မြန်မာ-ထိုင်း နယ်စပ် ချစ်ကြည်ရေး တံတား ကို ယနေ့ (မတ် ၂၃) ရက်တွင်စတင်ပိတ်မည် ဟု ကြေညာ ထားသော်လည်း ပိတ်ရက်အမှီမရောက်နိုင်သော ရွှေ့ပြောင်းအလုပ်သမား ၂၀၀ ကျော် အား ယနေ့ မနက်အစောပိုင်းက စစ်ဆေးမှုများပြုလုပ်ကာ တာချီလိတ်သို့ ဝင်ခွင့်ပေးလိုက်ပြီဖြစ် ကြောင်း သတင်း ရရှိသည်။

COVID-19 ဖြစ်ပွားမှု ထိန်းချုပ်သည့် အနေဖြင့် မြန်မာ-ထိုင်း နှစ်နိုင်ငံ အမှတ်(၂) ချစ်ကြည်ရေးတံတား ကို မတ် ၂၁ ရက် မနက်ပိုင်းက ထိုင်းနိုင်ငံဘက်က စတင် ပိတ်ထားခဲ့ပြီး၊ အမှတ် (၂) တံတားကို မတ် ၂၃ ရက် ပိတ်မည်ဟု သက်ဆိုင်ရာများက ထိုနေ့တွင်ကြေညာချက်ထုတ်ခဲ့သည်။

သို့သော် ထိုင်းနိုင်ငံ ဘန်ကောက် ၊ချင်းမိုင်နှင့်တခြားဒေသသို့ တရားဝင် ဗီဇာဖြင့် သွားရောက် အလုပ် လုပ်ကိုင်သည့် မြန်မာရွှေ့ပြောင်းအလုပ်သမား ၂၀၀ ကျော် မှာ နေရပ်ပြန်ရန် နယ်စပ်ဂိတ် သို့အချိန်မှီ မရောက်နိုင်ဘဲ မတ် ၂၃ ရက် မနက်အစောပိုင်းမှ ရောက်ရှိလာသဖြင့် နှစ်နိုင်ငံ အာဏာပိုင်များ ညှိနှိုင်းကာ စစ်ဆေးမှုပြုပြီးမှတာချီလိတ်ဘက်သို့ပြန်လွှတ်ပေးခဲ့ကြောင်း သိရသည်။

“ တကယ်တော့ ဒီနေ့ စပြီး ဂိတ်ပိတ်မယ်လို့ကြေငြာထားတာ။ ဒါပေမယ့် ထိုင်းမှာ အလုပ်သွားလုပ်တဲ့ သူတွေ နယ်စပ်ဂိတ်ကို ရောက်လာတာများတော့ ဂိတ်ပြန်ဖွင့်လိုက်ရတယ်” ဟု တာချီလိတ် မှ တာဝန်ရှိ လူဝင်မှု ကြီးကြပ်ရေး တဦးက သျှမ်းသံတော်ဆင့် သို့ပြောသည်။

မတ်လ ၂၃ တွင်ပိတ်မည်ဟု ကြေငြာထားသော်လည်း ထိုင်းအာဏာပိုင်များက ညသန်းခေါင်ကတည်းက တံခါးပိတ်လိုက်ကြောင်း တာချီလိတ်မြို့ခံများကပြောသည်။

ထိုင်းပြန်ဝင်မည့် ရွှေ့ပြောင်းအလုပ်သမားများကို ထိုင်းနိုင်ငံ လူဝင်မှု ကြီးကြပ်ရေး မှ Re-entry ပြုလုပ်ပေး ပြီး ဂိတ် ၂ ဖက်စလုံးမှ အာဏာပိုင်များက အပူချိန်တိုင်းစစ်ဆေးမှုများပြုလုပ်ပေး ခဲ့သည်ဟုသိရသည်။

လက်ရှိ ထိုင်းနိုင်ငံတွင် COVID-19 ကူးစက်ခံရသူ ၇၂၁ ဦး၊ ပြင်းထန် လူနာ ၇ ဦးရှိကာ သေဆုံးသူ ၁ ဦးရှိကြောင်း ထိုင်းနိုင်ငံ ကျန်းမာရေး ဝန်ကြီးဌာန ယနေ့ မတ် ၂၃ ရက် မနက်ပိုင်း ထုတ်ပြန်ချက် အရသိရသည်။

ယခုရက်ပိုင်း မြန်မာ-ထိုင်း နယ်စပ်ဂိတ် များမှ နေရပ်ပြန် မြန်မာရွှေ့ပြောင်းအလုပ်သမားများ တသောင်းကျော် ရှိကြောင်း သိရသည်။

ထိုင်းနိုင်ငံသို့သွားရောက် အလုပ်လုပ်ကိုင်သည့် မြန်မာနိုင်ငံသား အများအပြား နေရပ်ပြန်နေသည့်အခြေအနေကြောင့် မြန်မာနိုင်ငံသို့ ရောဂါဝင်ရောက်ကူးစက်နိုင်ချေ မြင့်မားလာနိုင်ကြောင်း မတ် ၂၂ရက် ကျန်းမာရေး နှင့် အားကစား ဝန်ကြီးဌာ ပြည်ထောင်စု ဝန်ကြီး ဒေါက်တာမြင့်ထွေး က နေပြည်တော်တွင် ပြုလုပ်သည့် အစည်းအဝေးတွင်ပြောကြားခဲ့သည်။

မြန်မာပြည်သို့ ပြန်ဝင်လာသည့် ရွှေ့ပြောင်းအလုပ်သမား အလွန်များသဖြင့် ၎င်းတို့ အတွက် သတ်မှတ်နေရာများတွင် အသွားအလာ ကန့်သတ်ခြင်း (facility quarantine) ကို ဆောင်ရွက်ရန် မဖြစ်နိုင်သဖြင့် သက်ဆိုင်ရာ နေအိမ်များတွင် အသွားအလာ ကန့်သတ်ခြင်း ( home quarantine) ကိုသာ ဆောင်ရွက်ရမည် ဖြစ်ကြောင်း ဒေါက်တာ မြင့်ထွေးက ထည့်သွင်းပြောကြားခဲ့သည်။

“ ကျနော်တို့နယ်စပ်ဂိတ်ပိတ်ရင်တော့ အဓိက စားသောက်ကုန် ကိစ္စ အခက်အခဲဖြစ်လာနိုင်တယ်။ နောက် ပြန်ဝင်လာတဲ့သူတွေကိုလည်း မိမိ ကျန်းမာရေးအထူးဂရုစိုက်ဖို့ ပြောချင်တယ်။ သတ်မှတ်ထားတဲ့ ၁၄ရက်မှာ နေအိမ်ထဲမှာ သီးသန့်နေဖို့ ပြောချင်ပါတယ်” ဟု တာချီလိတ်ဒေသခံ စိုင်းတစ် က ပြောသည်။

မြန်မာပြည်သို့ ပြန်လာသည့် ရွှေ့ပြောင်းအလုပ်သမားများအနေဖြင့် သက်ဆိုင်ရာ ကျန်းမာရေး ဌာနမှ ထုတ်ပြန်ချက်ကို သေချာ လိုက်နာစေလိုကြောင်း၊ ကျန်းမာရေးနှင့်ပတ်သက်ပြီးထူးခြားချက်များရှိပါက ဆေးရုံဆေးခန်း ကျန်းမာရေးဌာနသို့ အကြောင်းကြား ကာ ဆေးကုသမှု ခံယူသင့်ကြောင်း စိုင်းတစ် က ပြောဆိုလိုက်သည်။

“ ထိုင်းနိုင်ငံကနေ လူတွေအများကြီးပြန်ဝင်လာတော့ လန့်တယ်။ အဓိကတော့ ရပ်ရွာတွေကနေ ပြန်လာတဲ့သူကို သတိထားပေးဖို့၊ ပြန်လာတဲ့သူနေကောင်း၊ မကောင်း သေချာ ဂရုစိုက် စောင့်ကြည့်ဖို့ ပြုလုပ်စေချင်တယ်” ဟု တာချီလိတ်မှာ စိုင်းရွှေ က ပြောသည်။

လက်ရှိ အချိန်ထိ မြန်မာနိုင်ငံတွင် COVID-19 ကူးစက်ခံရသည့် သူ တဦးတယောက်မှ မရှိသေးသော်လည်း COVID-19 သံသယ စောင့်ကြည့်ခံရလူနာ ၈ ဦးသေဆုံးခဲ့ပြီဖြစ်ရာ ထိုထဲတွင် သျှမ်းပြည် အရှေ့ပိုင်း ကျိုင်းတုံ တွင် အမျိုးသားတဦး နှင့် သျှမ်းပြည် တောင်ပိုင်း ကျေးသီးမြို့နယ်တွင် အမျိုးသမီးတဦး သေဆုံးခဲ့သည်။