ကျောက်မဲမြို့သို့ စစ်ရှောင် ၂၀၀ ကျော်ရောက်ရှိ ၊ ရွာတွင် ၁၀၀၀ ခန့်ပိတ်မိနေ

0

သျှမ်းပြည်မြောက်ပိုင်း ကျောက်မဲမြို့နယ်အတွင်း TNLA တအာင်းတပ်နှင့် RCSS/SSA တို့ကြားတိုက်ပွဲကြောင့် ဒေသခံလူထု ၂၀၀ ကျော်မှာ ကျောက်မဲမြို့ အောင်မင်္ဂလာကျောင်းတိုက်တွင်ခိုလှုံနေကြကြောင်းသိရသည်။

ကျောက်မဲမြို့ အောင်မင်္ဂလာကျောင်းတိုက် ရှိစစ်ရှောင်များ

ကျောက်မဲမြို့နယ် အုံးအွီးရွာသား ၂၃၃ ယောက်မှာ မတ်လ ၁၆ ရက်နေ့က ကျောက်မဲမြို့သို့ ရောက်ရှိ လာခြင်းဖြစ်ပြီး နေရပ်မပြန်နိုင်သေးသည့်အပြင် ကျေးလက် ၂ ရွာမှရွာသားများမှာ ၂ ဖက်တပ်လှုပ်ရှားမှုကြားမှ ထွက်ပြေးနိုင်ခြင်းမရှိသေးကြောင်း ကျောက်မဲဒေသခံများကပြောသည်။

“ကျောက်မဲမြို့နယ် ပြည်နယ်လွှတ်တော်ကိုယ်စားလှယ် စိုင်းထွန်းဉာဏ်က – အခုရောက်လာတာက အုံးအွီးရွာသား ၂၀၀ ကျော်ဘဲ။ အောင်မင်္ဂလာကျောင်းတိုက်မှာ ခိုလှုံနေတယ်။ ကျောင်းရယ်၊ ရွာသားတွေရယ် ကူညီထောက်ပ့ံမှုပေးထားတယ်သူတို့ကို ။ ရွာဖက်မှာလည်း တိုက်ပွဲတွေ အချိန်မရွေးဖြစ်ပွါးနိုင်တယ်လေ။ ဒါကြောင့်သူတို့တွေနေရပ်မပြန်ရဲသေးကြဘူး”-ဟု ပြောသည်။

ကျောက်မဲမြို့ အရှေ့မြောက်ဘက် မိုင် ၄၀ ခန့်ဝေးသည့် တော့ဖယ်၊ ကွန်ကော်ရွာသား ၁၀၀၀ ခန့်မှာလည်း ၂ ဖက်တပ်ကြားပိတ်မိနေကြောင်း ကျောက်မဲမြို့ခံ စိုင်းလျံက ပြောသည်။

“TNLA တအာင်းတပ် က ကွန်ကော်နဲ့တော့ဖယ်ရွာထဲမှာလှုပ်ရှားတယ် RCSS/SSA က ရွာအပြင် ဘက် ကနေလှုပ်ရှားတယ်။ တိုက်ပွဲကအချိန်မရွေးဖြစ်ပွါးနိုင်တယ်။ ဒါပေမယ့်ရွာသားတွေက ထွက်ပြေးလို့မရဘဲ ညှပ်နေတယ်။ တရွာမှာလူဦးရေ ၅၀၀ လောက်ရှိတယ်။ ၂ ရွာဆိုတော့ ၁၀၀၀ လောက်ရှိနေတုန်းဘဲ။ ကျောက်မဲဘက်က ကူညီမှုအဖွဲ့တွေလည်း သွားမထုတ်လာနိုင်သေးဘူး။ လမ်းမှာ မြေမြုပ်မှိုင်းတွေ ဘာတွေရှိနိုင်တယ်လေ”- ဟု ဦးလုံးလျံက ပြောသည်။

သျှမ်းပြည်မြောက်ပိုင်း နမ္မတူမြို့တွင်လည်း TNLA တအာင်းတပ်နှင့် RCSS/SSA တောင်ပိုင်း သျှမ်းပြည် တပ်မတော်တို့ကြားတိုက်ပွဲများအပြင် အစိုးရတပ်မတော်နှင့်လည်းတိုက်ပွဲများဖြစ်ပွါးမှုကြောင့် နမ္မတူမြို့နယ် အတွင်း စစ်ဘေးရှောင် (ယခင်ရှိရင်းစွဲနှင့်ယခုအသစ်ထပ်မံရောက်ရှိလာသူများ) စုစုပေါင်း ၁၅၀၀ ခန့်ရှိကြောင်း စစ်ဘေးရှောင်များကူညီရေးကော်မတီမှ စိုင်းဘဉာဏ်ကပြောသည်။

၄င်းအပြင်စစ်ကြောင်းနှင့်အတူ ဖမ်းဆီးခေါ်ဆောင်ခြင်းခံသွားရသည့်ရွာသားများလည်းရှိနေရာ မည်သည့် တပ်ဖွဲ့မဆို ဖမ်းဆီးခေါ်ဆောင်သွားပါက အမြန်ဆုံးပြန်လွှတ်ပေးသင့်ကြောင်း စစ်ဘေးရှောင်ကူညီရေး အဖွဲ့ကတောင်းဆိုလိုက်သည်။

 

 

 

 

 

Leave a Comments

LEAVE A REPLY

Please enter your comment!
Please enter your name here