သျှမ်းပြည်တောင်ပိုင်း ရွာငံမြို့နယ်အတွင်း နေထိုင်သည့် လူငယ်တစ်ဦးကို စစ်ကောင်စီမှ အကြောင်းမဲ့ ပစ်သတ်ပြီးနောက် လူငယ် (၃)ဦးကို ဖမ်းဆီးသွားကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၁၄)ရက်တွင် ရွာငံမြို့ နွားဘန်းကြီးကျေးရွာ၌ ခြံမှ အိမ်သို့ ပြန်လာသည့် အသက် ၂၀ ဝန်းကျင်အရွယ် မောင်ဇင်မင်းခိုင်ကို စစ်ကောင်စီတပ်သားတို့မှ သေနတ်ဖြင့် အချက်ပေါင်းများစွာ ပစ်သတ်ပြီး အလောင်းကိုလည်း ယူသွားကြောင်း ဒေသခံများက သျှမ်းသံတော်ဆင့်ကို ပြောသည်။
“စစ်ကောင်စီကားတွေက အရှိန်ပြင်းပြင်းနဲ့ အိမ်ရှေ့က မောင်းဖြတ်သွားတာတော့ တွေ့တယ်၊ ကားကြီးရော ကားသေးရော ၅ စီးလောက် ရှိတယ်၊ နောက်တော့ သေနတ်သံတွေ ဆက်တိုက်ထွက်ပေါ်လာတယ်၊ အချက် ၂၀ ကျော်လောက်ရှိတယ်။ လူငယ် ၃ ဦးကိုလည်း ဖမ်းသွားတယ်” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတို့သည် နွားဘန်းကြီးကျေးရွာအတွင်းသို့ အရှိန်ပြင်းပြင်းနှင့်မောင်းဝင်လာပြီး မောင်ဇင်မင်းခိုင်ကို အကြောင်းမဲ့ ပစ်သတ်သွားပြီးနောက် ကျေးရွာတွင်းသို့ အင်အားဖြန့်ကျက်စစ်ဆေးမှုများပြုလုပ်ပြီး မောင်ဇင်မင်းခိုင် ရုပ်အလောင်းကိုလည်း ပြန်ပေးခြင်းမရှိဘဲ လူနာတင်ယာဥ်ဖြင့် ကလောမြို့ဘက်သို့ သယ်ဆောင်သွားကြောင်း ဒေသခံများက ပြောသည်။
လူနာတင်ယာဥ်ထွက်သွားပြီး မရှေးမနှောင်းတွင် နောက်ထပ်အင်အား ၂၀၀ ခန့်ရှိသည့် စစ်ကောင်စီတပ်သားတို့က ရွာငံမြို့နှင့် နွားဘန်းကြီး ကျေးရွာတွင်းသို့ ထပ်မံရောက်ရှိလာပြီး လူငယ်သုံးဦးနှင့် ကျေးရွာတွင်းမှ တချို့နေအိမ်များကိုလည်း ဝင်ရောက်စစ်ဆေးမှုများ ပြုလုပ်ကြောင်း ဒေသခံများက ပြောသည်။
“သူတို့(စကစ)က အလောင်းကို ပြန်မပေးပါဘူး၊ ပြီးတော့ အင်အားထပ်ဖြည့်ပေးပြီး ရွာကို လှည့်လည်စစ်ဆေးမှု လှုပ်သေးတယ်၊ အခုထိ နွားဘန်းကြီးကျေးရွာထဲမှာ စစ်ကောင်စီအင်အား ၂၀၀ ကျော်လောက်ရှိနေတုန်းပဲ၊ သူတို့က ဒီ နွားဘန်းကြီးကျေးရွာထဲမှာ PDF ရှိတယ်ထင်နေတာ” ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်သားတို့ ပစ်သတ်လိုက်သည့် အသက် ၂၀ ဝန်းကျင် မောင်ဇင်မင်းခိုင်သည် မိဘများကို ရှာဖွေကျွေးမွေးနေသည့် သူဖြစ်ပြီး၊ ၎င်းသေဆုံးမှု အလောင်းပြန်မရခြင်းကြောင့် မိဘများအနေဖြင့်လည်း စိတ်ထိခိုက်ပြီး ကျန်းမာရေး အခြေအနေမကောင်းကြောင်း သိရသည်။
ရွာငံမြို့သည် အာဏာသိမ်းပြီးခါစ ကာလတွင် အေးချမ်းစွာ နေထိုင်ရှာဖွေ စားသောက်ခဲ့ပေမယ့် ၂၀၂၁ ခုနှစ်နှောင်းပိုင်းမှ စတင်ကာ စစ်တပ်ထောက်ခံသူ ဒလန်သတင်းပေးမှုကြောင့် လူငယ်များစွာ ဖမ်းဆီးခံရပြီး ဒေသတွင်းနေထိုင်မှု လုံခြုံရေးကင်းမဲ့နေကြောင်း ဒေသခံများက ဝေဖန်ပြောဆိုနေကြသည်။
Leave a Comments