သျှမ်းပြည်တွင်း ည မထွက်ရ အမိန့် သည် ရောဂါ အခြေနေပေါ် မူတည်ပြီး အချိန်အတိုးအလျော့ ပြုလုပ်သွားရန် ရှိကြောင်း သျှမ်းပြည် အစိုးရ က ပြောဆိုလိုက်သည်။
အဆိုပါ အမိန့်သည် COVID-19 ကာကွယ်ထိန်းချုပ်နိုင်ရန်အတွက် ဧပြီ ၂၀ ရက်နေ့မှ စတင်ကာ ည ၁၀ နာရီမှ မနက် ၄ နာရီထိ ဖြစ်ပြီး ၎င်း ထုတ်ပြန်ချက်သည် မေလ ၁၉ ရက်နေ့ ထိ ဖြစ်ကြောင်း သိရသည်။
“အဓိက တော့ ရောဂါထပ်ဖြစ်ပွားမှုမရှိစေရန် နဲ့ ကာကွယ်ထိန်းချုပ် ကုသ တုံ့ပြန် ကုသနိုင်ရေးအတွက် အဓိက ရည်ရွယ်ပါတယ်။ တကယ်လို့ ရောဂါဖြစ်ပွားမှုများလာတယ်။ ရောဂါ ထိန်းချုပ်နိုင်မှုပေါ် မူတည်ပြီးတော့ အချိန် အတိုးအလျော့ လုပ်သွားဖို့ အစီစဉ်ရှိပါတယ်။” ဟု သျှမ်းပြည် အစိုးရ ပြောခွင့်ရ စီမံကိန်း နှင့် ဘဏ္ဍရေးဝန်ကြီး ဦးစိုးညွန့်လွင် ကပြောသည်။
သျှမ်းပြည်တွင်းရှိ မြို့နယ် ( ၅၅) မြို့နယ်အနက် ညမထွက်ရအမိန့် ထုတ်ပြန်ထားသည့် ကိုးကန့် ကိုယ်ပိုင်အုပ်ချုပ်ခွင့်ရဒေသရှိ မြို့နယ် (၂) မြို့နယ် နှင့် ဝင်မရမြို့နယ် ၅ မြို့နယ် မှ လွှဲပြီး ကျန် ၄၈ မြို့နယ် တွင် ည မထွက်ရ အမိန့် ထုတ်ပြန်ထားကြောင်း သိရသည်။
သျှမ်းပြည် အစိုးရ အနေဖြင့် ညမထွက်ရ အမိန့်ကို ယနေ့ထုတ် ယနေ့အတည်ပြု ခြင်းသည် သျှမ်းပြည် လူထုများအတွက် အဆင်မပြေမှုများဖြစ်ကြောင်း လည်း သျှမ်းမြောက်ဒေသခံများက ပြောဆိုလိုက်သည်။
“ညမထွက်ရ အမိန့်သည် လုံခြုံရေးအတွက် ပိုကောင်းပေမယ့် ဒီလို ထုတ်ပြန်မယ်ဆိုတာ ပြည်သူကို ကြိုတင်အကြောင်းကြားရင် ပိုအဆင်ပြေတာပေါ့။ အခုထုတ် အခု အတည်ပြုပြီးတော့ တခါတည်း လုပ်လိုက်တော့ မဖြစ်သင့်ဘူးပေါ့ဗျာ။” ဟု မူဆယ်ဒေသခံ စိုင်းအောင် ကပြောသည်။
သျှမ်းပြည်တောင်ပိုင်း နမ့်စန်မြို့နယ်တွင်လည်း COVID-19 ကာကွယ်နိုင်ရန်အတွက် ညမထွက်ရ အမိန့် ကို ဧပြီ ပထမ ပတ်တွင် ထုတ်ပြန်ခဲ့သည်။
မြန်မာနိုင်ငံတွင် COVID-19 လူနာ ( ၁၁၁)ဦးရှိပြီး၊ သျှမ်းပြည်တွင်း COVID-19 ရောဂါပိုး တွေ့ရှိသူ ၄ ဦး ရှိပြီ ဖြစ်ကြောင်းသိရသည်။
မြန်မာနိုင်ငံတွင် COVID-19 ကြောင့် သေဆုံးသူ ၅ဦးရှိပြီဖြစ်ကြောင်း ကျန်းမာရေး နှင့် အားကစားဝန်ကြီးဌာန ထုတ်ပြန်ထားသည်။
Leave a Comments