သျှမ်းပြည် အရှေ့ပိုင်း မိုင်းတုံမြို့နယ် အတွင်း RCSS/SSA နှင့် အစိုးရတပ်မတော်တို့ ယနေ့ မနက်ပိုင်းက တိုက်ပွဲဖြစ်ပွားခဲ့သည်။
မတ်လ ၂၅ ရက် ယနေ့ မနက် ၈ နာရီခွဲက သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် RCSS/SSA နှင့် အစိုးရ တပ်မတော် တို့ မိုင်းတုံမြို့နယ် မိုင်းအစ်ကျေးရွာအနီး ဟိုနမ့်တောင်ကုန်းတွင် မိနစ် ၃၀ခန့် တိုက်ပွဲဖြစ်ပွား ခဲ့ခြင်းဖြစ်ကြောင်း RCSS/SSA ပြောရေးဆိုခွင့်ရှိသူ ဗိုလ်မှူး စိုင်းခမ်းစံ က သျှမ်းသံတော်ဆင့် သို့ပြောသည်။
“ ဒီနေ့ မနက် ၈နာရီခွဲမှာ ဖြစ်တာပါ။ မိုင်းတုံ အခြေစိုက် အစိုးရ တပ်ရင်း ၃ခု က ကျနော်တို့ရှိတဲ့နေရာကို သတင်းမပို့ဘဲ ဖြတ်လို့ပါ ” ဟု ဗိုလ်မှူး စိုင်းခမ်းစံက ဆိုသည်။
မတ်လ ၁၅ ရက်က ၂ ဖက်ကိုယ်စားလှယ်များတွေ့ဆုံပြီးနောက်ပိုင်း ပြန်လည်ဖြစ်ပွါးသောတိုက်ပွဲဖြစ်ကြောင်း ဗိုလ်မှူးခမ်းစံက ပြောသည်။
မိုင်းတုံ အခြေစိုက် အစိုးရ တပ်မတော် ၃ ခုမှာ ခမရ ၅၁၉ ခလရ ၂၂၅ နှင့် ၂၇၇ တို့ဖြစ်ကြောင်း သိရသည် ။
အဆိုပါ တိုက်ပွဲ နှင့်ပတ်သက်ပြီး ဗိုလ်မှူးခမ်းစံ က “ မိုင်းတုံမှာ ရှိတဲ့ ကျနော်တို့ ဆက်ဆံရေး နဲ့ အစိုးရ တပ်က ဆက်ဆံရေး ရုံး အချင်းချင်း ဆွေးနွေးညှိနှိုင်းသွားမယ်။ အဆင်မပြေရင်တော့ နေပြည်တော်ထိ တက်ဆွေးနွေးရမယ်”ဟု သျှမ်းသံတော်ဆင့် သို့ ပြောသည်။
တိုက်ပွဲအတွင်း နှစ်ဖက် တပ် ထိခိုက်မှု အသေးစိတ်ကို မသိရှိရသေးကြောင်းလည်း ဗိုလ်မှူး စိုင်းခမ်းစံ က ဆက်လက်ပြောသည်။
RCSS/SSA နှင့် အစိုးရ တပ်မတော် တိုက်ပွဲဖြစ်ပွားရခြင်း ကိစ္စနှင့် ပတ်သက်ပြီး သတင်းမှန် ပြန်ကြားရေး ကို သျှမ်းသံတော်ဆင့် က အကြိမ်ကြိမ်ဆက်သွယ်ခဲ့သော်လည်း ဆက်သွယ်မရခဲ့ပေ။
ဖေဖော်ဝါရီ ၂၇ ရက်နေ့မှ မတ် ၃ရက်နေ့အထိ RCSS/SSA နှင့် အစိုးရ တပ်မတော်သည် သျှမ်းပြည် တောင်ပိုင်း မိုင်းကိုင်၊ ကျေးသီး နှင့် မိုင်းနောင်မြို့နယ် အတွင်း တိုက်ပွဲဖြစ်ပွားခဲ့သည်။
ထိုတိုက်ပွဲတွင် မိုင်းကိုင်မြို့နယ် အတွင်းရှိ RCSS/SSA တပ်စခန်းချသည့် လွိုင်တောင်း တပ်စခန်း ဆုတ်ခွာပေးခဲ့ရသည်။
