သျှမ်းပြည်မြောက်ပိုင်း သီပေါ မြို့နယ် ကုံးမုံ ကျေးရွာ အနီးတွင် မိသားစုဝင် ၅ ဦး သေနတ်ပစ်သတ်ခံရကြောင်း သတင်းရရှိသည်။
ဧပြီလ ၉ ရက်ယနေ့မနက်ပိုင်းက အဆိုပါ မိသားစု ၅ ဦး ပစ်သတ်ခံရခြင်းဖြစ်ပြီး မည်သည့်အဖွဲ့ မှ လာရောက် ပစ်ခတ်သွားသည်ကို မသိရှိကြောင်း၊ ပစ်သတ်ခံရသူများမှာ အမျိုးသား ၂ ဦး၊ အမျိုးသမီး ၂ ဦး နှင့် အသက် ၁၂ နှစ် အရွယ် ယောင်္ကျားလေး တဦး ပါဝင်ကြောင်း အလောင်းသွားသယ်သည့် နယ်စည်းမခြား ပရဟိတ (သီပေါ) မှ ကိုမျိုး က သျှမ်းသံတော်ဆင် သို့ပြောသည်။
“ မနက် ၉ နာရီက ရဲ က ကျနော်တို့ကို အလောင်းလာသယ်ဖို့ ဖုန်းဆက်လာတယ်။ မိသားစုဝင်တွေ လို့ယူဆရတယ်။ သေနတ်ပစ်သတ်ခံရတဲ့ဒဏ်ရာတွေပါ” ဟု ကိုမျိုး က ဆိုသည်။
သေနတ်ပစ်ခံရသည့် မိသားစု ဝင် ၅ ဦးသည် မည်သည့်အချိန်တွင် ပစ်ခံထားရ မှန်းမသိ ရှိကြောင်း၊ သေ နတ်ပစ်ခံရသည့်နေရာသည် သီပေါမြို့ ကုံးမုံကျေးရွာ အတွင်း တောထဲ တွင် ဖြစ်ကြောင်း ကိုမျိုးက ထပ်လောင်းပြောသည်။
“ ကုံးမုံကျေးရွာ မှာ ကျနော်တို့ အလောင်းသယ်တာ ဒါနဲ့ဆို ၁၈လောင်းရှိပြီ” ဟု ကိုမျိုးက ဆိုသည်။
သီပေါမြို့နယ် ကုံမုံကျေးွရာ ပတ်ဝန်းကျင်ဒေသတွင် မူးယစ်ဆေးဝါး ရောင်းဝယ်သူများ၊ သုံးစွဲသူများ ကျင်လည်လှုပ်ရှားသည့် နေရာ ဖြစ်ကြောင်း သီပေါမြို့ခံ အမျိုးသား စိုင်းစိုင်း က ပြောသည်။
“ အဲ့နေရာက မူးယစ်ဆေးတွေ လုပ်တဲ့သူများတယ်။သာမာန် ဘယ်သူမှ မသွားကြဘူး။ အဲ့နေရာကို သက်ဆိုင်ရာ ရှင်းလင်းပေးဖို့ဒေသခံတွေ မကြာခဏ ပြောပါတယ်” ဟု စိုင်းစိုင်း ကဆိုသည်
ထိုနေရာသည် မကြာခဏ သေနတ်ပစ်သတ်ခံရသော်လည်း တရားခံ တကြိမ် တခါမျှ ဖမ်းဆီးခံရခြင်းမရှိကြောင်း သီပေါမြို့ဒေသခံများက ပြောသည်။
အဆိုပါကိစ္စနှင့်ပတ်သက်ပြီး သီပေါမြို့နယ် ရဲစခန်းကို သျှမ်းသံတော်ဆင့်က ကြိုးစားပြီး ဆက်သွယ် မေးမြန်းရာ ပြန်လည် ဖြေကြားခြင်းမရှိပေ။
ကုံးမုံ ကျေးရွာ အနီးတွင် ယခုနှစ် ဇန်နဝါရီ ၁၁ ရက်က အမျိုးသား ၂ဦးသေနတ်ပစ်သတ်ခံပြီး၊ ဇန်နဝါရီ ၂၄ ရက်ကလည်း အမျိုးသား ၂ ဦး နှင့် အမျိုးသမီး ၁ ဦး သေနတ်ပစ်သတ်ခံရသည်။
ထိုနည်းတူ ယမန်နှစ် ဒီဇင်ဘာ ၂၈ ရက်တွင်လည်း အမျိုးသား ၃ဦး သေနတ်ပစ်သတ်ခံရသည်။
သီပေါမြို့နယ် အတွင်း တိုင်းရင်းသား လက်နက်ကိုင် ပေါင်းစုံ၊ အစိုးရ တပ်မတော်နှင့် ပြည်သူ့စစ်များ လှုပ်ရှားသည့်နေရာတခုဖြစ်သည်။
Leave a Comments