သျှမ်းပြည် တောင်ပိုင်း မိုင်းပန်မြို့နယ် အတွင်း ကိုဗစ် ၁၉ နှင့်ပတ်သက်ပြီးကျေးလက်အတွင်း ကွင်းဆင်းဆေးစစ်မှု ပေးနေသော RCSS/SSA တပ်နှင့် အစိုးရတပ်မတော်တို့ တိုက်ပွဲဖြစ်ပွါးခဲ့ကြောင်းသိရသည်။
ဧပြီလ ၁၂ ရက် ညနေ ၃ နာရီဝန်းကျင်က မိုင်းပန်မြို့နယ် နားဝန် ကျေးရွာ အနီးတွင် သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည် တပ်မတော်( RCSS/SSA)နှင့် အစိုးရ တပ်မတော်တို့ ၁၅ မိနစ်ခန့်အကြာ ထိတွေ့မှု ဖြစ်ပွားခဲ့ကြောင်း RCSS/SSA ပြောရေးဆိုခွင့်ရှိသူ ဒုတိယ ဗိုလ်မှူးကြီးအုမ်ခေး က သျှမ်းသံတော်ဆင့် သို့ ပြောသည်။
“ ထိတွေ့မှုဖြစ်တာပါ။ ၁၅ မိနစ်ပါပဲ။ အစိုးရ တပ်ကကျနော်တို့ ဆက်ဆံရေးရုံးကို သတင်းမပို့ဘဲ သွားချင်တိုင်းသွားတော့ ကျနော်တို့ တပ်နဲ့ထိတွေ့မှုဖြစ်သွားတာပါ” ဟု ဒုတိယ ဗိုလ်မှူးကြီး စိုင်းအုမ်ခေး က ဆိုသည်။
RCSS/SSA နှင့် ထိတွေ့မှုဖြစ်ပွါးခဲ့သော အစိုးရ တပ်မတော်သည်မိုင်းပန်မြို့နယ် နားဝန်ကျေးရွာအုပ်စု ကောင်းပက်ရွာနှင့်နောင်လေရွာအကြား အခြေစိုက်သည့် ရလခတိုင်း လက်အောက်ခံ ခမရ ၁၅၃ တပ်
ဖြစ်ကြောင်း သိရသည်။
အဆိုပါတပ်သည် ဧပြီလဆန်းကတည်းက ကျေးရွာများသို့ ကွင်းဆင်းကာ ကိုဗစ် ၁၉ နှင့်ပတ်သက်ပြီး ဆေးစစ်မှု၊ ကူညီထောက်ပံ့မှုပေးနေသည့် RCSS/SSA ၏ ကျန်းမာရေးအဖွဲ့အား လိုက်လံဟန့်တားနေသောတပ်ဖွဲ့ ဖြစ်ကြောင်း၊ ရွာသားများအားလည်း ဆေးစစ်မှုလက်မခံရန် တားမြစ်သည်ဟု RCSS/SSA ဘက်က ပြောပါသည်။
