သျှမ်းပြည်မြောက်ပိုင်း နမ္မတူမြို့နယ်အတွင်း တအာင်း TNLA နှင့်အစိုးရတပ်မတော်တို့အကြား တိုက်ပွဲ များကြောင့် လားရှိုးမြို့ပေါ်တို့ စစ်ဘေးရှောင် ၂၀၀ ကျော်ထပ်မံရောက်ရှိလာကြောင်းသိရသည်။

မတ်လ ၁၇ ရက်နေ့က နမ္မတူမြို့အရှေ့မြောက်ဘက်ရှိ နားဆိုင်းအုပ်စု မှ စစ်ဘေးရှောင် ၂၀၀ ကျော်မှာ လားရှိုးမြို့ အီနိုင်းအုပ်စုဘုန်းကြီးကျောင်းသို့လည်းကောင်း ရပ်ကွက် ၉ ရှိ ခရိယာန်ဘုန်းကြီး ကျောင်းသို့ လည်းကောင်း ရောက်ရှိခိုလှုံနေကြကြောင်း နမ္မတူမြို့ ပြည်နယ်လွှတ်တော်အမတ် နန်းစံဟွမ်က သျှမ်းသံတော်ဆင့်အားပြောသည်။

“နားဆိုင်းရွာနဲ့လွယ်ပေးရွာသားတွေပါ။ ဆွတ်မွန်းရွာနားမှာတိုက်ပွဲဖြစ်လို့လေ စစ်ဘေးရှောင်လာကြတာ။ အီနိုင်းဘုန်းကြီးကျောင်းမှာ စစ်ဘေးရှောင် ၄၅ အိမ်ထောင်စုရှိတယ်။ လူဦးရေ ၁၅၀ နီးပါး။ သူတို့တွေအိမ်ပြန်ချင်တယ် ။ အခြေအနေမတည်ငြိမ်သေးလို့ သူတို့မပြန်ရဲသေးတာ”- ဟု ၄င်းကပြောသည်။

၄င်းဘုန်းကြီးကျောင်းအပြင် လားရှိုးမြို့ ရပ်ကွက် ၉ ရှိ ကချင်နှစ်ခြင်းခရိယာန်ကျောင်းတွင်လည်း ၉၀ ခန့်ရှိနေကြောင်း – စစ်ဘေးရှောင်များအား အကူအညီပေးနေသည့်လားရှိုးဒေသခံတဦးကပြောသည်။

“၁၇ ရက်နေ့က နားဆိုင်းရွာထဲကိုလက်နက်ကြီးတလုံးကျတာ လူတယောက်ထိမိတယ်လို့ကြားရပါတယ်။ တိုက်ပွဲကတော့ နေ့တိုင်းဖြစ်နေတယ်။ ပြင်းထန်တာနဲ့မပြင်းထန်တာဘဲ”-ဟု နမ္မတူမြို့မန်စံဘုန်းကြီးကျောင်း စစ်ရှောင်စခန်းရှိစစ်ရှောင်များအားကူညီမှုပေးနေသည့် လားရှိုးမှ နန်းဟိန်း ကပြောသည်။

နမ္မတူမြို့နယ် နားဆိုင်းအုပ်စု ဆွတ်မွန်းရွာအနီးတွင် ပြီးခဲ့သည့် အပတ်ကတည်းက TNLA နှင့် RCSS/SSA တို့အကြား တိုက်ပွဲများဖြစ်ပွါးခဲ့ပြီး ရွာသား ၁၀၀၀ ခန့်မှာ နမ္မတူမြို့သို့လည်းကောင်း လားရှိုးမြို့သို့လည်းကောင်းထွက်ပြေးတိမ်းရှောင်ခဲ့ကြသည်။ တဖက်တွင်လည်း အစိုးရတပ်မတော်သည် နမ္မတူ – မန်စံလမ်းဘက်သို့ တက်သွားသဖြင့် လက်ရှိအဆိုပါဒေသတွင် လက်နက်ကိုင်တပ်ဖွဲ့ ၃ ခုလှုပ်ရှားကာ တိုက်ပွဲများဖြစ်ပွါးနေကြောင်းနမ္မတူဒေသခံများပြောပြချက်အရသိရပါသည်။