သင်္ကြန်ကာလအတွင်း နေရပ်ပြန်မည့် ရွှေ့ပြောင်းအလုပ်သမားများ ထိုင်းနိုင်ငံသို့ ပြန်လည် ဝင်ရောက်မည်ဆိုပါက (၁၄)ရက် စောင့်ကြည့် စစ်ဆေးသွားမည် ဖြစ်ကြောင်း ထိုင်းနိုင်ငံ မြန်မာသံရုံး ထုတ်ပြန်ချက် အရသိရသည်။

တရုတ်နိုင်ငံ ဝူဟန်ပြည်နယ် မှ စတင်ဖြစ်ပွားသည့် Novel Corona Virus (ခိုရိုနာဗိုင်းရပ်စ်) VOVID-19 ရောဂါ ကူးစက်ပြန့်ပွားမှုကို တကမ္ဘာလုံး အတိုင်းအတာဖြင့် ကူးစက်ပျံ့နှံ့နေသည့် ကပ်ရောဂါ (Pandamic) အဖြစ် ကမ္ဘာ့ ကျန်းမာရေး (WHO) က မတ် ၁၂ရက်နေ့တွင် ထုတ်ပြန်ကြေညာခဲ့သည်။

ထိုင်းနိုင်ငံ အစိုးရ အနေဖြင့် လည်း COVID-19 ကို အန္တရာယ် ရှိသည့် ကူးစက်မြန် ရောဂါ အဖြစ် သတ်မှတ်ထုတ်ပြန်ကြေညာခဲ့သည်။

COVID- 19 ကူးစက်ပြန့်ပွားမှု ထိန်းချုပ် ကာကွယ်နိုင်ရေး အတွက် အပြည်ပြည် ဆိုင်ရာ ဝင်၊ထွက် ပေါက်များဖြစ်သည့် လေဆိပ်၊ ရေဆိပ်၊ နယ်စပ်ဂိတ်များမှ တဆင့် ဝင်ရောက်လာသည့် ခရီးသည်များကို ကျန်းမာရေး စစ်ဆေးမှု များ အထူး ကြပ်မတ်ဆောင်ရွက်နေကြောင်းလည်း ထိုင်းအစိုးရက ထုတ်ပြန်ထားသည်။

ထို့ပြင် ထိုင်းနိုင်ငံ အဝန်းရှိ စက်ရုံ အလုပ်ရုံများ၌ လည်း COVID- 19 ကာကွယ်ရေး စီမံချက် များချမှတ်ဆောင်ရွက်သွားမည်ဖြစ်ပြီး၊ အလုပ်သမားများ ရောဂါဖြစ်ပွားသည့် နိုင်ငံ (သို့မဟုတ်) မိမိနေရပ်သို့ပြန်သွားပြီး ထိုင်းသို့ပြန်လည်ရောက်ရှိလာပါက သက်ဆိုင်ရာထံ အလုပ်ရှင်များမှ အကြောင်းရမည်ဟု ဆိုပါသည်။

သင်္ကြန်ကာလ နေရပ်ပြန် အလုပ်သမားများအား ထိုင်း Re-entry Visa ကြေး ဘတ် ၁၀၀၀ ကောက်ခံသွားမည် ဟု လည်း ထုတ်ပြန်စာတွင်ရေးသားထားသည်။

လက်ရှိ ထိုင်းနိုင်ငံတွင် ယမန်နေ့ ညအထိ COVID-19 ကူးစက်ခံရသူ ဦးရေ ၁၁၄ ဦးရှိကြောင်း ဘန်ကောက်ပိုစ့်တွင် ရေးသားထားသည်။

ထိုင်းနိုင်ငံတွင် COVID-19 ကူးစက်သူ ဆက်လက်တိုးလာနိုင်ကြောင်း လည်း ထိုင်းနိုင်ငံ အစိုးရ က ပြောဆိုထားသည်။