ကိုးဗစ်အရေးလက်တွဲပူးပေါင်းမှုမပေး အချင်းချင်းခြေထိုးလိုက်သေး

0

တရုတ်နိုင်ငံက စခဲ့တဲ့ ကိုးဗစ် ၁၉ ကိုရိုနာဗိုင်းရပ်စ် ရောဂါဟာ ကမ္ဘာ့နိုင်ငံပေါင်း ၂၁၀ နိုင်ငံ လူသန်းဂဏန်း ကူးစက်ပျံ့ပွားနေပြီး လူဉီးရေ တသိန်းကျော်သေဆုံးနေတာကို ပြည်ထောင်စု မြန်မာနိုင်ငံမှာလည်း အဘက်ဘက် လက်တွဲ ပူးပေါင်းလုပ်ဆောင်ရမဲ့အချိန် ဖြစ်နေပါပြီ။ သို့ပေမယ့် လက်ရှိကွင်းပြင်အနေအထားမှာတော့ ပူးပေါင်းကာကွယ်မှုမပြုတဲ့အပြင် အပြန်အလှန်ခြေထိုးမှုတွေ မြင်တွေ့နေရပြီး လူထုဟာ မြေဇာပင်ဖြစ်နေရပါတယ်။

Editor

ပြည်ထောင်စု တ၀ှမ်းလုံးကို ခြုံငုံကြည့်ရင် လူထု အပါ အ၀င် အဘက်ဘက် ပါ၀င်ထောက်ခံအားပေးမှု နဲ့ အတူ အစိုးရ က တာ၀န်အရှိဆုံးပါ။

သို့ပေမယ့် ဖြစ်ပေါ်နေတဲ့ အနေအထားက အစိုးရ က တဘက်၊ တပ်မတော်က တဘက် ၊ နယ်စပ်ဒေသ မှာ တော့ တိုင်းရင်းသားလက်နက်ကိုင်တပ်ဖွဲ့ တွေက ကိုယ့်ဟာကို သီးခြားစီ တနိုင်တပိုင်လုပ် ဆောင်နေတာ တွေ့ရပါတယ်။ ဆိုတော့လက်တွဲ ပူးပေါင်းဆောင်ရွက်မှု က အရမ်းအားနည်း နေတဲ့ အပြင် သျှမ်းပြည် အတွင်းမှာ အပြန် အလှန် ခြေထိုးမှု တွေလဲ ရှိနေပါတယ်။

ကိုးဗစ် ၁၉ ကာလ လူထု ကို ကူညီထောက်ပံ့ မှု ခရီးစဉ် နဲ့ သျှမ်းပြည်တောင်ပိုင်း လင်းခေး မြို့ကို ပြီးခဲ့တဲ့အပတ်က ရောက်လာတဲ့ သျှမ်းပြည်နယ်အစိုးရ ၀န်ကြီး ဒေါက်တာညီညီအောင် ရဲ့ ကိုယ်ပိုင် လူမှုကွန်ရက်ဖေ့စ်ဘုခ် စာမျက်နှာ ပေါ် (ဘာရည်ရွယ်ချက်နဲ့ရေးလဲတော့မသိ) ရေးသားတဲ့ ခေါက်ဆွဲ တပွဲ စျေးနှုန်းနဲ့အတူ ပါလာတဲ့ လူမျိုးရေးဆန်ဆန်စကားအသုံးအနှုန်းကြောင့် တိုင်းရင်းသား စည်းလုံးညီညွှတ်မှု ကို ကယက်ရိုက်ခဲ့ပါတယ်။

စိတ်မကောင်းစရာ ဇါတ်လမ်းနောက်တခု က – ဧပြီလဆန်းပိုင်းက သျှမ်းပြည်တောင်ပိုင်းမှာ ဒေသအတွင်း RCSS/SSA သျှမ်းပြည်တပ်မတော် သျှမ်းပြည်ပြန်လည်ထူ ထောင်ရေးကောင်စီက ကွင်းဆင်းပြီး ခရီးသွားလာတဲ့ လူထုကို အပူချိန်တိုင်း လိုအပ်တဲ့ မျက်နှာဖုံးတွေ၊ လက်ဆေးရည် တွေ ၀ေငှ ခဲ့တာကို တပ်မတော်က စစ်ကြောင်းထိုးပြီး ဟန့်တားခဲ့ပါတယ်။ လူထုကို လဲ RCSS/SSA ရဲ့ ဆေးစစ်မှုကို လက်မခံ ဖို့ တားမြစ်ခဲ့ပါတယ်။

လူထု ဘ၀ က သေနတ်ကိုင်လာတဲ့သူမှန်သမျှ အာဏာရှိတဲ့သူမှန်သမျှကို ကြောက်နေရတဲ့ အခြေအနေပါ။ အခုလိုအချိန်မှာ ကျန်းမာရေးဆိုင်ရာ လာမစစ်ပေးနဲ့ လို့ ဘယ်သူမှ ပြောမှာမဟုတ်ပါ။ တပ်ဘက်က လာစစ်ဆေးရင်လဲ စစ်ခံချင်လဲစစ်၊ မစစ်ခံချင်လဲ စစ်ခံရမှာပါဘဲ။

ဒီအချိန်မှာ ကိုးဗစ်ရောဂါ ကြောင့် လူထု ဘ၀ တရပ်လုံး ဘာဆက်ဖြစ်မယ်ဆိုတာ ဘယ်သူမှ မပြောတတ် ပါဘူး။ အလုပ်လက်မဲ့ ဖြစ်နေတဲ့သူတွေ၊ အခြေခံလူတန်းစားတွေ ကူညီထောက်ပံ့မှု ရဖို့လဲ ဘယ်လောက်ထိ ထိရောက်မှာလဲ။

အာဏာတွေ၊ သေနတ်တွေကိုင်ပြီး လူထု ထောက်ခံမှု ရဖို့ အပြန်အလှန် ခြေထိုးနေတာဟာ တိုင်းပြည် အတွက် ကောင်းတဲ့ လက်ခဏာမဟုတ်ပါဘူး။ ဒီလုပ်ရပ်တွေကြောင့် ဧပြီ ၁၂ ရက်က မိုင်းပန်မြို့ တောင်ဘက် မှာ တပ် နဲ့ RCSS ကြားတိုက်ပွဲ ဖြစ်ပွားခဲ့ပါတယ်။ ဖြစ်ပွားတဲ့ တိုက်ပွဲကြောင့် နှစ်ဘက်ထိခိုက်မှုတွေ ရှိတဲ့အပြင် ကျေးလက်လူထု လဲ စစ်ရဲ့ မြေစာပင် ဖြစ်ခဲ့ရပါတယ်။

လက်ရှိအချိန်မှာ တတိုင်းပြည်လုံး တိုက်ပွဲမလုပ်ဖို့ ပစ်ခတ်မှုရပ်တန့် ဖို့ ကြေငြာသင့်ပြီး အားလုံး ပါ၀င်တဲ့ Covid 19 ပူးပေါင်းတိုက်ဖျက်ရေးလှုပ်ရှားမှုနဲ့ လူထု ဘ၀ ကို စုပေါင်းကာကွယ်သင့်တဲ့အချိန် ဖြစ်ပါကြောင်း။

 

လူထူအသံ

သျှမ်းသံတော်ဆင့်အသံ

 

Leave a Comments