Covid-19 ကြောင့် ထိုင်းနိုင်ငံရောက် မြန်မာ ရွှေ့ပြောင်းအလုပ်သမား များစု အလုပ်ရပ်ဆိုင်း ခံရကြောင်း သတင်းရရှိသည်။

တရုတ်နိုင်ငံ ဝူဟန်ပြည်နယ် မှစတင်လာသည့် Covid-19 အဆုတ်ရောင်ကူးစက်မြန် ရောဂါသည် နိုင်ငံပေါင်း ၁၅၆ နိုင်ငံကျော် ကူးစက်ခံနေရသည်။

ထိုထဲတွင် ထိုင်းနိုင်ငံ လည်း အပါအဝင် ဖြစ်သည်။

Covid-19 ကြောင့် စားသောက်ဆိုင်များ၊ ခရီးသွားလုပ်ငန်းများ၊ ကျောင်းများ ပိတ်ဆိုင်းခဲ့ရသဖြင့် ရွှေ့ပြောင်းအလုပ်သမား များလည်း အလုပ်ရပ်နားရကြောင်း မြန်မာ ရွှေ့ပြောင်းအလုပ်သမား များက ပြောသည်။

“ ကျမ ဒီလ က စပြီး အလုပ်နားလိုက်ရတယ်။ အဓိကတော့ Covid-19 ဖြစ်လာတော့ တရုတ်တွေကလည်း မလာတော့ဘူး။ ဒါနဲ့ အလုပ်ရှင်က အလုပ်သမားလျော့လိုက်တာ။ အဲ့မှာ ကျမ ပါသွားတယ်” ဟု ချင်းမိုင်မြို့ ထိုင်းရိုးရာ အနှိပ်ခန်းတွင် အလုပ်လုပ်သည့် နန်းလင်း က ပြောသည်။

လက်ရှိမှာ ရွှေ့ပြောင်းအလုပ်သမားများသည် အလုပ်သမား ကဒ် သက်တမ်းတိုးရသည့် ကိစ္စရပ်များ လည်း ရှိကြောင်း၊ ထိုကိစ္စများကို အလုပ်ရှင်များက မပြုလုပ်ပေးစေချင်သည့် သဘောလည်းပါကြောင်း နန်းလင်း ကပြောသည်။

“ အလုပ်ရှင်က လည်း တရုတ်ခရီးသွားတွေ မလာတော့ သူလည်း အခက်ကြုံနေရတယ်။ ကျမတို့ ကျတော့ အလုပ်သမားကဒ် သက်တမ်းတိုးရတာတွေ လည်း သူတို့ က ထပ်မရှှုပ်ချင်တော့ အလုပ်နားခိုင်းလိုက်တာပါ” နန်းလင်း ကဆိုသည်။

လက်ရှိ အလုပ်ရပ်နားလိုက်ရသဖြင့် လစာမရသည့်အပြင် လစဉ် သုံးစွဲနေရသည့် အိမ်လခ၊ ကျောင်းလခများအတွက် စိုးရိမ်ပန်နေရကြောင်းလည်း သူမ ကဆိုသည်။

“ ကျမ ကျောင်းကတဖက်နဲ့ဆိုတော့ ဘာဆက်လုပ်ရမှန်းမသိဘူး။ အလုပ်ကလည်း ရှားတော့ ဘာဆက်လုပ်ရမှန်းမသိဘူး။ Covid-19 ကလည်း ရှိတော့ အရမ်းခက်နေတယ်” ဟု နန်းလင်း ကဆိုသည်။

လက်ရှိ ထိုင်းနိုင်ငံ တွင် Covid-19 ကူးစက်ခံရသူ ၃၂၂ ဦးရှိနေပြီး ထိုထဲတွင် မြန်မာ ရွှေ့ပြောင်း အလုပ်သမား ၂ဦး ပါဝင်ကြောင်း သိရသည်။

ထိုင်းနိုင်ငံတွင် အဓိက လာရောက်လည်ပတ်သူ ၇၀ ရာခိုင်နှုန်းသည် တရုတ်လူမျိုးများဖြစ်သည်။ တရုတ်နိုင်ငံသည် ၂၀၁၉ ခုနစ်နှစ်ကုန်ပိုင်း မှ စတင်ကာ Covid-19 ဖြစ်ပွားခဲ့သည်။

ထို့နောက် ထိုင်းနိုင်ငံသို့လာရောက်လည်ပတ်မည့် တရုတ်လူမျိုးများ မရှိသလောက်နည်းပါးသွားသဖြင့် ထိုင်း နိုင်ငံ စားသောက်ဆိုင် များစု လွန်ခဲ့သည့် ၂လ တွင် အလုပ်သမား အလုပ်ချိန် လျော့ချ ခဲ့ရာ အခုနောက်ပိုင်း ရွှေ့ပြောင်းအလုပ်သမား အလုပ်လက်မဲ့ ဖြစ်ရသည့် အဆင့် ရောက်သွားသည် ဟု ထိုင်းနိုင်ငံတွင် အလုပ်လုပ်နေသည့် စိုင်းဆေးတိုင်း က ပြောသည်။

“ အရင် ၂လ က တရုတ်တွေ မလာလို့ စားသောက်ဆိုင်တွေ အလုပ်သမား ရဲ့ အလုပ်ချိန်လျော့လိုက်တယ်။ တလကို ၁၅ရက်ပဲ လုပ်ရတယ်။ အခု လကျတော့ အလုပ်ပါ နား၊ အလုပ်ထွက် ရတယ်” ဟု စိုင်းဆေတိုင်းက ပြောသည်။

Covid -19 သည် အဖက်ဖက် ထိခိုက်မှုရှိသော်လည်း ရွှေ့ပြောင်းအလုပ်သမားများအတွက် ထိခိုက်မှု များကြောင်း၊ လက်ရှိ အချိန်သည် အလုပ်မရှိသည့်အခါ ဝင်ငွေ မရှိ သကဲ့သို့ အလုပ်သမား သက်တမ်းတိုးကဒ် လုပ်ဆောင်ရန်လည်း ခက်ခဲလာနိုင်ကြောင်း စိုင်းဆေတိုင်း က ထပ်လောင်းပြောသည်။

ဆက်လက်ပြီး ရွှေ့ပြောင်းအလုပ်သမား အရေးဆောင်ရွက်ကူညီပေးနေသည့် MAP ဖောင်ဒေးရှင်း မှ စိုင်းဆိုင်မိန်း က “ Covid-19 က အဖက်ဖက်ကို ထိခိုက်ပါတယ်။ ရွှေ့ပြောင်းအလုပ်သမားပဲမဟုတ်ပါဘူး။ အလုပ်သမား အနေနဲ့ တော့ သတိထားပြီးနေဖို့တော့လိုပါတယ်။ နောက် သေချာ မှန်ကန်တဲ့သတင်းတွေ အမြဲနားထောင်ပါ။ အရမ်း လည်း ထိန့်လန့်မှုတွေ မဖြစ်စေချင်ဘူး” ဟု ပြောဆိုလိုက်သည်။

ယခုနောက်ပိုင်း အလုပ်ရပ်နားခံရသဖြင့် မြန်မာရွှေ့ပြောင်းအလုပ်သမား များစုသည် မိမိနေရပ်သို့ပြန်သွားရသည့် သူများရှိကြောင်း သိရသည်။