မဟုတ်မှန်တဲ့သတင်းကို လိုက်ဖြန့်နေတယ်။ ဒါကို ရပ်ပေးဖို့ ပြောချင်တယ်” ဟု လည်း ဆေစိုင်းထွန်းက ပြောသည်။
တပ်မတော် နှင့် SNA သည် ၂၀၁၆ ခုနစ်တွင် အိန္ဒိယ နယ်စပ်တွင် တကြိမ်၊ ၂၀၁၇ ခုနစ်တွင် ဟုမ္မလင်းမြို့နယ် တွင် တကြိမ်တိုက်ပွဲဖြစ်ပွားခဲ့ပြီး ယခု ၂၀၂၀ခုနစ်တွင် ဟုမ္မလင်းမြို့နယ် အတွင်း ပထမဆုံး အကြိမ်ပြန်ဖြစ်သည့် တိုက်ပွဲဖြစ်ကြောင်း သိရသည်။
SNA တပ်သည် ၁၉၈၉ ခုနစ်တွင် စတင်ဖွဲ့စည်းခဲ့ပြီး သျှမ်းနီ လက်နက်ကိုင် အဖွဲ့ ဖြစ်ပြီး ကချင်ပြည်နယ် နှင့် စစ်ကိုင်းတိုင်း ဒေသကြီး ချင်းတွင်းမြစ် အထက်ပိုင်း နှင့် အိန္ဒိယ နယ်စပ်တလျောက် လှုပ်ရှားလျက်ရှိသည်။
Leave a Comments