မြန်မာ-တရုတ်နယ်စပ် မူဆယ်မြို့အတွင်းရှိ နယ်စပ်ဂိတ်များတွင် မူဆယ်မြို့ခံများကိုသာ ဝင်၊ထွက်ခွင့်ပေးကြောင်း သတင်းရရှိသည်။
လက်ရှိ မြန်မာနိုင်ငံတွင် COVID-19 ကူးစက်မြန်ရောဂါဖြစ်ပွားနေသည့် အတွက် မူဆယ်မြို့ မှတ်ပုံတင်ကိုင်ဆောင်သူများကိုသာ တရုတ်ပြည်ဘက်ခြမ်းသို့ဝင်ခွင့်ပေးတော့မည်ဖြစ်ကြောင်း သိရသည်။
“ အခုက တခြားဒေသ ကလာတဲ့သူတွေကို ပေးမဝင်တော့ဘူး။ ၁၃/ မဆတ မှတ်ပုံတင် ကိုင်တဲ့သူပဲ ပေးဝင်တယ်။ တရုတ်က ပိတ်လိုက်တာပါ” ဟု မူဆယ် ဒေသခံ စိုင်းအောင် က ပြောသည်။
ယနေ့တွင်လည်း တခြားဒေသမှ လာသူများအား တရုတ်ဘက်ခြမ်းသို့ပေးမဝင်သည့်အတွက် မူဆယ် မြို့ ဆင်ဖြူဂိတ်တွင် ရုန်ရင်းဆန်ခတ်မှုခေတ္တ ဖြစ်ပွားခဲ့ကြောင်း မူဆယ်ဒေသခံ စိုင်းအောင် က ပြောသည်။
Photo by ထုန့်ဟွေ့လီ၊ ယနေ့ တရုတ်ပြည်ဘက်သို့ဝင်ရန် စောင့်ဆိုင်းနေသည့် သူများ
တရုတ်ပြည် ကျယ်ဂေါင်တွင် အလုပ်လုပ်သည့် ကိုကျော်ရဲအောင် က “ ၁၃/ မဆတ ကိုင်တဲ့ မူဆယ်နေသူပဲ ဝင်လို့ရတယ်။ ကျနော်တို့ ဝင်လို့မရဘူး။ ဒါမမျှတဘူး။ အခုက တရုတ်က ပိတ်တာပါ။ နေ့ခင်းပိုင်းလောက်ဖြစ်တာ။ အခုက ဘာကြောင့် ပိတ်တယ်ဆိုတာ မသိဘူး။ ကျန်းမာရေး ဌာန က ပိတ်တယ်ပဲပြောတယ်” ဟု သျှမ်းသံတော်ဆင့် သို့ပြောသည်။
လက်ရှိ တရုတ်ပြည်သို့ ဝင်ရန် အတွက် မူဆယ်မြို့ဆင်ဖြူဂိတ်တွင် စောင့်ဆိုင်းနေသည့် လူဦးရေ ၁၀၀၀ နီးပါး ရှိသည် ဟု သိရသည်။
မြန်မာနိုင်ငံအတွင်း COVID-19 ရောဂါရောက်ရှိနေပြီး ကူးစက်သူ ၊ သံသယရှိသူများ ရှိနေပြီဆိုသည့် သတင်းကြောင့် မူဆယ် မှတ်ပုံတင် မှ အပ ကျန်ဒေသမှ ပြည်သူများ အားပေးမဝင်တော့ကြောင်း တရုတ်ပြည် တွင် တာဝန်ကျနေ သူ တဦးက ပြောပြသည်။
တရုတ်ပြည် အတွင်းသို့ကုန်တင်ယာဉ်များ ယမန်နေ့( မတ် ၂၈) ရက်မှ စတင်ကာ ပေးမဝင်တော့ကြောင်း သိရသည်။
Leave a Comments