သျှမ်းပြည် မြောက်ပိုင်း ကွတ်ခိုင်မြို့နယ် လွယ်ခမ်းကျေးရွာအတွင်း မူးယစ်ဆေးဝါးနှင့် လက်နက်များ ထပ်မံ သိမ်းဆည်းရမိကြောင်း သတင်းရရှိသည်။

ယမန်နေ့ မတ်လ ၁၁ ရက်မနက် ၁၀ နာရီအချိန်ခန့်က ကွတ်ခိုင်မြို့နယ် လွယ်ခမ်းကျေးရွာ ဦးဝမ်တာဂျုံး ပိုင်သည့် နေအိမ် အတွင်း ရဲနှင့်စစ်တပ်တို့ ဝင်ရောက်စစ်ဆေးရာ မြေအောက်ခန်းတွင် Sniper သေနတ်မျိုးစုံနှင့် ကျည်တောင့်များသိမ်းဆည်းရမိပြီး၊ အိမ်စောင့် အမျိုးသား ၂ ဦးကို ပါဖမ်းဆီးသွားခဲ့ကြောင်းသိရသည်။

ဆက်လက်ပြီး နေ့လည် ၁၂ နာရီ အချိန်ခန့်က ဦးဝမ်တာဂျုံး ၏ နေအိမ်ခြံဝန်း ကားဂိုဒေါင်မြေအောက်ခန်းများအတွင်းထပ်မံရှာဖွေရာ လက်နက်ခဲယမ်းများ၊ မူးယစ်ဆေးများ နှင့် မူးယစ်ဆေး ပြုလုပ်ရာတွင် အသုံးပြုသည့် ပစ္စည်းများ ကို ပါ ထပ်မံ သိမ်းဆည်းရမိသည်ဟု တပ်မတော်ပြန်ကြားရေးကထုတ်ပြန်သည်။

မွန်းလွဲ ၂ နာရီတွင်မူ ကွတ်ခိုင်မြို့နယ် ရှောက်ဟော် ကျေးရွာ ဦးစိန်ဝင်း ပိုင်သည့် လွယ်ခမ်း ဂိုဒေါင် မြေအောက်ခန်းအတွင်း မူးယစ်ဆေးဝါး နှင့် ဆက်စပ်ပစ္စည်းများ ဆက်လက်ဖမ်းဆီးရမိကြောင်း သိရသည်။

ဖေဖော်ဝါရီ ၂၈ ရက်နေ့မှ မတ်လ ၁၀ ရက်အထိ စုစုပေါင်း ကျပ်ငွေ ၂၇၄ ဘီလီယံကျော် တန်ဖိုးရှိ မူးယစ်ဆေးဝါး နှင့် ဆက်စပ်ပစ္စည်းများ၊ လက်နက်ခဲယမ်းများ သိမ်းဆည်းရမိပြီး၊ ပိုင်ရှင်များကို တော့ ဖမ်းဆီးရမိခြင်းမရှိခဲ့ပေ။

လက်ရှိမှာ အိမ်စောင့် သည့် အမျိုးသား ၂ ဦးကိုသာ ဖမ်းဆီးရမိသေးပြီး၊ အဓိက တရားခံများကို ဖမ်းဆီးရမိရေး အတွင် လုပ်ထုံးလုပ်နည်း နှင့် အညီ ဆောင်ရွက်သွားမည် ဖြစ်ကြောင်းသိရသည်။