သျှမ်းပြည် မြောက်ပိုင်း လားရှိုးမြို့ တွင် ယနေ့ မနက်ပိုင်းက အသက် ၅၀ကျော် အမျိုးသမီးတဦးအား အမျိုးသားတဦးမှ မုဒိမ်းကျူးလွန်ရန် ကြိုးစားခဲ့ကြောင်း သတင်းရရှိသည်။
ဖြစ်စဉ်မှာ ဧပြီ ၈ ရက် ယနေ့ မနက် ၆နာရီ ဝန်းကျင်တွင် ကိုယ်လက်လှုပ်ရှားလေ့ကျင့်ခန်း လမ်းလျှောက်ထွက်သည့် အသက် ၅၀ကျော် အမျိုးသမီးကို အမျိုးသားတဦးက လမ်းပေါ်တွင် ရိုက်နှက်လုပ်ပြီး၊ မုဒိမ်းမှု ကျူးလွန်ရန် ကြိုးစားခဲ့သည်ဟု ဆိုသည်။
အဆိုပါအမျိုးသမီးသည် ရုန်းပြီးထွက်ပြေးရာ ရပ်ကွက် (၇) အရောက် ပတ်ဝန်းကျင်ကို အော်ဟစ် အကူအညီတောင်းရာမှ လွှတ်မြောက်လာခဲ့ရခြင်းဖြစ်ကြောင်း အဆိုပါ အမျိုးသမီးကို ကူညီပေးသည် စိုင်းထွန်းထွန်းလင်း က သျှမ်းသံတော်ဆင့် သို့ပြောသည်။
“ ဖြစ်တာက ရပ်ကွက်(၈) မှာဖြစ်တာ။ အမျိုးသမီးကို တောထဲဆွဲသွားတယ်။ အင်္ကျ ီတွေ ချွတ်ဖို့ ဆွဲတယ်။ ရိုက်တယ်။ အမျိုးသမီးက ရုန်းထွက်လာပြီး ကျနော်တို့ ရပ်ကွက် (၇)ဘက်ရောက်လာတယ်။ ကျနော်တို့ ဝိုင်းဖမ်းလိုက်တယ်” ဟု စိုင်းထွန်းထွန်းဝင်း က ဆိုသည်။
အမျိုးသမီး သည် ခန္ဓာကိုယ် တခုလုံး ရိုက်နှက်ခံရပြီး၊ အင်္ကျီများလည်း ဆုတ်ဖြဲခံထားရကြောင်း သိရသည်။
အဆိုပါ ကျူးလွန်သည့် အမျိုးသားကို ရပ်ကွက် အုပ်ချုပ်ရေးမှူး၊ ပြည်သူ့စစ် ၃ယောက် မှ လာရောက်ခေါ်သွားကြောင်း စိုင်းထွန်းထွန်းဝင်း က ပြောသည်။
“ လားရှိုးက အရင် က ခိုးလုယက် မှုတွေပဲရှိတာ။ ဒီလို မုဒိမ်းကျင့်ဖို့ကြိုးစားတာ မရှိဘူး။ အခုက အသက် ၅၀ကျော် အမျိုးသမီးတောင် အလွှတ်မပေးဘူးဆိုတော့ မလုံခြုံတော့ဘူး” ဟု လားရှိုး ဒေသခံစိုင်းလှ က ပြောသည်။
လားရှိုးမြို့တွင် မူးယစ်ဆေးဝါး သုံးစွဲသည့် သူများသည့် နေရာ ဒေသတခုဖြစ်သည့် အလျောက် ခိုးဆိုးလုယက်မှုမကြာခဏ ဖြစ်ပွားသည့် ဒေသဖြစ်သည်။
“ ကျနော်တို့ကတော့ ကျူးလွန်ဖို့ ကြိုးစားတဲ့သူကို ပြင်းထန်တဲ့ ပြစ်ဒဏ်ပေးစေချင်တယ်။ အခု က ဘယ်လို ဆောင်ရွက်မလဲဆိုတာ မသိဘူး။ ဆေးကြောင်နေတာလည်းဖြစ်နိုင်ပေမယ့် ထိရောက်စွာ အရေးယူစေချင်တယ်” ဟု စိုင်းလှ က ဆိုသည်။
အဆိုပါ ကိစ္စနှင့် ပတ်သက်ပြီး သျှမ်းသံတော်ဆင့် မှ လားရှိုးရဲစခန်းကို ဆက်သွယ်မေးမြန်းရာ ပြန်လည် ဖြေကြားခြင်းမရှိပေ။
Leave a Comments