ယခု ရက်ပိုင်း ကွတ်ခိုင်မြို့နယ် အတွင်း မူးယစ်ဆေးဝါး နှင့် လက်နက်၊ခဲယမ်းများ ဆက်တိုက်ဖမ်းဆီးရမိကာ တရားခံ တယောက်မျှ မမိကြောင်း သတင်းရရှိသည်။
သျှမ်းပြည် မြောက်ပိုင်း ကွတ်ခိုင်မြို့နယ် လွယ်ခမ်း ကျေးရွာ တွင် ဧပြီ ၉ ရက် မနက်ပိုင်းက ဦးခေါ်ကျားဝမ် နေအိမ်အတွင်းမူးယစ်ဆေးဝါး နှင့် လက်နက်ပစ္စည်းများ တန်ဖိုးငွေကျပ် ၂.၇ ဘီလီယံကျော် (ကျပ်သန်းပေါင်း ၂၇၀၀ ကျော်) သိမ်းဆည်းရမိကြောင်း မူးယစ် ရဲတပ်ဖွဲ့ မှ သိရသည်။
ထိုမူးယစ်ဆေးဝါး နှင့် လက်နက်များကို နေအိမ်တွင် သိမ်းဆည်းရမိသော်လည်း တရားခံမှာ လွှတ်မြောက်နေဆဲဟု သိရသည်။
သိမ်းဆည်းရမိသည့် လက်နက်ပစ္စည်းများမှာ ကျည်အိမ် ၈ခု၊ M22 ကျည် ၁၂၃ တောင့်၊ စိတ်ကြွရူးသွပ်ဆေးပြား၊ ဘိန်းဖြူ၊ ဘိန်းစိမ်း တို့ဖြစ်သည်။
“ အခုရက်ပိုင်း ကွတ်ခိုင်မှာ မူးယစ်ဆေး တွေ ဆက်တိုက် ဖမ်းဆီးရမိတယ်။ ဒါပေမယ့် တရားခံ မမိဘူး။ ထူးဆန်းတယ်။ မူးယစ်ဆေး၊ လက်နက်တွေက အိမ်ထဲကနေ သိမ်းရမိပေမယ့် တရားခံကတော့ ပျောက်နေတယ်” ဟု ကွတ်ခိုင်မြို့ အမည်မဖော်လိုသည့် ဒေသခံ တဦး က ပြောသည်။
မူးယစ်ဆေးဝါးဖမ်းဆီးရသည့် ကိစ္စတွင် ပွင့်လင်းမြင်သာမှုမရှိကြောင်း၊ တရားခံ လွှတ်မြောက်နေသည့်အပေါ် မေးခွန်းထုတ်စရာ များနေကြောင်း ကွတ်ခိုင်မြို့ လူ့အခွင့်အရေး လှုပ်ရှားသူများက ပြောသည်။
“ လွယ်ခမ်း၊ ကောင်းခါး ဘက်မှာ အိမ်တိုင်းလိုလို မူးယစ်ဆေးရှိတယ်။ မူးယစ်ဆေးမိပြီး တရားခံ လူမမိတာတော့ မဖြစ်သင့်ဘူး”ဟု ကွတ်ခိုင်မြို့ နေထိုင်သည့် မဘောက် က ပြောသည်။
ကွတ်ခိုင်မြို့နယ်အတွင်း ဖေဖော်ဝါရီ ၂၈ရက်မှ ဧပြီ ၉ ရက်ထိ မူးယစ်ဆေးဝါးနှင့် ဆက်စပ်သည့် ပစ္စည်း တန်ဖိုးငွေ ၄၁၄ ဘီလီယံကျော် သိမ်းဆည်းရမိကြောင်း မူးယစ်ရဲတပ်ဖွဲ့ မှ ထုတ်ပြန်ထားသည်။
